بسم الله الرحمن الرحيم
في السلك
• جيت داخل البيت امس
• لقيت خالتي قااااعده تنقض في مشاطها
• بعد السلام قالت لي الليله مع التور ولا بتحب اللبن !
• قلت ليها تور منو ياحاجه ولبن شنو؟
• اوعه تكوني راجعه تاني لصلاة الضهر بالليل ؟
• قالت لي فاطه سطر ولا قايلني فاطه سطر ! الليله ما النهائي بتاع كاس العالم ؟
• قلت ليها صاح
• قالت لي اللاعب منو ؟
• قلت ليها اسبانيا وهولندا
• قالت لي ماسمعت بالتور الاسباني ؟
• قلت ليها سمعت
• قالت لي ماسمعت بلبن البودره الهولندي والبقر الفريزيان ؟
• قلت ليها سمعت
• قالت لي ما ياهو التور ضد اللبن ؟
• قلت ليها ياهو
• قالت لي الفاطي سطر منو ؟
• قلت ليها والله ياخاله الفاطي سطر انا
• فاطي كراس كامل
• لكن بي سببي
• قالت لي سببك شنو ؟
• قلت ليها السبب ده سري للغايه
• نحن برا كده الكلام ما مريحنا
• وضحكنا
• المهم
• لبست لي جلابيه طووووووووووووووووووووووويله وجيت قعدت معاها
• قالت لي التوانسه جوا ؟
• قلت ليها جوا
• قالت لي انشاء الله متزوجين ؟
• استغربت
• الخاله دي مالها الليله !
• كلامها كلو بحر بحر
• قلت ليها ليه السؤال ده ؟ مفكره ولا شنو ياخاله ؟
• قالت لي افرض مفكره مامن حقي ولا شنو ؟
• قلت ليها من حقك (وكتمت الضحكه )
• ناس المقاييس ديل مفروض يفحصوا الاغذيه المستورده دي كويس
• قالت من حقي
• الله يستر
• قالت لي والله كمان شفت ليك صورهم في الجرايد فيهم حلاة شفع
• قلت ليها شفع شنو ؟
• قالت لي البعرسنهم بختم , شفعهم بطلعوا حلوين خلاص , اللون ده كيف والشعر يايمه والقوام
• جني وجن الشافع الشين
• يجيب الفقر لي اهلوا
• قلت ليها غايتو مرابط ده مامتزوج
• قالت لي خلاص
• كلم جمال
• انا قربت اجري
• اتماسكت وقلت ليها اكلم جمال بي شنو ؟
• قالت لي ما يديهو ولا مليمه الا بعد الموسم يقفل عشان مايمشي يعرس
• كان خطب سااااااي وقعد في المعسكر
• مع المكالمات المجانيه بعد اطناشر دي النقه ما بخلوها
• والتونسيات ديل نقاقات خلاص
• قلت ليها عرس شنو ياخاله !
• قالت لي الزمن ده ما في زول بعرس الا يكون بلعب في المريخ ولا مغترب محترم ولا مؤتمر
• امك الحاجه بقت تخرم
• فتحت التلفزيون
• مشيت علي قناة الجزيره
• يجيبوا لينا خبر زلزال اخير من هضربة الخاله البتودي التوج دي
• كان في استعراض لاستادات كأس العالم
• نطت الخاله
• قالت لي كان يسلفوهم استاد المريخ يتموا بيهوا استاداتهم
• قلت ليها يسلفوهم استاد ؟
• قالت لي الغريب شنو ؟ قبل كده ناس الهلال ماشدوا استادنا ؟
• قلت ليها حصل
• قالت لي اليوم داك ذكروني ناس الضهاري لما ولدهم يكابس السوق و الله يديهو ويقوم يعرس من بنات البلد دي وينسي بت العم الاتنها ليهو من زمن ازهري
• اها اهلوا يجوا كداري وباللواري
• اهل العروس بعرفوها من بدري
• يقولوا للعريس العرس في النادي
• عارفين اهلوا ديل كان جوا البيت للسمايه تاني
• المهم يعملوا العرس في النادي
• بعد الحفله ناس الضهاري يكونوا كسروا النادي كلو
• ماشفت ياولدي كسروا لينا استادنا كيف يوم شددناهو ليهم ؟
• قلت ليها شفت
• قلت ليها استاد المريخ مامحتاج يتشرف بمباريات كاس العالم , يكفيه ان العالم كلو اتجه اليه بانظاره يوم مباراة مصر والجزائر
• اول مباراه في السودان بين ضيوف
• اختاروا ليها استاد المريخ ياخاله
• قالت لي نعم الاختيار , اسي ياولدي لو عندك ضيوف مهمين مابتوديهم علي الديوان ؟
• قلت ليها صاااح
• قالت لي ما بتوديهم (التكل ) تقرصهم عقرب ساااي يجيبوا لينا الكلام
• قلت ليها انشاء الله يعيدوا كورة مصر والجزائر تاني ؟
• قالت لي ليه ؟
• قلت ليها عشان يشوفوا حوض السباحه وملاعب المناشط وبصات الوالي الجديده
• وتواصل الحديث بيننا الي ان وصلنا لبطولة افريقيا للمحليين
• حانعود للموضوع ده انشاء الله
• المهم
• الناس المحتجين علي تأخر كاربوني
• السواق مابجي الا بعد المساعد يجهز اللوري وتتم الشحنه ويطلع المنفستو
• ياناس
• اي معسكر اعدادي يبدأ باكتساب اللياقه
• كاربوني ليس مدرب لياقه
• بعد المساعدين يعدوا العده ببدأ دور كاربوني
• لاتنجرفوا وراء الذين يتصيدون للمريخ اخطاء ويخلقونها من عدم
• بالمناسبه
• المانيا ضد اسبانيا لم تخسر بتكهنات بول ولكنها خسرت برأسيه بويول
• خلونا من الخرف
• اكتب قبل مباراه النهائي
• شايف الميرندا في القزاز
سلك كهربا
سخانه في الجيب والجو ورمضان قرب تقول لي ننساااااك !
والي لقاء
سلك
babikir maki [b_silik@hotmail.com]
