أصل الحكاية
لما تقول لي واحد إنت (عدو) ، ده تصنيف واضح ومباشر ، ممكن ترفضه وماتقبله وتحاول تثبت إنك (ماعدو) ، وممكن تاخد موقف وتتعامل بالمثل مع من وضعك في خانة (العدو) ، لكن ماممكن تكون إنت (عدو) وعارف إنك (عدو) وتعمل فيها صديق ، مش كده وبس وصاحب حق كمان، وده الحاصل في الهلال ، أعداءه الحقيقيين لابسين توب صاحب الحق ، وديل صوتهم عالي ، وطبعا معروف لينا كلنا، إنه البرميل الفاضي صوته دائما عالي .
الهلال لاعب بكره مع أهلي شندي في مباراة الصعود لدور الأربعة بالكنفدرالية ، وهي مباراة صعبة ومهمة ، ومابتقبل القسمة إلا علي الصعود ، لأن الخسارة تعني الإنتظار حتي مباراة المريخ الأخيرة في المجموعة ، نقرأ ونتابع ونسمع ونشوف موقف أعداء الهلال الحقيقيين من المباراة ومشوار الفريق المحلي والأفريقي .
الجماعة ديل زي ماقلت قبل كده ، بقدموا أنفسهم بغباء من يفترض في نفسه الذكاء .
ممكن تختلف مع الإدارة وتطالب بإسقاطها ، وتستخدم كل الأساليب القانونية، وغير القانونية عشان تصل لهدفك ، وده الحاصل وواضح من خلال أساليب أعداء الهلال في الصراع الدائر، والنوعية دي من الصراعات لو وقفت لغاية هنا، ممكن نقول عليها (صراع من أجل السلطة) ، لكن عندما يخرج من صراع السلطة لتدمير فريق الكرة هنا إنت (عدو) النادي والفريق والهلال الكيان ، وده الحاصل.
هم عاملين زي السوس ينخر في جسد الفريق بالأكاذيب وفبركة الأخبار ، وإطلاق الإتهامات ، وتصنيف اللاعبين ، والتشكيك في ولاء بعضهم بإيحاءات حقيرة ، ووصفهم بالفشل ، ووضع علامات إستفهام خبيثة حول مستويات بعضهم ، والسخرية منهم ، ولم يسلم منهم المدرب ، ويصل الغباء مع غارزيتو مرحلة إتهموه فيها إنه يتعمد خسارة الهلال عشان يثبت إنه هيثم (غير صالح للعب)، وطبعا غارزيتو مامحتاج إثبات سؤ نيته أو حسن نيته ، لأنه أثبت عمليا متين ممكن هيثم يلعب ، ومتين يقعد إحتياطي ، ومتين يكون بره التشكيلة .
أعداء الهلال الحقيقيين يقوموا بكل هذه الأدوار من أجل إضعاف الفريق وتحطيمه وتدميره ، خدمة لأجندة رخصية معروف منو الواقف وراها ، زي مامعروف هم منو؟ وبشتغلوا كيف ؟ وعشان شنو؟ .
ولانهم عارفين إنهم مكشوفين ، وعارفين إنه شعب الهلال فاهم وعارف ويقرأ التاريخ جيدا ، ويعيش الحاضر بوعي ، يجتهدوا في تغيير جلودهم سريعا عند إقتراب الفريق من أداء مباراة أي مباراة ، في الدوري المحلي أو البطولة الافريقية ، وهنا يرتفع صوت البرميل الفاضي ، ويسبب كتير من الضجيج والإزعاج ، ويبدأ الحديث عن المباراة والفريق ، وكلنا مع الفريق ( يرتفع الصوت أكثر) ، كلنا خلف الفريق ( يصل هنا مرحلة الصراخ) ، ثقتنا في اللاعبين كبيرة ( يضيع هنا الصوت) ، لانه كذب ، ولأنه كلام الكضاب ظاااااااهر .
ياخي ديل مستوي السذاجة والتسطيح عندهم وصل مرحلة متأخرة ، لدرجة أنهم بكشفوا نواياهم السوداء تجاه الفريق ومسيرته بغباء لاتستطيع وصفه ، ودي بنلاحظها بقوة لما يكون الحديث عن تأثير المعارك والصراعات علي الفريق ومسيرته في الدوري والبطولة الأفريقية ، تاتي الإجابة السريعة منهم (لاتؤثر والهلال معروف في كل صراعاته وأزماته الفريق لايتاثر) ، الماقالوهو بغباء مابسؤ نية إنه الفريق مابتأثر لأنه الخراب ماكان بصل الفريق، والدليل أنه كل المعارضين لصلاح إدريس كانوا مجمعين علي الفريق وحريصين عليهو أكتر من صلاح إدريس ، وبالعكس كان جزء كبير من مواقفهم ضد الراجل إنه بفجر صراعاته في توقيت الفريق بكون محتاج للأستقرار والتقدم افريقيا ومحليا ، مافي زول في فترة صلاح إدريس ، وقف ضد الفريق ولا لاعبي الفريق ولا ضد مدرب أحضره صلاح إدريس ، لا إداري معارض ولا ناقد معارض ، بالعربي لايوجد نهائيا في فترة شخص أو مجموعة إستهدفوا إضعاف الفريق وتدميره.
ده الفرق ، وهنا يظهر من هم اعداء الهلال ؟ وهم اعداء الهلال الحقيقيين.
hassan faroog [hassanfaroog@hotmail.com]