المفاجأه .. بقلم: بابكر سلك

بسم الله الرحمن الرحيم

في السلك

•          امس تحدثنا عن القنبله

•          الليله الكلام عن المفاجأه

•          وبكره كان الله احيانا نتحدث عن درة شندي

•          ولما تجي سيرة القنبله والمفاجأه لابد من الحديث عن المصيبه

•          والمصيبه دي سوف نتحدث عنها آخر يوم في التسجيلات

•          نرجع لموضوع الليله

•          قالوا الزول قال ليهم في مفاجأه اجروا

•          الجماعه جروا طوالي للاتحاد

•          حضر مصعب

•          وبس ختفوهوا وجروا يهتفوا بحياتو

•          مصعب اتفاجأ

•          ولكن لم تك المفاجأه مصعب

•          بل كانت المفاجأه تظهر في عيون مصعب

•          قربوا يجدعوهوا في الارض

•          وبس

•          ظهر سفاري

•          وبس

•          ختفوهوا وجروا

•          يهتفوا ويتنهفوا

•          وقالوا لكن مفاجأه في السلك

•          لقوا جية سفاري مابتخصهم

•          قعدوا في الضل

•          ضل الحيط

•          الضل مافايت ليهو شبر

•          قدر ود اللحد

•          واحد منهم قال للتاني ما تطلع المفاجأه زي جية قودوين

•          التاني قال ليهو اخير جية قودوين كنا قاعدين في المطار اسي قاعدين في الشارع تحت الحيط في ضل مايشيل كبريته زي غنم الاشلاق

•          الاول قال ليهو اسكت ماتقول كده تشمت الناس فينا

•          التاني قال ليهو وكت المفاجأه ( كدي ) المصيبه كييييف ؟

•          الاول قال ليهو المصيبه يقعدوا تاني

•          التاني قال ليهو منو ديل البقعدوا ؟

•          الاول قال ناس مجلسنا ديل

•          التاني قال ليهو تبقي مصيبه جدجد

•          جا واحد تالت عرقو يخرخر

•          الاول قال الخرخار ده اكيد معانا

•          كوركوا ليهو

•          يازول يافرده ياحبه يامننا

•          التالت عاين ليهم وجا طوالي عليهم

•          قال ليهو كيف يافرد يا اهله

•          قالوا ليهوا عرفتنا كيف ؟

•          قال ليهم ناس مترمتلين تحت الحيط امام الاتحاد قاعدين في الضلله جايين لي شنو ماعارفين يعني حايكونوا صفوه !

•          ضحكوا

•          قالوا ليهو ماعرفت المفاجأه ؟

•          قال ليهم عرفتها

•          قالوا ليهو شنو ؟

•          قال ليهم خليفه واسامه التهاون ماحايتشطبوا لعدم الفكه البدوها للبديل

•          عاينوا لي بعض وقالوا ممكن تكون دي المفاجأه

•          وقال ليهم في مفاجأه تاني

•          قالوا ليهو شنو ؟

•          قال ليهم استادنا احتمال يجيروهوا

•          الاول قال امس حلمان جمال الوالي قاعد في مقصورتنا

•          التاني قاطعوا وقال ليهو ماكان تصحينا ننضف المقصوره بدل الاحراج ده

•          الاول قال ليهو ولابس شال ابيض في طرفوا في هلال كبييييييير

•          التاني قال يجوز000 زيارة المقابر جائزه

•          الاول قال ونحنا نكورك ياريس 0000 ياريس

•          التالت قال دي المصيبه

•          قالوا ليهو ليييييييه ؟

•          قال يكون اشتري استادنا

سلك كهربا

                    الحلم بجي في النوم والقلم مرفوع عن النائم

والي لقاء

سلك