noreldenmu@gmail.com
في لحظة لمن تبتسم ليك الظروف..
كانت بداية قصــة في زمن العشم.. دكتور عوض..كان ود مطيع للوالدة وقت الهم يزيد بسمع كلام امو الحنينه (اقرأ) يا ولدي القراية بتنـفعك.. كان ممتحن..قام الفجر صلي الوقت حاضـــر…تلـي الآيات و سوا الباقيات.. ..و صبح علي امو الحبيبه و باس ايديها.. كان مجتهد.. و تعاملو دايما راقي في اجمل خلق..و بشوش.. و هادئ..
فتـح الكتاب .. راجــــع دروسو..باهتمام…. من غير ملــل..كل همو لحظات الحصاد..و اجمل هدية يقدمها.. للصابرة امــو..باحلي احساس يغمـــرا..
فيـض من زغاريد صاخبه.. من نشوة نجاح تحقيق حلم ..اصبح طبيب.. راجي القسم.
يوم القسم حلف اليمين يحمل هموم كل الوطن..يهديهو تاج الصحة في زمن الالم.
الامتياز سنه سابعه طب..هي الاساس..دكتور تعال ..دكتور امـش.
سهران شغل..صلي الوتر قبل الصبح
ليل الحوادث كـان قيــــام..رضي و احترام.. رغم التعب.. و راتب قليــل..كان زول اميــر.
بدفع كتير للمرضي من هذا القليل.. و يا رب رضــاك..
سنه و انتهت..
واجب جديد.. سنه تامنه طب.. الخدمة إحســاس بالغبن.. اكبر مطب..خمسين جنيه.
و الواسطـه حظ …ما دق بابو ..و لا اتصل..
عدت سريع.
كان الصمود..قدم شهاداتو امتحن حاز النجاح ..مبرووك عليك ..نائب جديد.. سنه تاسعه طب.
امو الحنينه بكت كتيـــر..دمع الفرح.. نادت عليو.. (مبرووك عليك..بس كل منــاي ..تصبح عريس..و احننك..و اسيَـرك.
ستْ الحسان. لابسه الزفاف..تملاك امل تملاك حنان.
و انا عمري كم ..ما اصلو زي ساحة بتقل لآمن خـــلااااص تصل الـشبــــر).
بكــي بي احتراق..شنو الخبر يا امي يا نور البصر..انت الامل قصة نجاح..من يوم رحل من دارنا غاب نجم الحنين ابونا فخر الحاضرين..
يا ربي رحماتك عليهو.
يا امي لو بس انتظر اربع سنين اربـع عجاف..ح اكون كبير.. دكتور كبير ..اهدي الشفاء ..و اوصل سريع..كل الضفاف.. و القي العروس..
مرت ليالي و لا جديد..مافي تقدير لي طبيب.. راتبو البسيط..نفس الطريق.. و اتغيرت كل الظروف ظهر الغلاء ..و الاعتداء ..وكــل الظواهر السالبه.. فكر كتير.. و بقرار اخير…نوي للسفــر.
نســي كل حلم .
عز الهجير.. شمس الضياع ..زي واحة لآحت من بعيد.. دكتورة صافيه منوره.. اتصادفوا و حكوا لي بعض. .نفس الهواجس و الارق. .اتعارفوا..و اتآلفوا .و اتشاركوا الهم و الهدف. ..
كانت كمان.. نفس البلان. .خطة سفر ..تحسين وضع ..رد للجميل ..للاسرة و الاهل الحنان.
دكتور عوض..بعد استخار.. قرر قرار..
اقصر طريق بين نقطتين ..خط مستقيم.
قال بي حماس
(دكتوره بس لو تسمحي.. و توافقي بي.
قبل السفر..بصراحة عايز اوصل البيت و اخطبك.سنه بالكتير و اعرسك.)
خجلت شديد..بعد استخارت قالت الرد الاكيد يا مرحبــا.
ابوهـا شاور عمها..و سـأل كتير.
عريس تمام.. و كلو خير..
و ساعة الناس في التعارف و الخطوبة…
.مأذون كبير..
حالآ ظهر….
. كأنو كان تحت السرير…
تم العقد..من غير بذخ.. او حتي صالات ضاجه بكــل السخف..
الف مبروووك يا عريس.. و السيرة كانت للمـطار.
صبحية في البلد الحرام.
مبرووووك عليـــــــــــك.
