زول ظريف اسمو معروف اوشى كتب في موقع سودان بورد ما يلي:
اومبارح بقرأ في مدونة مشهورة بالحكايات الغريبة والحاجات المرعبة
اها في موضوع عن حيوان الشيب اللي هو بضبح الخرفان والغنومات وبياكل اخر ضحاياه ويخلي خشم سيدهم ملح ملح!!
في التعليقات على الموضوع في واحد بلدينا سوداني قال الشيب ده عندنا
في السودان اسمو المرفعين، والمصاورة قالو اسمو عندهم السلعوة
يا النبي نوح ما كتا قايل السلعوة ده حقيقي!!
وفي ناس قالو الخواجات يسموهو التشوبوكابرا. وفعلا انا قريت قصص وشفت افلام واعمال فنية تناولت الموضوع. العجيب شكل الحيوان في كل مكان تقريبا واحد!!
في ناس بقولو الحيوان ده نتاج انو ذيب اتزاوج مع ضبعة.. يا لطيف في حد عاقل يتزوج ضبعة؟! يلا حكمة الله
وفي ناس بقولوا الكلام ده غير ممكن علميا لاختلاف عدد الكرومسومات في الضباع والديابة، وبقولو انو الحيوان ده نتاج تزاوج ذيب مع كلبة. لانو عدد الكرومسومات هنا متشابه
اتو في زول شاف المرفعين ده ولا عندو ليهو صورة نشوفو للزمان؟!!
ميلحوزة. في الموضوع بتاع المدونة كانوا خاتين فيديو سوفاااج وفضيع يا قولة مسز اسحان، خوفتا علي محاسيسكون المورهفة وابيت ما اجيبو ليكون!! سلام ياخي
صاحبو البردان علق بما يلي : انتا اقعد باري لي المرافعين لما الطيارة تفوتك!! بالنسبة لعرس الضبعة فواحد صحبي معرس ضبعة!!
واحد تاني علق بما يلي : المرفعين هو الضبع وهو نوعين المرقط والمخطط!!
أوردت صحيفة السوداني ما يلي: وثق مقطع فيديو جانباً من جلسة محاكمة رموز النظام السابق المتهمين في تنفيذ انقلاب 30 يونيو 1989، ظهر فيها أحد رموز النظام السابق، يرد على القاضي باجابة مثيرة للدهشة والاستغراب عند سؤاله عن اسمه، وكان القاضي قد سأل اللواء طبيب “الطيب ابراهيم محمد خير”، عن اسمه فأجابه برد مثير للدهشة، قائلاً اسمي (ابو تاجا مرفعين الليل هجام الدهاليق)! يُذكر أن « تاجا» إحدى بناته التي ولدها خلال عمله بدارفور، وقد أسماها تيمناً بـ أخت السلطان “علي دينار”، وفق مقابلة أجريت معه في العام 2014.
تعليق من عندنا:
مثل هذا الرد أمام المحكمة من قبل المتهم الطيب ابراهيم المشهور بالطيب سيخة يعتبر جريمة اهانة محكمة ويستوجب محاكمة وادانة وعقوبة لكن ما علينا، خلينا في موضوع الأهم وهو موضوع المرفعين أو الضبع فمن المعروف أن المرفعين يهاجم في الليل وينام مفتوح العينين في النهار، أما الدهاليق لمن لا يعرف معناها فهي الدهاليك والتي تعني آكام أو تلال سوداء معروفة في بلاد العرب والله أعلم!!!!
menfaszo1@gmail.com
////////////////////
