بسم الله الرحمن الرحيم
في السلك
*الاهله الشرفاء امس طلعوا بي نقطه غاليه في النقعه
*ومريخ الفاشر الشفت خسر نقطتان غاليتان
*كورة امس دي مريخ الفاشر مفروض يطلع منها اقل شئ بي تسعه نقاط
*طبعا الاهله الشرفاء الواضحين قالوا الفريق كعب ومافيهو بدائل
*بدائل شنو
*اساسيون مافيهو
*والاهله البدسدسوا طبعا حايطلعوا علينا الليله بمبررات
*الكوكي الشاطر اشرك الرديف
*الكوكي داير يجهز تيم تاني
*وطبعا الكوكي تيم اول ماعندو
*ما كل الاتيام بلاندي يا كوكي
*ولما قلنا ليكم زي ناس سانغا ديل في ميدان عقرب كتار ما صدقتوا
*اكيد بتكونوا شفتوا البدائل كيف في كورة المريخ ضد اهلي مدني
*برغم اني اكتب قبلها
*وبرغم توقعي للعبها بالصف التاني
*الا اني مقتنع تماما ان غرزه الشاطر
*باي صف بكسب
*بالصف الاول اساس بكسب
*القصه ليست اللعب بالصف التاني
*او بالصف الكم
*القصه توظف الصفوف كيف
*وغرزه بعرف يوظف
*غرزه لو مسكوهوا موضوع الخريجين في البلد دي
*بوظفهم كلهم
*بعرف يوظف كويس
*المهم
*قالوا مدينة تطوان بالمغرب الشقيق
*بسموها الحمامه البيضاء
*عندهم ميدان كبير فيهو حمامه كبيره في النص
*ايها الناس
*في صفنا التاني اوكرا
*وفي صفهم التاني الصيني
*حتي الصف التاني صيني
*الببني صيني
*والدرداقه صينيه
*اللاعبين كمان صينيين ؟؟؟
*تقليد في اي شئ
*واذا راجعت الاعمار بشفافيه
*تجد ان اوكرا يصغر الكثير من ابناء رديف الهلال
*المهم في الموضوع
*الصداره بالتأكيد بتكون عادت منقاده لاصحاب السعاده
*فرق الاقوان قدر فرق العمله
*ايها الناس
*وين مشروع 2870
*يا ادروب يا كمل المشوار
*يا ابعد عن المشروع يا خلينا ننجز
*مشروع زي ده اذا فشل
*بتبقي القصه معلقه فيك
*انجز او ابعد
*المهم
*اتركوا لغرزه اختيار الجدد
*الزول ده بعرف يجيب منو وليه وبي كم وعشان شنو
*نحنا بنعرف عشان شنو
*عشان يجيب الاميره السمراء للقلعه الحمراء
*والاميره السمراء في القلعه الحمراء يفقدها البدر
*البدر السنه دي حايطق
*ليست كل الفرق سانغا
*وبمناسبة سانغا
*صحي ناس سانغا بين الشوطين كانوا في الباركنج بره خاتين حفاظات المويه ؟؟؟*
*صحي مادخلوهم غرفة اللاعبين ؟؟؟
*اسي عليك الله زي سانغا ده محتاج لي يودوهوا الكلاكله حتي يرجع السوق العربي ؟
*زي سانغا ده بحتاج لضغط نفسي ومعامله سيئه ؟؟؟
*امال مازيمبي حلتقعدوهوا بين الشوطين في المنطقه الصناعيه ولا في حوش البلديه ؟؟؟
*حيرتونا
*ايها الناس
*معروف ان الدوري الجزائري هو اقوي دوري افريقي
*الاتحاد الافريقي شاف انو المريخ اكبر من الدوري السوداني
*قام حولنا للدوري الجزائري
*الخوف نقطع البحر ونلعب في الدوريات الاوروبيه
*ماصعبه
*لعبنا ضد البايرن وشالكا
*عادي ممكن نلعب في اي دوري اوروبي
*ايها الناس
*ان تنصروا الله ينصركم
*اها
*نجي لي شمارات والي الخرتوم
*والينا
*ما قلتوا لينا
*شنو الاول امس طرشق فينا ؟؟؟؟
*ناس يقولوا جسم غريب علينا
*ناس يقولوا حفلة طرشقت علينا
*ناس يقولوا رعده دايشه قايله الخريف جايينا
*مافاهمين
*كدي براحه اشرح لينا
سلك كهربا
ننساك كيف وماعارفين البطرشق فينا غير المستقبل الطرشق علينا
والي لقاء
سلك