بسم الله الرحمن الرحيم
في السلك
• اطل علينا الارباب من خلال زاويته الجماهيريه بالمشاهد
• وكالعاده قدم محاضره لغويه وفلسفيه
• وذكر في تلك الزاويه ان الهلال والاهلي ( كما العينين عندي )
• انا شخصيا ضحكت اعجابا لفلسفة الارباب
• ابو العينين
• واتذكرت قصة الزول الكاجي عينو واحده طوااااالي
• قالوا يوم في زول عندو غرض عند الكاجي عينو
• قدر ماحاول يطلع بي غرضو من الكاجي عينو ماقدر
• شكر قدر ماشكر
• والكاجي عينو عامل اضان الحامل طرشه
• مدح قدر مامدح
• لمح قدر مالمح
• والكاجي عينو ولا كأنو هنا
• رفض رفض بات ان يقضي غرض الزول الجاهو ده
• اخيرا الزول زهج
• ولماقام ماشي اتلفت علي الكاجي عينو وقال ليهو انت كاجي عينك دي مالها ؟
• الكاجي عينو ضحك وقال للزول انت خلاص قنعت ؟ لما تملوا الفاتحه دي بفتح ليكم المقفوله
• اها
• الارباب قال الهلال والاهلي زي عيونو الاتنين
• قبلانين يا ارباب
• وعارفينهم عيونك يافرده
• لكن كاجي واحده ليه ؟
• وكاجيها لي متين ؟
• اها
• وبرضو قريت قون
• وبرضو ضحكت جدا للرائع رمضان
• تحدث رمضان واخبرنا بان خبير التحكيم الطاهر محمد عثمان حايورينا اليوم (امس ) في القناه اخطاء خالد الحكم التي صاحبت اللقاء
• وقال مامعناه ان الخبير حايورينا كم ركلة جزاء للهلال لم يحتسبها الحكم نتيجة عرقله او استلام للكره باليد او ابعادها باليد داخل الصندوق خاصه في الجزء الاخير من المباراه
• وحتي في المخالفات العاديه تجاهل دفع وعرقلة مهاجم الاهلي للاعب سامي عبدالله داخل صندوق الهلال
• يارمضان اسي انت وريتنا الكلام الجاي يقولوا الطاهر كلو ,
• الطاهر تاني جاي يقول شنو ؟
• وبعدين قون دي غريبه جدا
• الكوره مباشر تجيبها بكره
• التحليل تجيبوا بالنهار في الصحيفه وتعرضوا بالليل مباشر؟
• ياناس
• قلنا الف مره قناة النجوم مطلب جماهيري
• وقال رمضان ان البعض قال ان الممتاز يادوب اصبح له طعم ولون ورائحه طالما ان المريخ سيلعب في مدني وشندي وعطبره وبورتسودان وكادوقلي والحصاحيصا
• البسمع الكلام ده يقول ان الاتحاد يادوب قرر ان يلعب المريخ في المدن التي ذكرها رمضان
• راعي الضان في الخلا عارف المريخ حايلعب فيها كلها
• وهزيمة الهلال في شندي لم تك سببا لتقرير لعب المريخ في تلك المدن
• يارمضان
• كل المدن التي ذكرتها مخيفه بالنسبه ليكم يا اخوي
• لانكم وللتاريخ انهزمتم فيها كلها
• وحتي في التاريخ القريب جدا
• وهزيمتكم في شندي ماجديده
• من زمن سارديه وعبدالمحمود
• اسأل فوزي كان لاعب وحاضر
• وازيد ليك يارمضان مدينه جديده
• مدينة النسور
• ضمها للقائمه
• ايها الناس
• اليوم نلتقي باتحاد مدني
• كل الروابط مستعده
• وجاهزه
• ومع احترامنا لاتحاد مدني ( بنريدو )
• لكن ما بنخلي ولا نقطه
• ننوم اليوم والفرق تمانيه خير
• ولو نمنا والفرق تسعه خيرين وبركه
• اتنسري
• عمك احمد هرمنا
• والله انت هرمت جد جد
• الافريقي يغلب عشره تقول لينا تسعه !!!
• بالمناسبه دي
• هلالابي خايف يبحلق في عيونو , قال لي الافريقي غلب منو عشره ؟
• قلت ليهو غلب الجميعابي بتاع تونس
• اتجمعي
• اها
• اهلي شندي لبس مخطط بالطول غلب واحد
• الافريقي بلبس مخطط بالعرض
• هذا للمعلوميه
• سؤال لي الاستاذ رمضان وللخبير الطاهر عثمان
• ما قلتوا لينا رأيكم في البلنت الضربت في الماسوره ورجعت للماسوره
• البلنت الشاتها كاريكا ضربت في الحديده ورجعت ليهو تاني وشاتها وجات قون
• الحكم حسبها قون
• الحكم كان منو يا رمضان ؟
• والطاهر رأيو شنو فيها ؟
• الكوره دي كانت ضد جزيرة الفيل بمدني
• في الدوره الثانيه
• وانتهت علي هدف دقت في الماسوره ورجعت للماسوره
• رايكم ما وريتونا ليهو
• اسي قبلانين ورونا ليهو
• سؤال تاني
• الخبير الطاهر ده موش كان بحلل مباراة الهلال وجزيرة الفيل في الدوره الاولي من دوري السنه الفاتت ؟
• ماحلل لينا حالة المعز لما كسر رقبة مهاجم جزيرة الفيل في آخر دقيقه من عمر المباراه ووقتها الجزيره متأخره بهدف
• حلل يا خبير
• انتوا الخبير ده موش الحلل كورتنا ضد الجماعه البدون جمهور ؟
• هو ولا غيرو القال المعز لما برطع بره الخط وقبض الكوره ما بستحق الطرد ؟
• كان ما هو , يحللها لينا اسي
• موش خبير !!!
• انشاء الله الخبير ده يارمضان يكون تعرض في التحليل لحالة سامي عبدالله قرب نهاية المباراه في مكان الطرف الشمال للهلال والتي اعتدي فيها اعتداء واضح وفاضح مع سبق الاصرار علي لاعب اهلي شندي مع العلم بان سامي كان منذرا
• كلمنا يا خبير وحلل
• ورينا الملاريا وين
• ياناس
• قناة النجوم ضروره مريخيه لحفظ الحقوق والتوثيق للاحداث وتحليل الامور بحياديه
• قلت لي عيونك الاتنين ؟
• طيب يافك الكاجيها يا كج الفاكيها
سلك كهربا
ننساك كيف وموقف شندي مليان
والي لقاء
سلك
babikir maki [b_silik@hotmail.com]
