نوالي بنغالي

In the name of God, mercy.

 

In the wire.

 

 

 

•        امس جيت ماشي في الشارع لاقيت نوالي

•        كان وشو مخطوف واعصابو بايظه

•        سلمت عليهو

•        قلت ليهو مالك يا نوالي ؟

•        قال لي خايف

•        قلت ليهو من شنو ؟

•        قال لي من الوالي

•        قلت ليهو غريبه ! في زول بخاف من حبيبو ؟

•        قال لي اليومين دي الوالي جنو اجانب اجانب

•        قلت ليهو والبخوفك شنو ؟

•        قال لي يمكن تطلع في راسو ويجيب نوالي بنغالي

•        قلت ليهو وافرض

•        قال لي افرض كيف ! وانا امشي وين

•        قلت ليهو نوالي بنغالي بكون رخيص جدا

•        تديهو مية دولار يهتف الليل والنهار

•        قال لي ده المجنني

•        قلت ليهو تعرف يانوالي موضوعك ذكرني صاحبي ياسر بشتنه

•        قال لي مالو ؟

•        قلت ليهو ياسر بشتنه جاب كديسه من كندا 

•        الكديسه بتحب اللبن

•        قام بشتنه جاب بقره من هولندا

•        يحلبوها للكديسه كل يوم

•        نوالي قال لي كديسه بتشرب لبن بالبقره ؟

•        قلت ليهو كديسه من كندا دايرها تشرب ليك بالكبايه بعد تجيب كلب الليدو ماركة ؟

•        نوالي قال لي الخوف يكون كلب الليدو زاتو اجنبي

•        قلت ليهو المريخ ده عشان يبقي عالمي لازم يتملي اجانب

•        قال ونحنا الوطنييين ؟

•        قلت ليهو فشلتوا يانوالي

•        قال لي وانت موافق ؟

•        قلت ليهو انا شايف ان الطريق للعالميه بمر بالغوص في المحليه

•        قال لي كيف ؟

•        قلت ليهو لو داير تلفت نظر العالم وريهو حاجات ماشافه , تكون حاجاتك انت عشان تدهش العالم

•        قال لي  How?

•        قلت ليهو الوالي لو بحث بجديه في شعب الزعيم بكتشف ان حواء المريخ قد ولدت رجالا ينحني لهم الاجانب اعجابا

•        قال لي انا ماشي

•        قلت ليهو تذكر ان الصفوه لا تستاهل هذا الهوان

•        وان الوالي بما دفعه لا يستاهل هذا الاخفاق

•        وان الجلوس مع النفس في تصافي ومصداقيه بعيدا عن العواطف وردود الافعال يأتي بنتائج تقود الزعيم لمنصات التتويج من جديد

•        قال لي من جديد كيف ؟

•        قلت ليهو سبق للزعيم ان اعتلي منصات التتويج الدوليه , يعني ماغريبه عليهو زي الناس الذين مازالوا يبحثون عن انجاز دولي

•        لو عاد المريخ لمنصات التتويج يبقي الوالي لم يأت بجديد ولكنه حافظ علي الزعيم في المكانه التي اعتلاها سابقا

•        نوالي قال لي تتويج بالبنغاله ؟ 

•        قلت ليهو بالبنغاله بالرتينزات بالكوره تدق في ضهر الزول يقولوا ضربة جزاء بضربة مرمي يقولوا ركنيه  بضربة جزاء تطير تعاد بشتي السبل المهم التتويج الواجع الناس وساكينوا باي طريقه ده 

•        نوالي قال لي الوالي مابدينا فرصه تانيه؟

•        قلت ليهو والله سمعت قالوا في سفينة ركاب داخله بورتسودان فيها تلاته مليون بنغالي

•        نوالي قال لي جايين لي شنو ؟

•        قلت لييهو يا جايباها شركة الخرطوم للنظافه يا جايبهم الوالي

•        قال لي يعني الوالي داير يجيب حتي الجمهور اجنبي ؟

•        ضحكت

•        نوالي قال لي يعني صعنا

•        قلت ليهو صعتوا براكم

•        قال لي كيف ؟

•        قلت ليهو المجلس قاااعد

•        والجمهور قاااااااعد

•        والمريخ باق مابقيت الحياه

•        والوالي قال تاني ما بثق في نوالي

•        قطع ناشف

•        اليومين دي خليهم يقولوا زي ما الناس يقولوا حلاة الرد عليهم لما الناس يطيروا

•        ادوها صنه

 

سلك كهربا

                    الناس الفرحانه راجينكم في الحتانه

والي لقاء

سلك