أصل الحكاية
لو دخلت واحدة من معاينات الشغل المالية البلد بدون فايدة (لانه النتيجة معروفة خلي تلفونك وحانتصل بيك) وسألوك اسئلتهم المامفهوم علاقتها شنو بالوظيفة .. زي ماتكون مقدم لي وظيفة حكومية مثلا ويقولوا ليك شفت كورة الهلال وجزيرة الفيل رايك شنو في قون اتير توماس مادخلها بي يده ؟ وإنت تقول ليهم قون سولي شريف اوفسايد .. يقوموا يقولوا ليك دي حركة يعملها بهاءالدين ستة من الهلال وخمسة من المريخ حداشر قون في كورتين بس؟ تقوم تقول ليهم (شنقة) الحضري شينة ده جابو من وين طولت ماشفت لي حارس معلق في الهواء دي كان بعملوها زمان للحراس زي جرة زمان (عن إذنك) تلعب الكورة وتحصلها باللفة .. وتقول ليهم (شنقة) الحضري ذكرتني حاجات كتيرة خلوها في الكورة زي (غسلوا وكواهو) و(قرشها من النص) و(بيضها) مع إني والله شفت واحد بشبه الحضري كان بلعب مع الاسماعيلي المصري (بيضها) والغريبة من (تقريشه) ..
ياخي ده مرة كان في معاينة لي شغل خاص بالصحة قاموا سألوا واحد جاي من البلد جديد (لنج) كلمنا شوية عن شارابوفا أنقر ماقال ليهم دي البامية أم شرا .. الزول بتاع المعاينة نسي ليك شارابوفا وبطولة التنس إنفعل ووقف علي حيلوا وقال ليهو انت من زمن البامية أم شرا .. البامية أم شرا دي من زمن ناس جدي حي أمشي ولاتخلي تلفونك ولاح نتصل بيك ..
في واحد طلع مخلوع من معاينة سألوا مالك؟ قال ليهم أنا عندي ماجستير في الكيمياء قريت إعلان لي شركة عايزين نفس التخصص بتاعي يازول راجعت المعلومات العندي كلها وأضفت عليها ومشيت للمعاينة .. لقيت صف ما طويل وماقصير المهم إنتظرت وقعدت اراقب في الداخلين والمارقين لقيت الواحد بدخل عادي ويطلع عيونو في نص راسو وكلام غريب بتقال .. بصراحة انا خفت قلت يازول إتخارج بدل البهدلة الشايفها وقبل ماآخد القرار نادوا علي إسمي ..أمك .. قربت أعمل ده ماأنا .. المهم إتوكلت ودخلت لقيت ليك تلاتة قاعدين راجلين ومرة اناقة شديدة والنضارات كيمياء قلت بس ديل ناسي معناها الجماعة الشفتهم دخلوا معاينة غلط ..
المهم قعدت وكتير من الخوف راح .. أول سؤال سألوني ليهو بتعرف الوالي قلت في سري ده سؤال شنو؟ في زول مابعرف الوالي .. رديت سريع .. نعم … المرة ام نضارات صلحت قعدتها وقالت لي أها كلمنا عنو شوية .. برضه ماأخدت فيها حاجة مع إنه السؤال غريب شوية .. قلت ليهم مش ده الحاكم أو المسؤول الاول عن الولاية .. وألاقي ليك فجأة زي الكان هسي مافي حاجة وفجأة برق ورعد ومطر .. الوشوش إتغيرت وفي صوت واحد صرخوا .. نقول ليك الوالي تقول لينا الولاية نحن مالنا ومال الولاية .. بعد داك ماقدرت أجمع وبقيت أقول ليهم ياأخوانا مش انتو قاصدين البظهر في الخريف وكل سنة يقول الولاية أكملت إستعداداتها هذا العام .. خريف شنو يازول شايف بعوض هنا .. نقول ليك الوالي تقول لينا الخريف ..
في النهاية عرفت القصة بايظة وماعندها علاقة بالكيمياء وتعب السنين في المدارس والجامعات والتحضير والدراسات .. لكن قبل ماأطلع أصريت أعرف هم قاصدين شنو .. قالوا لي علاقتك كيف مع الكورة ؟ قلت ليهم زي علاقتي باللغة الصينية .. قالوا لي أمشي .. مشيت .
hassan faroog [hassanfaroog@hotmail.com]