أزمة اقتصادية خانقة مظهر لمصيبتنا مع العسكر!! .. بقلم: عيسى ابراهيم

ركن نقاش
طبيب سوداني ترك عربته الخاصة بالمنزل وامتطى المواصلات لانها (في نظره) اقل تكلفة..ملاك ترحال محتارين لا يتحركون شبرا واحدا الا عبر التطبيق الخاص بهم في طلب المشاوير ولا طلب يلوح في الافق..صاحب عربة ترحيل متعاقد مع شركة لترخيل عمالها من مواقع السكن الى مواقع العمل وبالعكس ونقطة المشكلة عنده ان سكنه الملك غير متوافق مع مشاويره المتعاقد عليها مع الشركة اضطر لمغادرة منزله وتاجير شقة تقرب مسافاته ايجار الشقة في الشهر الواحد ١٣٥ الف جنيه في الشهر للمحافظة على دخله من الاستهلاك الجائر..كل ذلك بسبب سعر جالون بنزين جبريل ابراهيم (من حركات الكفاح المسلح وهو كوز شعبي) يسعر في البنزين او الجازولين ما فيش زول عارف بيودي العايد المالي وين..العارف يوري الماعارف!!..
كارثة مواد البناء:
قلاب الخرسانة ٦ امتا ٧٥ الف جنيه وكذلك الرملة الكنجر.. تراب الردمية (واطة ساهي) القلاب اربعة امتار ونص ٣٠ الف جنيه بنات حفرة..كيس الاسمنت ٧ الاف جنيه ماسورة ٣ في ستة ٩ الاف جنيه..يومية البناء ١٠ الاف جنيه والطلبة يوميتو ٤ الاف جنيه ..قالو طلب الفول معاهو رغيفتين بي ٤٥٠٠ جنيه سعة ٢ بطن عمال..شكيتكم لي الله يا عساكر المحنة..
ايجار المنازل:
حدث ولا حرج غرفة بي منافعها ٣٠ الف جنيه في الشهر..منزل في سوبا غرفتان ومنافع ١٠٠ الف جنيه في الشهر..شقة في عمارة ٦٠ الف جنيه في الشهر..
مراعاة فروق الوقت:
قضيت خمسة اشهر للعلاج بمصر (تخريمة: العلاج بمصر تضاعفت اسعاره واصبح نار يا حبيبي نار ابنة اخي عملت دعامات للقلب بمبلغ ١١٠ الاف جنيه مصري تعادل مليارات بالسوداني) عند العودة مدت حرمنا لصاحب الدكان مبلغ ٥٠ قرشا طالبة فرشة اسنان بحلق فيها صاحب الدكان وقاليها: جيبي ٢٠٠ جنيه تاني!!..
جولان فكر في البدائل:
عندي غرفتان ومطبخ ومنافع فكرت في عمل سقف ليهن على شكل صدفة السقف الصدفة مكلف لانو يحتاج الى مواسير حديد ٣ في ٦ زايد شبك من السيخ ٢ لينية رايد رولات اكسببندة رايد خرسانة ورملة واسمنت وعمالة مدربة ازتفاع اسعار الخرسانة والرملة جعلتني افر من عرش الصدفة الى العقد الليبي ومن الليبي الى العقد بالكمر والكمر دايرلو عرضة براهو فكرت في الزنكي الامريكي وما سالت لسع عن سعر لوح الزنك واعمدة الخشب والساقية لسا مدورة لعن الله حكم العسكر اينما ثقفوا!!..
eisay1947@gmail.com