بسم الله الرحمن الرحيم
في السلك
• امس كان يوم من اشنه الايام علي الاطلاق
• كورة شينه
• والاشنه منها التحكيم
• والاشنه من كده الاستاد
• قضبان حديديه بدون كراسي في المساطب الجانبيه
• تحلف تقول في قطر بجي بي جاي
• والاشنه من الحديد ده الكشافات
• سنون السكري
• واحده في
• والتانيه مافي
• لكن
• الشنه القبيحه جدا
• الحائزه علي اشنه شئ في الوجود
• كانت التصرفات الغير مسؤله التي بدرت من الناس البره الاستاد
• الناس الجدعوا الحجاره من خارج الاستاد
• علي الجمهور داخل الاستاد في المدرجات الشعبيه
• مدرجات شعبيه شنو
• الاستاد زاتو زي السوق الشعبي
• المحل العشوائي في السوق الشعبي
• ولان الجماهير داخل الاستاد كانت واعيه كعادتها
• ولماحه
• فقدعرفت بسرعه دواعي تصرف الجماهير الخارج الاستاد
• عرفوا ان الجماهير الخارج الاستاد لم يدفعها علي هذا التصرف الا الفقر والعوذ والعدم
• فقر عوذ عدم
• اختصارها (ف ع ع )
• الجماهير الداخل الاستاد فكرت بي سرعه في حل
• قرروا دعم الجماهير المفلسه الخارج الاستاد
• كل زول من الجمهور الداخل الاستاد لوح بجنيه
• الطقيع وقف
• تأكدت الجماهير الداخل الاستاد من دوافع الجماهير الخارج الاستاد
• قاموا جدعوا ليهم من جوه الاستاد
• كل زول داخل الاستاد جدع جنيه للجماهير الخارج الاستاد
• الجماهير الخارج الاستاد رموا الحجاره
• وسكوا الجنيهات
• واحشاهم شدييييييييييييييييييد
• ولان الاضاءه رديئه
• الجماهير الخارج الاستاد اتطاقشت في جريها وراء الجنيهات الجدعتها الجماهير الداخل الاستاد
• واحد قال لي الجماهير الخارج الاستاد بتطقع ليه ؟ الكلام ده موش عيب منها ؟
• قلت ليهو الحجاره بي قروش ؟
• لو كانت الحجاره بي قروش كان صفقوا
• انشاء الله بكره المحليات تعمل الحجاره بي قروش
• عشان تاني زول يطقع غيرنا مافي
• الجماهير الخارج الاستاد تعاين للحجاره بي عيونها بس
• حجر بي قروش تضمن مافي زول مستحق للزكاه بهبشوا
• انا غايتو لو مكان المحافظ
• اعمل ليكم الحجر اغلي من حجر البطاريه
• عشان تاني حجر الا يحكوا ليكم بيهو
• ايها الناس
• ناس لجان التحقيق
• بالذات اللجنه الما اشتغلت الا بعد كورة كأس السودان
• ماحدث بالامس كارثه
• وفعل شنيع
• بالتأكيد ستتبعه ردة فعل عنيفه
• اذا لم تحسموا وتعاقبوا من فعل ذلك
• مانسمع بيكم تريدون التحقيق في ردة الفعل
• الجهه التي طقعت معروفه
• من خارج الاستاد
• ومن داخل مكان خاص بالذين طقعوا
• نريد التحقيق
• والتدقيق
• والمحاسبه
• ماتطولوا الموضوع ده
• درءا لكوارث ردة الفعل
• تتماطلوا وتجوا تقولوا لينا الاسباب شنو ؟ وليه ؟
• وهل كان عملا منظما
• واسئله يغنيكم عنها ردع التصرف الشين المشين الذي حدث
• منعول ابو الفلس
• المهم
• الجماهير الداخل الاستاد قررت انشاء صندوق زكاه للجماهير الخارج الاستاد
• النفر بجنيه في كل مباراه
• ومصارف الزكاه معروفه
• الفقراء والمساكين والمفلسين والمعدمين
• ومن حكمة مشروعية الزكاه هي علاج المحتاجين علاج نفسي حتي لايقتلهم الحسد علي الناس الذين اعطاهم الله
• لازالة الحقد
• تعالوا تحت الحيط في مبارياتنا
• ولقطوا
• قلنا ليك بيع ياروشا
• عشان مرض الحقد والحسد ما ينتشر
• ويصبح وباء يصعب علاجه
• بيييييييييييع ياراجل
• الدور الجاي الطقعوا ديل بقلعوا
• الحوجه صعبه
• والحسد قاتل
• قاتل الله الفقر
• موش كفايه شنات الاستاد كمان معاها شنات طبع !!!!
سلك كهربا
ننسي كيف والباشا بتفرج في الشغيل والشغيل بتفرج علي الباشا
والي لقاء
سلك
babikir maki [b_silik@hotmail.com]