أصل الحكاية
حد يقولي إيه اللي بيحصل في المريخ ، نفسي والله العظيم أعرف النادي ده ماشي إزاي ، لو أخدنا مشكلة العم عصام الحضري وهو بيطلع علينا كل يوم بتصريح شكل عن أزمته مع مجلس إدارة النادي ، وهي زي ما إحنا عارفين أزمة مالية ، ( فلوسي تلات شهور ماختش مرتبي ، ده أنا صبرت وضحيت علشان المريخ وجماهيره اللي وقفت معايا وساندتني ، لكن المجلس ماإحترمنيش وأن مش جاهز نفسيا للعب والتدريب مع الفريق علشان كده زي مادخلنا بالمعروف خلونا نطلع بالمعروف ) إنتهي .. ياخبر إيه ده مين ده ؟ ده الحضري ياباشا إنت نسيت ولا إيه ده عمهم وعم عمهم وعم أبوها وأمهم ، حد يقدر يقوله إنت بتقول إيه ولا بتعمل في إيه ؟ .
مافيش ياعم ده بيقولك المجلس طلع قرار أول أمبارح حذره مايعملش أي تصريحات لوسائل الإعلام ، قالك إيه ، قال للراجل اللي عايز يسلموا القرار ، إرجع بيه من مطرح ماجيت ، ده أنا الحضري مافيش حد يعمل معايا كده .
بس المشكلة مش في الحضري ، والكلام ده أن بقول فيه من بداية حكاية دفع الغرامة للنادي الأهلي والكدب الكتير الإتقال فيها ، وماظهرتش حقيقتها كاملة إلا بعد ماقلهم في المرة الأولي إنتو ولا حاجة ومش ح أرجع ومافيش حد يقدر يفرض علي شروط وأنا اللي عايز فلوس وح أشتكيكم للفيفا ، وظهرت وقتها فضيحة الإتفاق الشفهي وكلمة الرجال في تعاقدات الإحتراف وشهادة البدري والقصص اللي ضحكت علينا خلق الله .
المشكلة في مجلس الإدارة في المشكلة الأولي ذلة وإهانة ومرمطة ، وفي المشكلة التانية ذلة ومهانة ومرمطة ، ولاحد يقدر يقول كلمة طالما السيد قرر ، يبقي كمل الكلام ، لاعب ، حتة لاعب لاراح ولاجاء حاطط رجل علي رجل يأ مر ويحدد يعمل إيه ومايعملش إيه ، علي إيه مافيش حد عارف ، والمجلس المنهار مش قادر يعمل أي حاجة ولا ياخد أي قرار في موضوع مش عايز خبير ، كل اللي عايزه قوة في الشخصية وقدرة علي إتخاذ القرار .
ياعم ده أنت لو رحت عند أقرب محكمة وسألت يعني إيه العقد شريعة المتعاقدين حا تلقي عشرين واحد يشرحلك ، كلنا عارفين والمجلس قبلنا عارف ، والحضري يعرف قبل الجميع إن راتبه اللي وقع عليه في عقد مع نادي المريخ ( خمسة ألف دولار في الشهر) ، يبقي بالورقة والقلم له عند المريخ (15ألف دولار ) راتب تلاتة أشهر حسب تصريحاته ، ياخدها علي الجزمة القديمة ، أما لو هو عايز (60 ألف دولار) حسب إتفاقه مع جمال الوالي إنه ياخد (20 ألف دولار) علي كل شهر ، يعني ( 15 ألف دولار) بره العقد ، يقولو لوا روح لجمال يديلك بقية المبلغ ، إحنا اللي بينا العقد وبس وحا نلتزم بيه بالكامل ، وإنت حا تلتزم بإنك تلتزم وتواصل مع الفريق لغاية ماينتهي عقدك ، المجلس اللي يقول كده يكون مجلس قوي عارف اللي ليه واللي عليه .
بالبلدي كده الحضري مالوش حاجة عند المريخ غير الفلوس اللي في عقده ، مش عاجبه ومش حايواصل المريخ يقدر يمرمطه مع الفيفا بالقانون ، ومافيش حاجة إسمها زي مادخلنا بالمعروف نخرج بالمعروف ، ده كلام يتقال في جواز ياعمهم مش في شغل ، ده عقد عمل والعقد قلنا إييييييه ؟ شريعة المتعاقدين . بس مين اللي يقدر يعمل كده؟ المجلس ده ؟ ماأظنش.
hassan faroog [hassanfaroog@hotmail.com]
