من اروع واصدق وانبل كلمات التوثيق للثورة السودانية: اتيام رويال كير نموذجا.

                     *****

الوقت ما وقت حكاوي لسة بدري  شوية
ح نحكي ونونس اولادنا بعد تسقط ان شاء الله

لكن يوم لابد من توثيقه

يوم ١٧ يناير ٢٠١٩

يوم عصيب
مشاعر مختلطة
مابين غبن وحزن لققد مصاب وزميل في نفس الوقت وسرور  بإنقاذ مصابين اخرين

اليوم بدأ عادي بدوام عادي بمستشفى رويال كير .بعد الساعة ٤ عصر وانا ماشي علي عيادة القلب اشوف ناس جارية في اتجاه الطؤاري مشيت اذا بكمية من الناس المصابين داخلين …تيم الطؤاري كعادتهم بدوا بواجباتهم ووزعوا ادوراهم بقيادة د. محمد تومي نائب اختصاصي الطؤاري ودكتور محمد ناجي مدير الطؤاري … المصابين تقريبا في اللحظة ديك ستة كلهم اصابات كبيرة اتنين واعين لحد ما تلاتة اصابات خطيرة فاقدين الوعي …وواحد القلب اتوقف لحظة دخوله وبدينا إنعاش قلبي .
الناس اتقسمت كأتيام كل تيم تولى أمر مريض .. وكنت التيم ليدر لعيان الانعاش القلبي قبل وصول دكتور انس البدوي استشاري القلب.
اول استشاري وصل الطواري
اتصلت  بيهو يابوص الحقنا في الطواري ..
لغى العيادة وفي خلال ثواني وصلنا وتولى أمر القيادة و انعاش كل المرضى.

لحدي هنا نحن ما عارفين اي اسم للناس المصابين اديناهم ارقام بس وبقينا شغالين.
العيان رقم ١ ده الشغالين ليهو انعاش

يلا تعالوا احكي ليكم عننا كشعب ما يستاهل البحصل لينا ده
اول حاجة  من الميدان النقل لينا المصابين دكتور مصطفى  طبيب اسنان وصاحب مركز الأيلتس المعروف  وشارك معانا في الانعاش.

الممرضين كانوا قمة في التفاني والاخلاص
كلهم كانوا في الطؤاري العيان رقم ١ ده ركبوا ليهو كانيولا في اي مكان

د. منتصر مدير المعمل ومهتدي وبقية تيم المعمل كانوا في قمة الجاهزبة
يا منتصر العيان ده ح نديه دم
عايز دم بدون تحضير وماعارفين الفيصلة ح نديهو O_ve ومتوقع الاجابة تكون مافي او في قزازة واحدة لانها فصيلة نادرة لكن في ثواني جاب لي تلاتة قزازت
قال لي ابدأ بي ديل وفي ظرف دقائق ح يجهز دم محضر

تيم الصيادلة ديل كمان حكاية تانية
ياجماعة عايزين هيمي جل ثواني بلقى عندي ١٠ دربات .. ياجماعة عايز   كده ما بتمر ثواني والا لقيتو قدامي … العيان رقم ١ رجع القلب اشتغل الحمد لله
عايزين زول بتاع اشعة تقني الاشعة جابوا موجاتهم وصورهم بتاعة الاشعة .. ياجماعة محتاجين اخصائي اشعة ..دكتورة جنبي بت صغيرة كده  يادكتور  انا د.صفاء  راديولجست (إختصاصي اشعة ) قول عايز شنو.

تعالوا احكي ليكم  اكتر لحظة كانت مؤثرة: 
مستر حاتم البشير استشاري جراحة القلب والصدر كان معانا ومستعد منتظر القلب يشتغل عشان يأخد المصاب علي غرفة العمليات …بدأ يركب في انبوب صدر  ومنفعل ومستعجل ولسة مافينا زول عارف العيان ده اسمو منو .. مستر حاتم يركز في تفاصيل وجه المصاب … ولسان حاله بقول لا لا ده ما هو بكون شبه ساي .. ركب الانبوب وطلع يسأل الزول ده اسمو منو .. قالوا ليهو اخته  دكتورة  اسمها هاجر  برا .. مشى ليها اسمو منو؟ ردت : اسمو بابكر ..طبيب ..ااي … لا حول ولا قوة إلا بالله .. دي الشينة الكان نفسه يكضبها … ده مساعده و الدكتور  الشغال معاه في احمد قاسم … ده الزول الكان معاه الصباح … وانهار دكتور حاتم وبكى ??بحرقة وابكى كل الناس الفي الطؤاري .. وبعدها عرفنا انو ده طبيب واتحول اسمو من العيان رقم ١ لدكتور بابكر

بعد مرور الدقيقة ٢٠ من الإنعاش للمرة الرابعة اوكلوا لي مهمة اهيئ الاسرة واتكلم معاهم .. مشيت ليهم برا … لقيت امه واخته. اخته دكتورة هاجر نائب اختصاصي الطؤاري وزميلتنا بنفس المستشفى.. حسيت لساني معقود تمتمت وهمهمت وغلبني الكلام  استجمعت قواي وقلت ليهم كلمتن ومشيت. بعد اكملنا الزمن المقرر حسب البرتكول  توقفنا عن الانعاش  وكانت من اصعب اللحظات علينا اننا نقيف من إنعاش زميلنا … كان نفسنا نواصل رغم علمنا انه لايجدي .
اتملينا غبن شديييييد  وغضب وحرقة
دسنا على جرحنا الحي النازف
وواصلنا انقاذ المصابين التانين
اغلبهم كانوا محتاجين جراحة
وجراحات مختلفة

مصاب أخر حالته حرجة جدا تم نقله مباشرة الى غرفة العمليات يدعى الفاتح عمر النمير طالب بكلية الهندسة السنة الأخيرة

مصاب اخر حالته حرجة ايضا  إسمه خالد طالب جامعي   شاب سبعة عشر عاما ، اصابات متعددة بالصدر والبطن يحتاج لعملية طارئة

اخدناهم على غرفة العمليات لقينا كل جراحين البلد جاهزين  لبوا النداء . بروف ابن عوف، أبوبكر وداعة ، مستر سيف، حسن زيادة، مستر كمال وغيرهم
ياخ مستر ضرار من المعتقل طوالي جاء علي غرفة العمليات لقيناه لابس وجاهز ..
اتعملت كل العمليات لكل المصابين بأسرع ما يمكن
(والله لو في مايو كلينك ما تتعمل ليهم بالسرعة دي )
((وللعلم  كل الاشياء دي مجانا لا المستشفى اخدت قروش ولافي دكتور اخد قروش ))

جوا اطباء من مختلف المناطق ملبين النداء
جونا صيادلة قالوا نحن جاهزين لأي كمية من أي دواء
مواطنين بسالوا ياجماعة مكان التبرع بالدم وين ؟

الاطباء نواب اختصاصي الطؤاري ديل كمان براهم
اخوي دكتور عبدالقادر حامد ، د. محمد حسن ود.تقي الدين والبقية ديل جوا لقوا عدد الاطباء في رويال كير كويس طوالي وزعوا نفسهم علي باقي المستشفيات اتحركوا طوالي مخاطرين بنفسهم من اجل انقاذ المصابين  .

بعد انتهينا من الواجب المهني
كان منتظرنا واجب تاني
واجب الوطن
الااااف مؤلفة من الشباب بيهتفوا امام المستشفى مباشرة
انا ما ح اتكلم عن الناس هتفت والثورة  و و و

انا داير اتكلم عن مشاهد تانية خالص
الشارع كلو طبعا مقفول بالناس
لمن يجي مريض بعربية جاي المستشفى او اسعاف الناس بتفتح ليهو الشارع من هناك لحدي ما يدخل المستشفى ..
سكان بري ?اي زول شال العنو وجاء مارق الشايل سندوتشات الشائل موية ،عصير، فطائر، ياخ التحلية جابوها ..
المطاعم القريبة كلهم جابوا سندوتشات … ياخ فلنكوش بتاع البوش جاب طشاتة كبييييرة ملاها بوش ووزعها للناس …
في ناس جوا من بحري وشرق النيل وامدرمان  واي زول جاي شائل معاهو حاجة
كان في تاتشر جيش حارس بنك فيصل الثوار جابوا ليهم الاكل والموية والشأي وونسوهم عديل

من المناظر الجميلة برضو الثوار نضفوا المنطقة حوالين المستشفى و الشارع ولموا قوارير الموية وباقي الاكل

ويجوا يقولوا ليك ديل مخربين ومارقين

رغم انو الدنيا ليل وزحمة والناس كتيرة لكن
ماسمعت زول قال انا اتسرقت مني حاجة
ما سمعت بت قالت في ولد اتحرش بي
ما شفت اي تصرف غلط من اي زول لاصغير ولا كبير
الناس كلها كانت على درجة عالية جدا من الرقي والوعي

ياخ الساعة ٤ صباحا لمن جوا ناس الشرطة وضربوا بمبان عدد كبير جدا من الثوار دخلوا المستشفى لمن ضاقت بيهم .. والله مافيهم زول هبش او خرب حاجة … تقول لي مخربين

اسي عليك الله المخرب منو

عموما نرجع ونقول:
الناس الطلعوا ديل شباب سقفهم اعلى من توفير خبز وجاز  ديل بحلموا بوطن حقيقي.

فمافي حل بعد ده غير
#تسقط_بس
#يانجيب_حقهم_يانموت_زيهم

#اعتصام_رويال_كير

#رحم_الله_بلدا_كان_وطن

د. حسن الزين
الثورة مستمرة

الكاتب

طارق الجزولي