السبب عرس المدينه .. بقلم: بابكر سلك

بسم الله الرحمن الرحيم

في السلك

b_silik@hotmail.com

*قبل كل شئ ننعي للأمه السودانيه عامة

*وللامه المريخيه خاصة

*استاذ الاجيال حسن محمد عبدالله

*الرجل فقد جلل وكبير

*ولكن لاكبير علي الله

*له الرحمه ولنا الصبر من بعده

*اها

*بعد صدمة المدينه

*الكضب وقع قرش ونص

*لاعب برازيلي كبيييييييييير

*لعب في كاس العالم

*قعد ينطط لما قالوا ليهو الهلال دايرك

*وفي ناس قالوا

*قال ليهم انا البدفع للهلال

*الهلال هين ولا لين

*اسرتي هلاليه

*ورونالدينو خالي

*بيبيتو عمي لزم

*وكافوووو جدنا الحببنا في الهلال

*هكذا يقول البعض

*البرازيلي يصرح

*سعيد باللعب جوار كاريكا

*كاريكا البلعب مع ناس نيمار ولا كاريكا بتاع الكاردينال وقندهار ؟؟؟

*وده كلو بسبب بكري العريس

*اصلو الولد عريس اليومين دي

*والواحده لما تكون قافله علي زول

*بدون ما يقول ليها شئ

*تبني احلامها كلها عليهو

*واول ما تسمع بيهو خطب ولا عرس

*تتجنن

*وتصرح

*انا زي ده بعرسو ؟؟

*ولا بكون في زول سألها

*نحنا كان بنعرس زي ده كان عرسنا زماااااااان

*وهي المغصه كاتلاها

*المهم

*بعد عرس المدينه

*توالت الشطحات

*حارس مرمي جنوب امريكي ركب الطياره وفي الطريق اسي

*بعد شويه حارس مرمي غاني

*عاملين بارتي الوداع في غانا

*دي جي زي الدي جي

*جاي الهلال

*وده كلو بعد عرس المدينه

*هو الكضب بي قروش

*وبابا سعيد بالهلال

*اما الطرف الاثيوبي

*الجات معاهو وكيلتو

*وكيلتو مرا

*ولي امره امرأه

*وكيلك الله يا رجل

*وصل

*قابلوهوا براهم في المطار

*وخلقوا ليهم مطاردة عنيفه للاعب

*قالوا البلد كلها مطارداهم دايره تختف اللاعب الاثيوبي

*ياناس

*سيناريوهات الافلام الاغريقيه القديمه دي غيروها شويه

*افتحوا خيال

*اعملوا سيناريو لي فلم خيال علمي

*قول في مطاردة

*من منو المطاردة ؟؟

*من المريخ ؟؟؟

*طيب جريتو ليه ؟؟؟

*خايفين كديس جمال المربيهو في فداسي يختف الحمامه الحبشيه ؟

*طيب يختفها ليه !

*ما قلتوا الحمامه مقتنعه بيكم ؟؟

*علي اليمين حبشي من الديم ما حضر

*ورقه شايلها الهواء ما طاردتكم

*بتعملوا لي روحكم (برابقندا) ساي

*انتوا بتطاردكم الفيفا

*الديون

*تسكوا حكم

*وكده

*المهم

*طلع البرازيلي عندو رباط

*هو اسسا في برازيلي ؟؟؟

*وطلع الحارس الاوروبي اسرتوا متيمنه ما يلعب بالخرطوم

*الا مجلس الامن يسلمها خطاب رسمي بانو الخرطوم امان

*امان اند ابان يا مان

*بس هو يجي

*اما بابا بتاع دبي

*اسألوا ناس دبي

*قولوا ليهم آخر مرة شفتوهوا بلعب وين ومتين ؟؟؟

*اساسي ولا زي فيصل موسي ؟؟؟

*ده كلو بسبب عرس بكري

*بالمناسبه

*معزومين عرس بكري

*في ديم مدينه الجمعه دور الجايه

*ممنوع اصطحاب الاطفال

*العرس ده بتاع كبارات

*المهم

اين تكملة نواقص الرديف يا مجلس المريخ ؟؟؟؟

*والاشبال كذلك ؟؟؟

*واين مباراة اعلان تتويج رديف المريخ بطلا للموسم التاني علي التوالي يا اتحاد ؟؟

*زكي عباس

*السنة الفاتت كنت داير تلغي البطوله بعد انفرد بها المريخ

*السنه دي سويتها ظاهره

*وان كان مجلس المريخ لا يعير الامر اهتماما

*ابشرك بان بالمريخ من يعير الامر اهتماما

*وستحسم هذه المسأله معك

*شد حيلك

*ايها الناس

*ان تنصروا الله ينصركم

*اها

*نجي لي شمارات والي الخرتوم

*كان شفت يا والينا

*المرأه السودانيه كلها بقت ست شاي

*والرجل السوداني مركلس قاعد جمبها بي جاي

*والشاب السارح بعيد سارح فوق راي

*والشابه قنعت من العرس الرسمي والساي

*الكبير في السن يهز راسو جاي وجاي

*ويصفق ايدينو يقول ربي يا مولاي

*والموت الحايم فينا يا والينا

*يعزل مننا ده فطوري وده غداي

*والسمحه السارحه ديكا عشاي

*والبلد تئن يا والينا تردد  وااااااي ياود حشاي

سلك كهربا

ننساك كيف والناس تكورك واي ياود حشاي والموت يشيل من غادي ومن جاي

والي لقاء

سلك

////////