بسم الله الرحمن الرحيم في السلك *زمان كان البواب في المستشفي او الوزارة او اي مصلحه عامه *كان بكون زول بسيط وامي *ترفع ليك ورقه من الواطه *تشخبت فيها تديها ليهو *يفتح ليك الباب تدخل *الناس كانوا طيبين شديد *اسي البواب اتطور واتعلم وقشر وانتشر *تطلع البطاقه او الاذن يقراهو *ويتفحصو ويتمحصو *وعشان يوريك انو هو زول قاري لكن الظروف صعبه *يقوم يرجع ليك البطاقه ويقول ليك اتفضل يا الصادق عادل عبدالرحمن *وبمناسبة بواب دي *قالوا افقر واشرس بواب في تاريخ السودان *بتاع مستشفي عطبره في السبعينات *قال ليك الزول ده مسيخ مساخة الترمس *مسيخ مساخة مسؤلين من بتاعين اليومين دي *مسيخ مساخة تسجيلات الهلال *ولو جيت اول السودان *ودخلت طب الخرطوم *ماممكن تدخل مستشفي عطبره *زول لئيم لدرجه ماعاديه *ياخ ده قال ليك مرات تهف ليهو *العيان ما بديهو فرصة يدخل *لو يموت في خشم باب المستشفي *مابخليهو يدخل *قبل كده قال ليك جابوا زول انقلب بيهو لوري *الراجل مدشدش حته حته *لما وصلوا باب مستشفي عطبره *-البواب ابي يدخلهم اصلو *قدر ما شالوهوا وختوهوا *حلف بالتقطعو حتت ما يدخلو *واحد قال ليهو الزول ده مكسر وبنزف *الزول ده من حقو يدخل يتعالج *البواب قال ليهم *ختواالزول ده هنا *واشر ليهم علي المساحه البعد البا ب طوالي *الجماعه ختوهوا *قال ليهم امرقوا *وقفل الباب و *قال للمكسر وبنزف *قوم امشي الدكتور في البرنده دييييييييييييك *المرافقين ما بدخلوا عشان ماعندهم كرت مرافقه *بواب مفتح لي بهناك *الزول ده قالوا كان عندو عين كاجيها *واحد داير يلحق الزياره عشان محصل القطر *منعو يدخل كلو كلو *قدر ما الزول شكرو *البواب ابي *لما مواعيد القطر قربت *الزول كتر الجرسه *البواب قال ليهو والله تدخل في عيني دي ما تدخل المستشفي *واشر لي عينو الماكاجيها *الزول قال للبواب عينك دي مالها *واشر علي عين البواب الكاجيها *البواب قال ليهو خلاص قنعت !!!! *قال ليكك مره في باب مستشفي *جا مهندس طلع بطاقتو للبواب *البواب عاين ليها كده ورجعها ليهو *المهندس قل للبواب افتح *البواب قال ليهو ما عندك اذن دخول *المهندس قال ليهو انا وريتك بطاقتي اسي انا مهندس *البواب قال ليهو عندكم سيخه راقده جوه ولا شوال اسمنت مورود ؟ *مهندس هناك في الموقع ماعندنا هنا *دخول ممنوع *يقوم المهندس يطلع ليهو بطاقه تانيه *ان شاء بطاقة صراف آلي *البواب يقول ليهو ايواااااااا *كده ممكن تدخل *طبعا لانو السيد البواب مافهم دي بطاقة شنو *عشان يطلع من الحرج عمل فيها فاهم وفتح الباب *بواب الحيرة *طبعا اسي حكاية البواب اتطورت *وبقت ازياء وشركات *يوقفوهم ليك في الباب *ككو ما يدخل *كل البعرفوهوا ممنوع الدخول *لو عندك مصلحه جوه تضيع *ما بتفاهموا *الشغل بس ممنوع *طيب موش كان احسن يفكوا الباب ويطوبوهوا وكت اصلو ممنوع الدخول علي طول !!!! *البواب بقي مفتح *واتحادنا لسه داقس *زول يطلع ليك مستند يبين فيهو انو من ابيي *ويديك مستند يوضح ويثبت فيهو انو سوداني *وانت ترفض المستندين *يطلع ليك جنسيه كمجنس تقبلها ؟؟؟؟ *والله دي بواب الحيره ما يعملها *يعني الاتحاد لو رفض موضوع الجنسيه ده تأسيسا علي العلم العام *كان جمعه طلع بطاقة الصراف *وعشان الاتحاد يعمل انو فاهم حاجه *كان قال لي جمعه ايوااااااااااا *كده ممكن تسجل *ايها الناس *هل لدينا في قوانيننا ما ينص علي الحرمان من جنسيتنا وعدم منحها تاني للزول الذي اتنازل عنها بارادته ؟؟؟ *وهل تنازل الاخوه الجنوبيون عن جنسيتنا بمحض ارادتهم بالتصويت من طرف واحد الذين اختاروا من خلاله الانفصال؟؟؟ *وهل يستحق جمعه بعد كل ذلك ان نمنحه جنسيتنا كمجنس ؟؟؟؟؟ *الاجابه علي هذه الاسئله التلاته بتورينا الي اين تذهب هذه الدوله *ايها الناس *سمعتوا بي جنينه وغفيرها نايم ؟؟؟؟؟؟ *ايها الناس *والله العظيم تلاته *ان تنصروا الله ينصركم *اها *نجي لي شمارات والي الخرتوم *كان شفت يا والينا *جامع امدرمان العتيق *قال عيييييييييييييييييك *ضل الطريق *فقد الصديق *ضاق الضيق *لامروحه تهبهب علينا *لا مكيف يرطب بينا *لانظافه تسر عينينا *لا قيافه ترقي لمكانة المسجد فينا *والغريبه لو شفت الحيطه يا والينا *وايه الحاصل حولينا *منو المسئول منو يا والينا *منو المفروض يقبل ويتقبل شكاوينا *منو المفروض يحافظ علي مساجدنا ويفظ للناس دينا سلك كهربا ننساك كيف ولو سجدنا الا نقفل نخريننا ولو ركعنا نقرب نمرق الفينا والي لقاء سلك b_silik@hotmail.com ////////////
