بسم الله الرحمن الرحيم
في السلك
• امس اتكلمنا عن موقف جاكسون
• الموضوع ده جاب مشاكل كتيره
• والمشاكل دي وصلت البيت
• تتذكروا كتوته وبتوته بنات احمد اخوي
• المريخابيات
• اعمارن اربعه سنوات وتلاته سنوات
• جايطات البيت كلو
• مابتمسكن اصلو
• وارقو بس
• يعني لو في واحده منهن جات جاريه الا تعمل معاها فاول
• تجيها بي جاي تدخل تحت التربيزه
• تدخل معاها تلقاها مرقت بي يد الكرسي
• وزي الركشه
• في اي حته تلقاهن
• تفتح التلاجه تلقاهن
• والصغيره فيهن زي مصعب عمر
• كاتله حيله
• تجيك طايره ماشه بي وين هي ذاتها ماعارفه
• المهم
• جيت البيت لقيتن بتغالطن
• كتوته قالت عمو سلك كتب موقف جاكسون
• بتوته طلعت الحلاوه من خشيمها وقالت
• لا 00لأ 00 عمو سلت تتب مايتل جاجسكون
• طبعا قصدها عمو سلك كتب مايكل جاكسون
• ولقيتن في الغلاط
• سألني
• ضحكت وقلت ليهن الاتنين صاح
• قالن لي كيف بس ؟
• قلت ليهن امس كتبت موقف جاكسون والليله مايكل جاكسون
• امس قلنا خليفه وصحافه ودروشاب وامبده وود البخيت
• وسألنا 00 ده فريق ولا موقف جاكسون !
• والليله مايكل جاكسون
• مايكل جاكسون من وين ؟
• من ناس عمك جاكسون
• وبالتحديد من ناس جاكسون ( فا يف )
• و (فايف) دي راعي الضان في الخلا عارف انها تعني خمسه
• كتوته قالت لي يعني جاكسون خمسه !
• قلت ليها صاح
• بتوته قالت لي ناس داكسون حمسه ديل من ناس مازيمبي !
• قلت ليها يابت , خلي بالك انتي جاريك عمك بتفهميها طايره
• اها
• مايكل جاكسون كان فاكيها في نفسو
• غاشي روحو وغاشي الناس بالكريمات وعمليات التجميل
• صدق انو وسيم
• جلبق راسو بي كريمات الفرد لما اضنينو لصقن
• النخره حشر ليها سلك رفعها لي فوق
• يعاين لي روحو في المرايا اليوم كلو
• سلخ جلدو سلخ
• عشان يغير اللون
• كان ازرق
• داير يقلبو اصفر
• وين وين تلقوا زي ده
• المهم
• كان منتهي وماداير يعترف
• فجأه ودع
• اتلحس
• الناس ماصدقوا
• مايكل البنطط زي القرد يطلع كهنه سااااي
• اول عتره يودع !
• كتوته وبتوته كانن بتابعن في القصه باهتمام بالغ
• قلت حكاية مايكل جاكسون دي زي حكاية الاهله
• يتمكيجوا ويعملوا في عمليات التجميل ويكضبوا ويصدقوا الكضبه لما خلاص ببح
• الغريبه داير يغير اللون الازرق
• وفي الفراش ما جا غير الزرق
• المهم
• الجماعه في كادوقلي لبسوا الكفن
• طلعوا مغلوبين
• في بورتسودان لبسوا الكفن
• طلعوا مغلوبين
• انشاء الله يوم عشره يجونا مكفنين
• قلنا ليكم زماااااااان
• تلبسوا الابيض ده في التمرين تطلعوا مغلوبين
• صبغوا الجلاليب والعمم
• قريت لي ناس قالوا المعز مستواهو تدهور
• وواحدين قلوا المعز اسهمو نزلت
• وناس قالوا المعز لو قعد في الهلال السنه الجايه ما بكون اساسي
• ومن الكلام ده كلو انا شايف عمك محجوب راااااكب البرادو
• ده اعتراف بانتهاء المفاوضات
• لعبوا لينا الدعيع يوم عشره
• عشان تاخدوا عشره
• الرائع الرشيد هضرب جنس هضربه
• قال حايغلبوا
• انتوا لو تميتوا الكوره سااااي بنعتبركم انجزتوا
• وقال بغلبوا بي سا سا سا
• وقال سا سا سا دي ممكن تبقي سيدا
• وممكن تبقي سادومبا
• وممكن تبقي سلك
• انت يا الرشيد من زمن كر الجداد وكريسيدا !
• وبعدين قال السلك الاحمر ارضي ساكت نار مافيهو
• جنس هضربه
• عالميا ياروشا
• وراعي الضان في الخلا عارف
• انو السلك الوحيد الفيهو النار هو السلك الاحمر
• وفي عرف ناس الكهربه العالمي الوان السلوك تلاته
• احمر
• اسود
• ازرق
• الاحمر الاصلي الفيهو النار
• بكتل
• زح بعيييييييد
• الاسود السالب
• الكهربا دي فيها موجب ( الاحمر ) وسالب (الاسود)
• اما الازرق فعالميا معروف بانه الارضي
• اتأرضي
• لن نأتي للملعب مغرورين
• سنعطيكم اكبر من حجمكم عشان نديكم اكبر عدد من الاهداف
• اليوم داك عاد المكوك والعمد والارابيب الا يفرزوهم بالشلوخ
• واتشلخي
سلك كهربا
ننساك كيف ويوم عشره قرب
والي لقاء
سلك