أقوال مأثورة وأقوال ماسورة

* هو البقولوا الناس شوية

* الناس غير النقة ما عندها شغلة

* في بيت البكا تلقى النسوان يتشمرن بين الدموع

* إنتي يا أختي زولتك راجلها لقى شنو أصلو مخمخمة بالدهب كدي ؟

* دهب شنو يا يمة والله تلقيه صفر ساااااكت

* غايتو ناس أبو مرين بالغوا، دهب الهتش ده جابوهو منقوش التقول بحريني

* بعد شوية تلقاهن استغفرن

* وتاني يبدن شمار جديد

* الرجال في الصيوان الشمار ما بخلوه

* والغريبة الكضب

* واحد خالف رجلو عشان الشبشب يظهر

* والخاتم قدر الكتلة

* والعمة منسوجة فتلة فتلة

* والعربية بالقسط

* يتني رقبتو ويقول ليك والله المرحوم كان صبر شوية كان ارتاح

* واحد تاني يسأل … ارتاح كيف ؟

* الأول في الحقيقة أنا كلمت ليهو جمال (طبعاً ما بقول جمال الوالي) بقول جمال عشان يوري الناس أنو البساط أحمدي وجيمي فردتو

* المهم يواصل .. وجمال وعدني أنو يسفرو بره للعلاج .. والله قبل يصلني خبر الوفاة ده جمال ضرب لي وقال لي جيب جواز زولك .. جيتو جري (يصمت) لكن للأسف من باب الشارع لاقيت روحو طالعة …

* يبكي … يمسح وجهه بالعمة .. يظهر على العمة .. أثر ( ماسكرا) كان جاري بيها الشنب لزوم الوجاهة والصغرة

* ماسكرة دي طبعاً حاجة بتاعت نسوان بعملن بيها الرموش عشان يقيفن لمبة

* طبعاً المساواة بين الرجل والمرأة ما عاد معاها بتاعة نسوان وبتاعة رجال

* المهم يكضب كضبو ويسرق الأنظار والألباب

* ود المرحوم بسمع في القصة نسى المرحوم وسرح خيالو في خالو

* أكيد الخال بعد الفراش حايكلم جمال يشغل ود المرحوم

* والولد سرح

* واحد جا عديل قاصد الولد قال ليهو الفاتحة

* ود المرحوم لا بسمع لا بشوف .. سارح ياربي ببقى مدير أفراس ؟ ولا مدير الاستاد

* كمال دحية نط ..

* ما تخاف ياكيمو خال ود المرحوم (بقشر) ساي

* والله يا كمال ماتخاف … ود مرحوم شنو البقعد في كرسيك

* يا دحية … اثبت البطبطة شنو

* المهم الناس (تنق) وتكضب و (تشمر) في الفارغة

* نقة شديدة جداً

* ده حالتو ربك رب الخير جاد على كل مخلوق بلسان واحد

* يعني لو أي زول أدوهو لسانين أو تلاتة الكلمات المتقاطعة كان اتقاطعت في (خشوم) الناس

* المهم من النقة الكتيرة دي بتلقى في أقوأل مأثورة وأقوال منثورة وأقوال ماسورة وأقوال مأسورة

* الأقوال المأثورة زي الحكم والمواعظ

* والأقوال المنثورة هي الهضربة الساي بدون فهم

* زي زول يقول ليك وارقو ماعندو شئ

* وهي أقوال يقصد قائلها أن ينثرها لزوم الانتشار

* وزي كلام صاحبنا خال ود المرحوم

* أما الأقوال الماسورة فهي كتيرة في هذا الزمان

* زي يقول ليك الهلال جايب مهاجم أوربي

* أو يقول ليك أمولادي كان نجم المباراة

* أو يقول ليك الجوهري قال الهلال قريب من كاس أفريقيا

* أو تسمع أن الزريبة تسير إجراءات الصيانة فيها على قدم وساق

* ساق العربية ولا ساق بالسا ؟

* ساق النعام

* أما الأقوال المأسورة فهي الأقوال التي لا تستطيع أن تخرجها وتجعلها حبيسة الصدر

* مثل هلالابي يأسر في صدره عبارة (استاد المريخ عالمي) أو استادنا شين

* أو هلالابي يخفي حلمه في تحقيق بطولة جوية

* أو لخويابي يخفي في صدره عدد المواسير التي تملأ الزريبة

* أو تلقاهو داسي مقولة (المريخ بجيب كاس أفريقيا)

* أو وارقوووووووو لعاب

* أو يدس عيونو خلف نظارة لحام

* سنعود بالتفصيل الممل للأقوال المأثورة والمنثورة والماسورة والمأسورة من خلال ماكتب في الصحف الرياضية منذ فترة التسجيلات ومروراً بمعسكر كلمة وحتى لخويا

* بالمناسبة قالوا كورة كلمة كانت درون لكن قون كلمة أبوا يعدوه

* كلمة طلعت ساي … أقوال مدسوسة

* في ألمانيا في طريق بين المزارع تموت فيه الضفاضع تحت عجلات السيارات

* الألمان عملوا نفق للضفاضع تعبر به بين المزارع حتى لاتدوسها العربات

* ونحن نشيل كروجر

* فكينا البرمودى وقعدنا ساي

* في كورة حي العرب المساحة بين دامر والباشا لو شافها وزير الإسكان كان قسمها خطة إسكانية

* الله يجازيك يا بسبوسة … السويتها رقدت

سلك كهربا

أبو برمودة … القطر الشالك أنت يتكسر حتة حتة وتسلم لي أنت

أوكامبو الماسورة

Clerk

بابكر سلك