أصل الحكاية
أنا لو مكان الحضري أرفض أي تقرير يترفع من اللجنة اللي كونها مجلس الإدارة للتحقيق معاه ، ليه بقي ؟ قلتلي وأنا أقولك ليه ، لأن التقرير يابيه ناقص ، ناقص إزاي ياابو المفهومية ؟ لجنة التحقيق اللي بيرأسها مولانا أزهري وداعة الله عضو مجلس الإدارة ومساعد الأمين العام ، إعتمدت في أقوال الشهود علي شخصيات شهادتها مجروحة ، إزاي يافالح ، لو صبرت ح أقولك إزاي ، إتفضل يامعلم ، اللجنة ياسيدي إستدعت رئيس البعثة أسامة الشاذلي و شهادته مجروحة لأنه عضو مجلس إدارة ، وإستدعت عبدالباقي شيخ إدريس وهو موظف في النادي ( المنسق الإعلامي) يبقي إيه شهادته مجروحة ، وإستدعت محمد موسي وهو برضك موظف في النادي (مدير كرة) وشهادته مجروحة ، وإستدعت فيصل العجب قائد الفريق وشهادته مجروحة ، وإستدعت أخيرا موظف في النادي ، وطبعا شهادته مجروحة ، مجروحة إزاي مش فاهم؟ مش دول عندهم مصالح مالية وإدارية مع النادي بحكم الوظيفة أو التعاقد أو الوضع الإداري ؟ آه .. يبقي من حق الحضري التشكيك في أقوالهم ، حقه ولامش حقه ، لا حقه ماهو تحقيق في النهاية ولا إيه ، وكل واحد يدافع عن نفسه بالطريقة اللي شايفها صح .
ماهي برضه كده ماتخشش الدماغ ، هو ح يشكك هم ح يصروا علي أقوالهم وماتنساش ياباشا إنه الأقوال في اللجنة علي اليمين ما أفتكرش أنه حد عاقل ممكن يحلف علي اليمن كدب ، عايز تقول إن اللجنة تطلب من الحضري يحلف هو كمان علي اليمين ، وليه لا ، وإذا رفض وقال مثلا إنه مابيعترفش باللجنة وإنها مش محايدة ، حقه ولا لا ، حقه ونص وخمسه إزاي بقي ، وفي الحالة دي مفروض يحصل إيه؟ تتحل اللجنة وتتكون لجنة محايدة ، من شخصيات رياضية قومية تمثل البلدين الشقيقين ( السودان ومصر) ، والحضري يختار الشخصيات اللي بيثق فيها من مصر والمجلس يختار الشخصيات اللي بيثق فيها من السودان ، والرئيس ح يكون من فين ؟ ودي نقطة مش لازم نغفلها لأنه إيه ، ممكن الموضوع ياباشا يصل لطريق مسدود وكل طرف ينحاز للي معاه ، ومش ح نخلص بقي .
والحل في رأيك إيه ؟ ممكن يكون الرئيس من تونس أو من زامبيا أو أي دولة محايدة لأنه صوت الرئيس لو حصل تصويت علي القرار هو اللي بيرجح الكفة تعرف الكفة ؟ أكيد أعرفها .
وبعدين؟ ولا قبلين ، اللجنة تباشر مهامها من لحظة التكوين ، تبدأ من سفر الحضري للقاهرة وتروح بكامل هيئتها للقاهرة ، وتقابل والدة عصام الحضري وتتأكد من مرضها ، وتراجع الطبيب المعالج ، وتبص علي روشتات الأدوية وتتأكد من التواريخ هل هي نفس التواريخ اللي قالها الحضري قبل مايسافر ويوم ماسافر وفترته في القاهرة وتتابع اللجنة إجراءات سفره من القاهرة لأنغولا .
وبعد ماتكمل التحقيق في القاهرة تحزم اللجنة بكامل هيئتها حقائيبها ، وتغادر الي أنغولا بشرط أن أن تكون المغادرة بخط الطيران الذي غادر به الحضري، علشان إيه ؟ الدقة مهمة برضك ولا إيه ؟ لازم نعرف هو سافر إزاي ووصل إزاي ولا إيه؟
وفي إنغولا بقي يتفتح التحقيق في المطار ولازم اللجنة تتحقق من كل كلمة قالها الحضري وماتسيبش حد ، من الكابتن والمضيفة في الطيارة لغاية أمن المطار والشرطة والموظفين والعاملين لغاية مانوصل للحقيقة .
السؤال بقي بعد ماتكمل اللجنة تحقيقها ح ترفع تقريرها لمين ؟ وده سؤال يابيه حاترفعه لجمال الوالي أكيد ، بصفة إيه ؟ من غير صفة أو هو كده والسلام ، وده معناتو إيه؟ مافيش الحضري براءة والمجلس مدان .. بلا لمة ، قال لجنة تحقيق قال.
hassan faroog [hassanfaroog@hotmail.com]
///////////
