في السلك
• كنا طلاب بالجامعه
• في اوج الحب للوطن
• تشتعل الوطنيه فينا بردا وسلاما
• الديمقراطيه الثانيه كنا نتعشم فيها خير البلد
• فكتبنا الاشعار والشعارات
• وقلنا
• تاااااتي السودان مشي
تااااتي بنوا مدرسه
تااااتي سووا كندشه
تااااتي عز وحنكشه
تاااااتي مانا ملطشه
• وبعد ذلك فقدنا الثقه في الحنكشه التي كنا نحلم بها للوطن الغالي بل فقدناها في (عضم المقرشه )
• كتب اكرم زكي وهو محبط منتقدا للقيادات التي تقودنا دوما في كل الحقب ولا تقدم لنا ولا تقدمنا
• كتب كورال باسم صفر قطار
• وقال فيه
صفر قطار واتحركت عجلاتو
نفض الغبار وقودو نابع من ذاتو
• وواصل في كوراله يوصف حال قطرنا الي ان وصل بالكورال ال 000
اعطال كتيييره في السكه كترت وقفاتو
وقفات طوووويله في اي فجه محطاتو
اعطال كبييييره وصلوا المن بعدنا وفاتوا
• نحن اسسنا الاتحاد الافريقي
• وفي دول ماسمعت بالاتحاد الافريقي الا قريب ده
• وظهرت في النهائيات
• وبعضها ظهر في كاس العالم
• ونحن يانا نحن
• حافظين للوصيه
• قال ايه
• نحنا اسسنا الاتحاد
• طبعا ليست المهاره هي التي اقعدتنا
• ولكنه سوء الاداره
• وديناصورية القيادات
• قيادة شداد اقدم من القياده العامه
• فواصل اكرم
لمتين يسوقوا فينا الله يستر
زي ديل يسوقوا فينا الله يستر
• الكلام ده اتذكرتوا اليومين دي
• الناس كلها بتتكلم عن شداد
• لازم يمشي
• ما يجددوا ليهو
• شداد ياناس ماسايقنا براهو
• واذا كانت الانتقادات لشداد
• فهي لعهد شداد
• وفشل شداد في ان يقدم ما يطورنا
• ولاعوان شداد
• فاذا ذهب شداد وبقيت باقي الشله
• يبقي ماغيرنا شئ
• عشان كده يمشوا كلهم
• دون فرز
• وزي ديل يسوقوا فينا الله يستر
• لمتين يسوقوا فينا الله يستر
• المهم
• اسلام بتتفرج علي غانا في كاس العالم
• قالت لي يابابا متين يصل مستوانا غانا ؟
• قلت ليها لما نخلص من الاسطوانه
• بنصل غانا
• ونرجع نغني
• برانا برانا بنغلب غانا
• قالت لي متين بحصل مستوانا غانا ؟
• قلت ليها ممكن نصل غانا لكن ماممكن نحصل غانا
• ياناس
• قطر بتجهز لكاس العالم 2022 منذ الآن
• ممكن نمسك عشرين طفل عمر تسعه سنوات موهوب ونجهز فريقنا لي قطر ؟
• بعد عشره سنين
• طبعا ممكن
• بس لو لقينا قائد وجماعته يؤمنون بان غرس الشتله سيصبح اعظم شجره اذا وجدت الرعايه
• وناس شداد الفيهم اتعرفت
• مادايرين لعب شفع
• عشان كده
• زي ديل يسوقوا فينا الله يستر
• لمتين يسوقوا فينا !
سلك كهربا
ياي بليدنا وكلنا اخوان سوداني بليدنا ياي
والي لقاء
سلك
babikir maki [b_silik@hotmail.com]
