انا وجمال الوالي وهيفاء وهبي

بسم الله الرحمن الرحيم

 

في السلك

 

 

 

·        منتهي الجمال يا جمال

·        استاد يشرف البلد

·        بلد شنو يشرف افريقيا كلها

·        بل يشرف الفيفا زاتها

·        الحدث كبير

·        الزعيم يستضيف مصر المؤمنه قلعة الفراعنه وجزائر المليون

·        ناس عبدالقادر الجزائري

·        ياناس الحدث جلل

·        كل القنوات الفضائيه ستنقل الحدث

·        ليس فقط داخل الاستاد

·        بل وخارجه , ومن الطرق المؤديه اليه

·        لذلك علي محافظة امدرمان يقع دور عظيم

·        كل الشوارع يجب ان تراجع وبالذات الشارع الذي يؤدي لمقصورة الرد كاسيل

·        يحتاج الي سفلته وصيانه سريعه

·        كل المساحات والساحات حول الاستاد يجب ان تضاء وتتزين لتشبه الحدث العظيم

·        المضمار لا ينفع فيه فرش الرمله وتراب الردميه

·        معالجات بقدر الحدث

·        الفضائيات ستنقل الحدث من كل امدرمان

·        انارة شارع العرضه ضروريه

·        العالم سيتفرج علي الهواء مباشرة

·        لابد من نظرات انيقه وبصمات رائعه روعه السودان مشرقه اشراق الزعيم

·        حدث مكسب لذلك لابد ان نكسب احترام العالم ودهشة الكون

·        استاد طوابقو ظريفه اضاءه نضيفه بمواصفات الفيفا

·        الحكومه المصريه قررت ارسال طائرات من ضمنها طائره تقل الفنانين

·        يعني الشافنا انا وجمال الوالي وهيفاء وهبي قاعدين في المقصوره في الصف الاول ماكضب

·        جمال مبارك ابن الرئيس المصري يقعد معانا

·        وورانا عادل امام وشيرين وليلي علوي ونميري شلبي

·        ياسر المنا واسماعيل حسن وابو شيبه عشان بحبوا الهدوء يموتوا ركن

·        حسن بسبوسه طبعا بتمسكو  ام هله هله مابقدر يقعد محل واحد

·        مره يخمس الكرسي مع عادل امام جمب ناس ليلي علوي

·        ومره يجي يضايقني في عيشتي جمب هيفاء وهبي

·        ومره يسألني

·        القاعد هنااااك جمب وحيد سيف ده منو ياسلك ؟

·        اقول ليهو ده يكون الرشيد حاحا ؟

·        يقول لي حاحة شنو البقعد هنا 000 عاين كويس

·        اقول ليهو يكون خالد عزالدين ؟

·        بسبوسه يقول لي يا سلك الليله مالك مابتجمع , خالد شنو  وعزالدين منو  البقعد مقصوره فيها كل الفن المصري 000 الزول الورا دااااك جمب وحيد سيف

·        اقول ليهو يا بسبوسه انت طششت , بترجف مالك ؟ ده وحيد سيف براهو لكن سمن

·        وحيد سيف يلاحظ لحسن بسبوسه بتكلم عنو

·        بس وحيد يجي جاري ويقيف جمب بسبوسه ويقول ليهو 00 الله مييييييين ! يونس شلبي ! تعال في حضني ياحبيبي

·        وبسبوسه غاطس في احضان وحيد سيف واضانو معاي وعينو غايتو يامع جمال الوالي يامع هيفاء وهبي

·        مابقدر اجزم

·        مزمل وكورينا وعبد الباقي واحمد محمد احمد وجعفر سليمان وود الشريف وابو بكر عابدين  يقعدوا جمب بعثة الازهر الشريف

·        معاويه الجاك وعبد الكريم قاسم وابراهيم عبد الرحيم يقعدوا في الجانبيه عشان المشاكل

·        بدر الدين الفاتح وابراهيم عبدالله يقعدوا مقصوره ورانا انا والوالي وهيفاء وهبي طوالي عشان هادئين

·        مفخره ومقدره ومريخ عالمي حلا وحلا

·        تقول لي يلعبوا في الزريبه ! لاعبين صفرجت ولا سيجه !

·        لو الجزائر ومصر لعبوا في عابدين الاتنين بطيروا

·        حتانه طوالي

·        واحد منهم قال لي نحنا بنشجع الجزائر

·        قلت ليهو اول يوم اشوف لي زول بشجع زول وهو شارد من الزول سنه مامشي لعب كورة الرد

·        ياناس خارج الاستاد والشوارع المؤديه للاستاد والمضمار يجب مراجعتها فورا

·        لابد وان تكتمل الصوره

·        اها نرجع للقعاد في الاستاد

·        قعدنا ناس عادل امام وهيفاء وهبي وشيرين

·        ناس شجرابي وقسم خالد يقعدوا وييييييييييين ؟

·        قال يلعبوا في استادنا قال

·        تحسبوا لعب اظنكم

·        المهم نقعد في المقصوره

·        همد يرجع مع ناس مزمل وناس الازهر

·        المهم تقوم هيفاء تقول لي يا سلك ( بتسكين اللام ) جبتوا الطابئ ( الطابق ) التاني الحلو ده من فين ؟

·        اقول ليها من فين ساااي

·        وبس حسن بسبوسه يشب لي في حلقي قالت شنو ؟

·        قالوا حايشجعوا الجزائر

·        المفروض تشجعوا مصر عشان ترد ليكم اعتباركم مع الجزائريين ديل

·        ديل ياهم زاتهم الناس الشردتوا منهم

·        ومصر لما تنزل الميدان وحيد سيف يشيل طرحة هيفاء ( اذا جابتها معها ) ويربطها في نصو

·        عادل امام يطلع الطبله

·        والربه تبدا

·        دي موش كوره

·        دي مزيكه

·        وارقص

·        ياحضري

·        المصريين اهم

·        ويردوا عليهم احفاد عبدالقادر الجزائري

·        ونحنا نتفرج

·        بنحكي ليكم بعد الكوره

·        الداير يتفرج يستحمي ويجي

·        ماتحرجونا مع الضيوف

·        وبس هيفاء تقوم

·        تصلح فستانها وتقعد تاني

·        والقنوات تنقل شنو وتخلي شنو

·        انا والوالي وهيفاء وهبي

·        في الصف الاول

·        والمامصدق يشتري ديجيتال يوم 18 وكرت ويشغلوا

·        كل التمنيات ان يقدم المنتخبان المصري والجزائري عرضا جميلا يشبه الملعب الذي يلعبون عليه

·        شوبير امس في الحياه قال طبعا الفيفا وافقت علي ملعب المريخ لان ملعب المريخ يوافق المواصفات العالمييييييييه

·        مووووووووووووووتووووووووووووا

·        موتو دي بتشبه موبوتو

·        غسطنطين

·        قعدتنا فراااجه ؟

سلك كهربا

                    يا الفي الحتانه تعالوا اتفرجوا معانا

والي لقاء

سلك