سلكشن

بسم الله الرحمن الرحيم

تسجيلات

•       البلد كلها تسجيلات

•       الناس غير التسجيلات ماعندها كلام

•       تسجيلات الاراضي فيها تخفيض

•       تسجيل الجامعات يادوب انتهي ( تسجيل الجامعات والمدارس ده داير ليهو رجعه )

•       تسجيلات الكوره قربت

•       وجاتنا تسجيلات الانتخابات

•       مشينا كلنا آخر يوم للتسجيل كعادتنا في اي شئ

•       طبعا نحن بنجير البيت بعد يذيعوا العيد , وبنكوي التوب بعد الشفع يجيبوا الركشه , وبنعلن وفاة الزول بعد ننضف البيت كويس , والزول بكون محتضر شهر ومتوقع لكن ما بنرتب حال البيت الا بعد الوفاه ومابنرسل للكفن والريحه الا بعد ننضف البيت 0

•       زمااان لما كان في بصات مابنركب البص الا بعد البص يتحرك , ونحنا جوه البص عارفين روحنا نازلين المحطه الجايه ما بتحرك من المقعد علي باب البص الابعد البص يقيف في المحطه ويتحرك حتي نكورك للكمساري ياولد قول ليهو اقيف 0

•       نحنا دايما بنجي متأخرين , في الولاده دي بنتولد بعد امهاتنا يقربن يدخلن في العاشر 0

•       المهم مشينا سجلنا في سجل الناخبين وادونا بطاقه مغلفه فيها الاسم وفيها رقم متسلسل

•       حقيقة بدت فوائد الديمقراطيه تبدو علي الشعب منذ لحظه التسجيل , فستات الشاي كان موسما لهن جعلهن من اكثر فئات الشعب حبا للديمقراطيه واول الفئات استفادة منها

•       بعد ستات الشاي كانت فئه الباعه المتجولين هي المستفيد الثاني وباعه السجاير والصعوط , ثم سائقي الركشات وديل شدة ما اشتغلوا بعد يركب معاهم زول الركشه براها بتمشي للمركز , حفظت الشارع زي حمار سيد اللبن , ثم ناس الامجادات , اما ناس الحافلات فديل شعب اي حكومه في حفله بشتغلوا شايلين ساوند بشتغلوا مودين ناس الساحه الخضراء بشتغلوا و ترحيل موظفين طلاب ناس كوره بشتغلوا وما عندهم قشه مره 0

•       المهم فوائد الديمقراطيه بدت للشعب منذ لحظة التسجيل

•       ونحنا راجعين من التسجيل شله في منتصف الليل فرحانين نتضاحك سااااااااي , قابلنا واحد من ناس حلتنا اسمو رجب , قام قال لينا بتتضاحكوا كده مالكم ؟ قلنا ليهو والله يارجب ماعارفين لكن احتمال عشان سجلنا في سجل الناخبين ,قال لينا تسجيل ولا اعاره ؟ و قال لينا اسي عليك الله السجلوا في المريخ بضحكوا زيكم كده ؟ قلنا ليهو قصدك شنو ؟ يعني نحنا بنضحك علي روحنا ولا شنو ؟ قال لينا اسي بعد سجلتوا ادوكم شنو ؟ انبريت ليهو انا ( انبريت دي حلوه موش ) وقلت ليهو ادوني بطاقه رقمها مميز كمان سته تلاتات وتلاتين تاني , قال لي المشكله انو الارقام المميزه رخصت , قلت ليهو شوف الداير يبيع 0

•       ومشينا منو لكن حاجات كتيره كانت عاجبانب في الممارسه الديمقراطيه , ناس في المراكز قاعدين جمب ست الشاي وحق الشاي ماعندهم لكن عندهم الحق الديمقراطي , واحد منهم قال لست الشاي جيبي واحد شاي احاسبك بعد تنصيب الحكومه الديمقراطيه الجديده والتي سترفع المعاناه عن كاهل الجماهير , ست الشاي قالت ليهو ياتوا جماهير ؟ قال ليها يعني جماهير الفريق القومي ! كبكبي الشاي خلينا نسجل بمزاج انت اظنك ماعارفه قيمة صوتي في المرحله دي , ست الشاي ابتسمت بطرف نخرتها ووعوجت قدومها وقالت ليهو صوت وردي قيمتو كم ياربي ؟

•       الخلاصه سجلنا ولاول مره نسجل بدون رسوم تسجيل

•       الخوف شداد يطلع تسجيلنا غلط

•       يلا الناس السجلوا يحافظوا علي بطاقة الانتخاب ويحافظوا علي اصواتهم ما تبقي مبحوحه يوم الحفله الكبييييييييييييييييييييييره

سلكتد

            المهم سجلنا

والي لقاء

سلك