أصل الحكاية
جاهزين ؟ جاهزين ياأستاذ .. بتغلبوا ناس القطن؟ يازول من بدري .. الثقة دي مامخيفة؟ ليه؟ … يعني ده برضه القطن وفريق كبير وعنده وزنه في البطولات الافريقية … نحن برضه فريق كبير وعندنا وزننا في البطولات الافريقية … بيني وبينك كده فريقكم ماياهو زي البامية مامعروف وزنتو وين؟ منو القال ليك ده بتهيأ ليك الهلال زابط ورابط وكله في السليم .. سليم ده برنامج في التلفزيون خلينا في الميدان … في الميدان في البيت في الشارع في المسرح الهلال موية ونور .. ياأخونا الثقة دي بتوديكم في ستين ؟ .. انت بتتكلم عن منو الثقة دي ماألفناها جبناها بي حقنا .. ماعندك حق حقك وين؟ .. حقن تحرسوا ولابيجي حقك تكوسوا وتلقعوا ونحن لعبنا وغلبنا ووصلنا .
في النهاية عملتو شنو؟ دور الثمانية يعني شنو؟ دورالاربعة وبعدين ؟ قول وصلتو النهائي وماشلتو الكأس ولاحاجة زي الطلعتو من التمهيدي .. إنت مسكين ومسكين البدأ يأمل وإنت كل أملك في الأمل وده الفرق بينا نحن ماإنتو وإنتو مانحن عشان كده لا تاريخنا واحد ولاحاضرنا بشبه بعض ..
ده غرور ولاشنو؟ ولاشنو في فرق بين الغرور والواقع إذا كان الوصول لدور الثمانية والاربعة والنهائي زي الخروج من التمهيدي ماكان في فرق كبيرة وفرق صغيرة وده كلام واحد من تلاتة ياحاقد ياحاسد يامالاقي إختار واحد من التلاتة ولو ماقدرت عليك واحد وتقول إجابة رابعة ..
إنت بتهزر ؟ نحن لاحاقدين ولاحاسدين ولامالاقين والمالاقي ده الماعندو أو بيحلم زيكم نحن الحمدلله الجو ده حقنا وكاساتو جبناها .. الجو؟ الجو ده إلا في أركويت .. جو شنو وكأسات مين .. بتتكلم عن المتحف؟ كأس جبتو قبل أكتر من عشرين سنة مفروض يكون في المتحف .. ياخي ده بعمر واحد عمره 22سنة .. إتخيل عمره 22 سنة وماشاف سمع بس؟ .. المصيبة إنتو لاسمع لاشوف .. منو القال ليك نحن سمع وشوف في شنو هسي غير الهلال كم سنة عليك الله وكورتنا ماشة بساق واحدة أحسب ليك ولا مافي داعي يعني حتي الاجيال في العالم من حولنا أفريقي ولاعربي مابعرفو غير الهلال علي الاقل في زيارات متبادلة ماودية؟ رسمية المصريين والتوانسة والجزائريين والمغاربة والنيجيريين والكاميرونيين وقبلهم العاجيين والكنغوليين والجنوب أفريقيين و. و. و.و ديل كلهم بعرفوا الهلال وفيهم ناس حافظين لعيبته زي ماعندنا ناس حافظين لعيبتهم مش كده وبس النقاد في البلدان دي بكتبوا عنه المحللين والمدربين بشرحوهو لاعب لاعب وخط خط من جمعة لغاية سادومبا إنت بتلعب ولاشنو تعال شوف إنتو مافي زول بذكركم إلا تجي السيرة عرضا أو واحد زي عبده قابل عايز يعمل إحصائية يجي الإسم طاشي .. وتجيب نضارة وتبدأ من فوق ومرة من تحت سنة كده … سنة كده .. سنه كده نفسك يتقطع ترجع تاني من البداية مرات تجلي المكان ومرات تقول ياهو ولا ماياهو لغاية ماتلقي سنة 1989 البطل المريخ غبار عديل لو قعدت تنفض فيهو عشرة سنة لقدام مابخلص ..
شفت؟ بطل دي انت بتحلم بيها نحن أبطال أفريقيا .. لاصحح المعلومة إنت بطل كؤوس أفريقيا بطل أفريقيا ده البشيل كأس الاندية أبطال الدوري ماتخلق ليك بطولات من خيالك .. ياسيدي إنت كأس موية من أفريقيا ماعندك عايز تورينا كمان ياتو بطل أفريقيا وبطل الكأس .. لازم تعرف لأنه شكلك مغشوش بالمكتوب في الجرايد بحكاية كاسات جوية وأبطال أفريقيا إنت كنت بطل كأس والكاس البطولة التانية في أي حتة زي كأس السودان وكأس إنجلترا مابتأكل عيش يعني مابتوديك اليابان ولا الأمارات (كأس العالم للأندية) شفت الفرق ياحريف نحن بنحلم بالمستقبل وإنتو حدكم المتحف ..
كدي خلينا من ده كلو أمرقوا من الحفرة القدامكم دي .. ياتو حفرة ؟ الله القطن نسيتو ولاشنو؟ أيواااااا كده ركبت معاي الخط نحن والقطن إنتو وين؟ نحن منتظرين؟ شنو؟ نقعد جنب الحيطة عشان نسمع الزيطة ؟ ده حلم عايزنو يبقي حقيقة وحلم الجعان دائما عيش .
hassan faroog [hassanfaroog@hotmail.com]
