بسم الله الرحمن الرحيم في السلك *كلو زول وليهو هواية *مثلا تلقي ناس هوايتهم الصيد *والصيد خشوم بيوت *زول هواتيو صيد السمك *وفي ناس هوايتها صيد الخلا *وفي ناس بتهوي تصيد الاخطاء *وفي ناس بتصطاد في الماء العكر *كلو زول بي مزاجو *وجمال سالم من ناس الصيد ديل *بهوي صيد الشارده والوارده *يمسك الشارده بي جاي *والوارده بهناك *يخلي ليك الناس الراجيين الشارده يتطاقشوا مع الناس الراجيين الوارده *الهوايات خشوم بيوت *في ناس هوايتهم يكتبوا عن عثمان حسين *زي محمد عبدالماجد *الشهر ده حايهرينا اغنيت عثمان حسين *لكن من منا من لا يستمتع بعثمان حسين *بالذات لما يكتب عنو محمد عبدالماجد *اكتب لينا يا حماده عن ذكرتني تيرارا ذكرتني حبيبي ذكرتني *الهوايات خشوم بيوت *في ناس بتهوي الشمارات *الواحد فيهم لو نايم *تقول ليهو ما حكيت ليك *يقوم فلتلب *يفتح خشمو ويقول ليك اهاااااا *احكي لي *ناس الشمارات ديل كتار *وفي ناس بتهوي تربية الحيوانات النادره *تلقي الواحد مربي ليهو كد\يسه دسيسه شعرها تقول عاملة ليهو دهان فرد *وما بترقد في الواطه *الكنبه بس *واجمل كنبه في الصالون *هوايات غريبه *في ناس بتهوي الحفلات *الواحد يقشر ويتريح *تقول ليهو علي وين *يقول ليك ماشي عرس *رمتله ساااااي *العريس منو ما بعرفو *يختار صاله ويمشي يترمتل *ديل فيهم ناس بنظموا الحفله كمان *اهل العرسان بعد العرس لما يشغلوا الشريط *اول شئ بسألوا *انتوا ده منو ؟؟؟ *زول بعرفوا مافي *هواية *في واحد من الجماعه ديل *مرة لقي العربات شديده والصاله فخمه *اتوكل وانقطع *اتاري القصه ما حفله *القصه اجتماع مؤتمر وطني *ووجد نفسه مجبور علي التهليل والتكبير وكسير التلج *المجتمعين زاتو لما شافوهوا *قربوا يرشحوهوا للولاية *زي ديل ممكن تضرب معاهم *اصلو المناصب في بلدنا بتجيبها الصدف *المهم كلو زول بهوايتو *في ناس بتهوي جمع المال *ياي طريقه *وبكل السبل *يمارسون هوايتهم المحببه في الطيف او في الصحيان *الواحد كان حلم *يحلم بشنطه دولار *الطبعه الجديده *المهم *تختلف الهوايات *لكن في ناس ماعندها هوايات *لاعندهم فنان مفضل *ولا اغنية عاجباهم *عليك الله شفت ليك زول ماعندو فنان مفضل !!!!! *اسي محمد عبدالماجد فنانو المفضل عثمان حسين *بسمعو طول العام *وبكتب عنو ايام الهلال يتهزم *يوم فيتا كتب عن عثمان حسين *ويوم مازيمبي كتب عن عثمان حسين *ويوم الخمسه المازيمبيه كتب كل اغاني عثمان حسين *حتي الما اتلحنت ولا اتغنت ولا اتكتبت *اليوم داك محمد عبدالماجد كتب عنها *هوايات *واليومين دي طبعا حايهرينا *لكن هات يا ابو حميد *اي شئ من عثمان حسين حلو *المهم *كلو زول ليهو هوايتو *قاعد في البيت بمارس في هوايتي *ود اخوي صغير *جاني لقاني قاعد وسط ما اهوي *وبتفرج *قال لي يا عمو نحنا كلنا موش مريخاب *قلت ليهو الحمد لله يا حميد يا ولدي *قال لي وتيب مربي ديل ليه *طبعا انا اهوي تربية الحمام شديد *ضحكت وقلت ليهو ده حمام نادر *ما حمام بلدي يا ولدي *قال لي كان كده معليش *جني وجن الحمام البلدي *المهم *كلو زول ليهو هوايتو *والداير تعرف هويتو شوف هوايتو *يعني البغني لي عثمان حسين *معروف يا مشوكش يا الهلال مغلوب *واذا قابلك شعب هوايتو صالة المغادره *تعرف طوالي هويتو *نعرف انو من الشعب الفضل *ايها الناس *ان تنصروا الله ينصركم *اها *نجي لي شمارات والي الخرتوم *كان شفت يا والينا *الشتاء خشه علينا *مابنشوف حميميه يا والينا *الا لما الشتاء يجينا *بنتلملم كلنا تحت فرد بطانيه يا والينا *لا الجوع بقدر يدفينا *ولا سيد البطانيه بالقسط بدينا *وقصة نشتري مافي زول بقدر فينا سلك كهربا ننساك كيف والبرد لو قرضنا حانبقي شهداء سقطنا والي لقاء سلك
