أصل الحكاية
الواحد يتخيل أي حاجة ممكن تموت الا إنك موجود .. ومهما وصلت التلامة وتقلة الدم وكل انواع التبلد الموجودة في الدنيا لكن لغاية الكف الأول وبعدها عينك ماتشوف إلا النور .. قال الحضري ماقال أهان وإستفز واساء بسلوكه لكيان ولأفراد يمثلون المريخ في مجلس الادارة وسافر غصبا عن أنوفهم وعاد غصبا عن أنوفهم من المطار للأستاد ووين؟ في شندي؟ وهم قاعدين لغاية أمبارح ووين ؟ في المقصورة
تتذكروا إداري إسمه عادل أبوجريشة؟ بالمناسبة كل أعضاء مجلس إدارة نادي المريخ لايستحقون شرف أن تذكر أسماءهم في سجلات هذا النادي العظيم .. وعلي كل فرد يحترم نفسه في المريخ عليه أن يتبرأ من هذا المجلس المهان الذي حول المريخ إلي نادي للمرمطة والبهدلة ومن من؟ حارس فاشل يتعرض يوميا لحملات من الاستنكار والاستهجان والسخرية من أبناء جلدته الذين يسخرون في سرهم أيضا من الجهل الإداري عندنا وقد حولنا إلي أضحوكة المنتديات والفضائيات ..
شفتو رصة أعضاء مجلس إدارة نادي المريخ في مقصورة استاد شندي منظرهم يحنن زي القاعدين في بيت بكاء ومنتظرين واحد يجي يشيل عليهم الفاتحة وليه واحد ماالحضري شالها وإنتهي وأعلن الوفاة وتم الدفن بمقابر كفر البطيخ .. شفتوهم؟ واحدين مكتفين وواحدين صارين وعمم وبناطلين وفي واحد ماوقف من شراب الموية بشبه محمد جعفر قريش الراجل ريقه ناشف كل مرة يزعل ويمشي يجيبوهو راجع وفي النهاية بقت مافارقة معاهو الحضري مشي الحضري جاء عرف في النهاية إنه زعل المجلس حده أستاد شندي .. والكلام آخره عند الوالي ..
تمشوا كلكم شندي .. نمشي كلنا شندي .. تشجعوا الحضري .. نشجع الحضري .. تصفقوا ليهو صفقنا ليهو .. ليه؟ ساكت مع إنه ولاكورة واحدة جاتو … ياخي دي كورة لو وقف فيها سفاري حارس مابدخل قون ..
في إداري إسمه عادل ابوجريشة؟ أظن معروف.. طلعت كل شطارته فالح بس في اتحاد الكورة والحكام ولغاية المصريين شغال (قدر ظروفك) .. شفتو هرشة البدري في سيكافا ماخوف من البدري لكن عشان عين الوالي تكرم ألف عين .. أبو جريشة فضحنا مع مجدي عبد الغني قال في واحدة من الفضائيات المصرية .. الحضري (قدر ظروف) المريخ دون أن يطلب أي مبالغ أو يشترط أي شروط .. يعني مفروض يرجع بشروط ولا كيف؟ مجلس بودي معهد سكينة ..
قدر ظروفك .. بوتيك ياأبوجريشة ولانادي؟ عارف بخة الريحة بي كم؟ عارف معلقة الكريم بي كم؟ وياريت تقدير الظروف وقف علي البوتيكات ظروفنا وصلت اللحمة سمعت بي ربع الربع؟ كلنا بنعرف ربع الكيلو لكن (قدر ظروفك) قسمت الربع لي ربع الربع المعروف بإسم (مسكول) .. وده الظرف الإقتصادي الضاغط الذي جعل عبقريتنا تصل إلي حلول مثل (قدر ظروفك)..فماهي الظروف التي يعيشها المريخ وقدرها هذا الحارس الفاشل؟
ممكن تكون الظروف في الإتفاق .. ماهو اصلا المجلس مهان ومتهان .. وقالها من إحتقر المريخ (جمال الوالي ماكان بحلم يسلم علي) وقال (الزمالك خدع المريخ في مبلغ التعاقد) أتفق معه في الأولي ولأنه جمال رئيس فرحان ممكن يكون ماكان بحلم يسلم عليهو وإن كنت لا اتفق معه في الثانية لأنه جمال إتخدع بمزاجه ؟
نرجع للإتفاق ممكن يكون (قدر ظروفك) في كورة أهلي شندي وكورة تانية .. وممكن يكون لغاية نهاية الموسم وفي الحالتين (قدر ظروفك) .. بوتيك ياباشا.
قلنا قبل كده الناس ديل زي مابديروا البلد بديروا الكورة .. الوالي ماعندو فرق من ناس حكومته ناس الحكومة بضغطوا الشعب المسكين ودي بين قوسين مش بقولوا المسكين سكين والوالي بضغط شعب المريخ المسكين وبرضو بين قوسين .. الحكومة لغاية الشعب والاحزاب وبتقيف .. والوالي لغاية شعب المريخ والمعارضة وبقيف .. وهنا ممكن نقول الحضري رئيس مجلس إدارة نادي المريخ .. ياولد انت جيت ؟ أنا هنا .. هنا أهو .
hassan faroog [hassanfaroog@hotmail.com]
