أصل الحكاية
عايز تشوف كورة .. عايز تعرف قيمتها وكيف الخواجات إتقدموا فيها وبقي عندها قيمة في حياتهم وبتشكل وجدانهم وتفاصيلهم الكبيرة والصغيرة ؟ تابعهم في التشجيع وهم كسبانين وهم خسرانين .. علاقة إحترام في الحالتين .. أي زول بتابع الدوريات الأوروبية من النادر يتذكر مباراة خسر فيها فريق وخرج اللاعبين من غير مايرفعوا أيديهم بتحية للجمهور ونفس الشيء للفريق المنتصر .. والتحية في الحالتين تختلف في المعاني لكن ملخصها (الإحترام) بين الطرفين .. مؤكد إنه ماعالم مثالي وفيهو إنفلاتات وشغب لكن ده الغالب والقاعدة في ثقافة الكورة عندهم ..
قبل يومين شاهدت مباراة في كأس الإتحاد الإنجليزي بين فريق الآرسنال وفريق ليدز يونايتد من أندية الدرجة الأولي مباراة ممكن تتصنف بحجم منافسة زي الكأس وفريق من الممتاز (آرسنال) وفريق من الدرجة الأولي (ليدز يونايتد) إنها مامهمة .. لكن كانت مهمة وأهم حاجة فيها عودة الغزال الاسمر (تيري هنري) لصفوف (القنرز) أو المدفعجية بإعارة لمدة شهرين من فريقه الأمريكي نيويورك ريد بولز ..
عودة نجم كبير وأسطورة من أساطير الكرة في العالم لناديهو البني معاهو مجدو..هنري ماشارك من البداية دخل في الدقيقة 68 والكورة تعادل بدون أهداف بين الفريقين بعد عشرة دقايق في الدقيقة 78 جاب قون المباراة الوحيد ..
أجمل كلام إتقال بعد المباراة قالو مدربه أرسين فينغر .. أرسين قال: ( أعتقد إنه حلم جميل هذه قصة من كرة القدم ستحكي للأطفال عبر الأجيال ونادرا ماتحدث هذه اللحظات السعيدة معنا ولكنها أحيانا تفاجئنا ) .. فينغر ماسكت لغاية هنا لكن حكي عن لحظة دخول الهدف وقال : ( عندما تسلم الكرة قلت في نفسي هيا إنها زاويتك ولكن شككت أنها قريبة من الحارس لكنه كما كان في السابق يستخدم الدقة وليس القوة فهو مازال يتمتع بالحاسة التهديفية الرائعة حاسة هنري .. وواصل وهو بقول : هنري كان أسطورة المدفعجية وعاد من جديد ليضيف بعض السطور المضيئة لقصته وقبل أن يعود كان يعلم أنه سيدخل في مقارنة عما كان عليه من قبل وقد نجح وهكذا يكون الأبطال ) إنتهي ..
صدق فينغر لأنها فعلا قصة ستتناقلها الأجيال جيل بعد جيل … أستاد الامارت (ملعب الأرسنال) مليان علي الآخر كل الجنبات فوق وتحت الشكل إحتفالي.. أغاني لهنري .. لافتات ترحب بيهو وتدعمو .. صور ووجوه لهنري فانيلات بإسم هنري ورقم هنري (12) يعني لو ماعندك معلومة من بدري إنها مباراة تنافسية أول حاجة حاتجي في راسك إنها مباراة إعتزال اللاعب تيري هنري ..
معلق المباراة إتكلم عن هنري أكتر من تعليقه علي المباراة وكان كل لحظة والتانية يسأل فينغر (متي يدخل هنري؟) وكل ما الدقايق تمشي المعلق ينقل ليك إحساس إنه فينغر متآمر في تأخير دخول اللاعب وينقل في نفس الوقت إحساس إنه المباراة ماشة علي خسارة الارسنال لأنه هنري ماموجود .. وحتي بعد ماإشترك واحدة من أمنيات المعلق كانت إنه تنتهي المباراة بالتعادل عشان يشوف ونشوف معاهو هنري في مباراة تانية.
مابعد الهدف كان قصة براها رد الفعل من هنري والجمهور ينفع فيلم تعرضو السينما وتنافس بيهو علي جوائز الأوسكار مشاهد ماممكن تزهج منها أو تملها مخرج المباراة لو سألوني حا أقول إنه في الأصل مخرج سينمائي إختيار مدهش للزوايا ونقل كل تعابير الفرح الفي الدنيا في لقطات بسيطة في عددها وكتيرة في معناها .. ومن هنا بنصح الماشاف الكورة يفتشها خاصة من الدقيقة 78 لغاية ماإنتقلو للأستوديو التحليلي عالم عجيب ودي التلفزة تخليك تعيش المباراة بكل تفاصيلها .
تلاتة لقطات لخصوا كل المعاني الأولي في بعد الهدف وهنري جاري وهو بيصرخ فرحان وباقي اللاعبين جارين وراهو اللقطة (بالبطيء) نظرات حب وفرح وشكر وإعجاب وتقدير كلها إتجمعت في وجوه مشجعين الأرسنال وهو يجري في إتجاههم .. لقطعة تانية صعب التعليق عليها وهنري يقفز محتضن المدرب ارسين فينغر .. لقطة تالتة تعبر عن نفسها بعد نهاية المباراة وهنري يرفع يديه عاليا وعينيه مغمضة في لحظة إرتياح صعب وصفها ..
ودي الكورة بدون تعليق .. بالمناسبة الكورة دي كانت يوم مباراة منتخبنا مع تونس.
hassan faroog [hassanfaroog@hotmail.com]
