يــلاّ أرحــل !! .. بقلم: خضر عطا المنان

قلنا أرحـل
يعني أرحل
وانتَ عــارف يا (مُـدلّـل)
غأيــر رحيـلك مــافي حـل
لو بتــفهم …
خــلي عــنــدك مـرة دم
مـا اكـتــفيــنا مـن الألـم
وراح الفرح أصبح عدم
وعشنا أحــزانـك مـسلسل
وتهنــا في الأيــام بنــســأل :
ربي هــل من عـوْدة هــل؟ ..
لو بتفهم …..
قبُــل بــاكر تـفـوت تـرحـل
يلاّ روح .. يـلاّك تعــجّـل
والرحيــل بالسُترة أسـهـل
لينا أحسن .. وليكا أرحم
لو بتفهم …
يـلاّ أرحــل …
قـبلي ما تـنهـار وتــنــدم
أو كمان بالقـوة تُـــرغـم
يـلاّ أرحل ..
عشـنا في الدينا وجحيما
وإنتَ تــرفُـل في نعــيما
فوق ضهورنا الديْن مردّم
ولو بتفهم …
مــن عـــميــرك بـاقي كـم
شـــــان ليكا نقـول (نـعـم )؟
وإنتَ سرطان في بلـدنا
هَـم بياكل في جســـدنا
وفي العصب ساكن تمرحل
وانتَ جـالس في قصورك
والحــــرام عــندك مُحــلّـل
يــلاّ أرحل .. يــلاّ أرحـــل ..
ولو بتفهم …
ما بي تغِـدر بىْ بنات العم
وتعـرس في الحريم أجمل
ونحنا خـلاص قِرفنا معـاك
تِعـبـــنا من الكــذب وإيــاك
ومهما تطول سنين حُكمك
ويــَحـفّــك كـم مـلاك يبـراك
مصــيرك نحنا عارفنو
هناك (لاهاي) يمين راجياك
وعنــأك بالــسنيـن تســأل
يلا أرجــل .. فوتــنا أرحل ..

صَـَبرنا كتـير ومنتـظريـن
صبرنا كتير وعشـنا سنين
حصادنا حروب لهيب الدم
أريـــتـك إنت بس تــفهــم ..
لو بــتفهم …
تـفوتـنا وتمشي بـس ترحـل
كفـــــاية الشُـــــفـنا من الـذُل
ياما أُم فـقــدت دليــلا
ويــاما أب مســـــكيـن تـرمّل
ويــاما .. يـاما .. يـاما
لو بتفهم …
في الدروب مات العشم
والجــنـوب حــسـرة إنفصـل
مـاتــــو بـالآلاف وكــم
أمشـي في (دارفور) وأسـال
قـبـلي ما تغــادرنا تـرحــل ..
وقبلي ما تـغادرنـا ترحـــل
ولو صحيــح انــك بتفهم
حـقو تعلم …
يـاما ردّد شـــعب أعـزل :
يلاّ أرحـل .. يــلاّ أرحــل
فـــوت اليــوم قبــل تـنـدم
أريتك بس عـديل تفهــم
ونحنا البى الرغيف نحــلم
نشرب في الخَبوْب والطين
ورويان إنتَ من ( زمـزم)
أريــتــك إنتَ بـس تعـلم :
حتــى الجوع …
هـــــراها ضــلــوع
أكــلَن مــافي ليهـو طـعـم
ســــنين مأســاتــنا تِتــكلّم :
يبــكي شـــــافع ما إنـفطـم
حـليــب أُمو البقـالو عـدم
شمس حـردانة ما تطلع
وحتى النيـل يميـن بـرطم
لو بتفهم ..

يـلاّ أرحـل .. يـلاّ أرحـــل
ولو في مـرة بس تخـجـل
تمشي براك تفوت ترحـل
عشـــــان واقعــنا يتغير
وحياتنا بلاك تصير أجمل
يـلاّ أرحل .. يـلاّ أرحــل ..
ولو بتفهم …
يـلاّ أرحل
ســوق معاك كل الرمم
لو بتفهم …
أصلو مخـك جد (مسـكّر)
وباقي عقلك نصو عسكر
كيف عليـك بـالله تفهم ؟؟
لارؤيــة عـنــدك لا فِــكِر
لا إرادة بــــتـنــتصـــــــر
وفيك غبا راســخ مَغلغل
يـلاّ أرحل .. يـلاّ أرحــل ..
سـبناكي يــا بــلد الســجـم
وهـاجــرنا لى دار العجـم
لا سِعِدنا هناكْ ولا حال إنعدل
يــلاّ أرحــل .. يـــلاّ أرحـــل
لو بتفهم …
في بــلـدنـا المــوت حـصــل
لا في طالب جــد نَضَم
ولاصحافي يقــول بِغِـم
والبــــلــد صــــابَ المَـحَــل
والمــهــــازل يـــــا بــطــل
بقيـت عنتر.. بقيـت أرجــل
مآســي عليــنا تِتــِلملم
وإنتَ رئيسنا ما بتفهم
وداير ليك نقولاَ (نعم)
وحــاتك عـمرو ما يحصل
ونحــنا الفـيـك فـقــدنا أمل
يــلاّ أرحل
لو بتفهم
يــلاّ أرحل
الموت يصارع في الأهل
وكــلُ زول راجـي الأجــل
يلاّ أرحل …
يلاّ أرحل ..
فــيــنا طـبّــقـتَ الشـــــريـعة
وعشــنا اســـلامك خــديـعـة
وحتى ربــك وحدو يعـلم
لو بتفهم …
الشـــريعة .. وما الشـــريعـة
ليــنـا كـانـت جــد فــجــيـعـة
في بــــلــد معـدوم وجـيـعـا
والفســــاد بالكــوم مردّم
اقتــصـاد مرضــان مهلهـل
وكلُ زول فـقران ومُعدم
لو بتفهم …
يـلاّ أرحـل .. يـلاّ أرحـــل ..
شــعب قـاعد في الصـقـيعة
وفــقــدت الأيــــام ربـيـعــا
والعُمـر شــلنــاهو هَم
لو بتفهم …
البــلد عـاشــت قــطــيعة
وســاءت الأوضاع مريـعة
وإنتَ في (كافـور) ُمنعّـم
لو بتفهم
يــلاّ أرحل
يــلاّ أرحل ..
كـلمة قُـلنــاها ومشــــيـنا
والبيــحـصــل مــا عـليــنا
ياما بُكرة تشـــيل وتندم
لو بتفهم …
يلاّ أرجل ..وفوتنا أرحـل
لينا أسهل .. وليكا أرحم
لو بتفهم …
أريتــك مــرة بس تفهم .
Green!