جمال الصديق الامام
elseddig49@gmail.com
بالدارجي المفهوم كان هناك اجتماع بمجمع الوزارات في بورتسودان جمع رئيس مجلس الوزراء ، و وزير المالية (فكي جبرين ) ومحافظ بنك السودان برعي الصديق ، وممثلين للشركات المصدرة للذهب !!
احتدم النقاش حول من احق الناس بحسن صحابة ( الدهب ) بنك اهل السودان اصحاب الذهب ام شركات الافراد الخاصة و ( العجيبة !!
المحافظ قال للمجتمعين ( جحا اولى بلحم تورو ) لابد من تصدير الذهب عبر بنك السودان فقط !!
جماعة شركات ( الثراء الفاحش ) قالت لابد من صنعاء التصدير عبر الشركات ، وبالمناسبة ( فكي جبرين ) وقف في صف الشركات ضد بنك السودان ولا ندري هل موقف ( فكي جبرين ) المناصر للشركات اتخذه بشخصه ام بصفته كوزير !!
باقي لي الايام دي اصبح في ( فرز كيمان ) في المواقف والقرارات بين الشخص وصفته ، واسألوا خالد الاعيسر الوزير ( السوخوي ) !!
يا ربي ( فكي جبرين ) ده عنده كم شركة بتعمل في تصدير الذهب زي صاحبه بتاع ( المعادن العميقة ) !!
تكالبت المصالح على المحافظ ، ووجد نفسه (ابوذر الغفاري ) في الاجتماع ، وكل الذين يكنزون الذهب والجشع ضده ، بما فيهم وزير ماليته !!
عندما قرأ محافظ بنك السودان المشهد وفطن لما ( يحاك ) قال ليهم
يا جماعة تعالوا نتحاسب !!
انتاج الدهب ده خلال ال (٩) شهور الماضية كان ( ٥٣ ) طن ب ( ٧) مليار دولار !!
وحصيلة الصادر عندكم الان ما تامة مليار !!
وين ويتوا الدهب يا فكي جبرين !!
ثم كانت الصورة الخيالية المرسومة في ذهن المحافظ بعد ان دسّ سؤاله بين صخب الاجتماع هي :
قيام ( فكي جبرين ) بفتح الباب واشار للمحافظ بأن ( اطلع ) من هنا يا زول انت ما عندك ( كرامة ) !!
كيف تحاسبنا ونحن شغالين ليكم في حرب ( الكرامة ) !!
غادر الرجل ( فعلا ) قاعة مجمع الوزارت و بنفس الباب الذي خرج منه برعي الصديق مطروداً سوف تدخل السيدة امنة ميرغني محافظاً ( ساكتاً ) !!
احسن ليك يا استاذة ما تهبشي ذمة (الكرام ) مهما نهبت من اموال الدهب فانهم ( ملائكة ) حرب ( الكرامة ) !!
يعني ( يتفلقنوا ) ليكم ب ( المجان ) ساكت !!
هوي يا أستاذة احسن ليك ( تلبدي ) ساكت عشان ما تلحقي البرعي ود الصديق !!
كمان كان (قليتي الادب ) وراح بك التفكير إلى التشكيك في سعر تكلفة الأشياء فان مصير الباشمهندس عبدالغفار احمد الامين بتاع هيئة الطرق والجسور بلاقيك !!
عبدالغفار ده كان (همه ) الوطن وقال يقلل سعر التكلفة على كاهل ( محمد احمد المسكين ) وقال يحاسب ( اهل الحظوة ) في تكلفة كبري شمبات وقال ليهم ليه كبيرة كده ( ادوني ) ربع المبلغ المذكور ده أنا بسلمكم الكباري كلها تودي إلى ( روما ) وساغ سليم !!
ده ما فتحوا ليهو الباب وقالوا ليهو ( امشي ) !!
الباشمهندس عبدالغفار فتحوا ليهو باب المعتقل وحشروه جوه ( الرك )!!
شوفوا يا ناس البهبش ذمة ناس ( الكرامة ) ديل زول ما عنده ( كرامة ) انهم لا ( ينهبون ) انما باموالكم ( يتعبدون ) !!
اها يا ( بتنا ) امنة بت الميرغني ( قريبة الإعلامي الاسلامي المشهور ) السعيد قالوا يشوف في برعي الصديق ، و من يسي الادب ( يعتقل ) كما الباشمهندس عبدالغفار الامين !!
هؤلاء القوم لا يسرقون انهم يتعبدون !!
جمال الصديق الامام
المحامي ،،،،،،
