سودانايل أول صحيفة سودانية رقمية تصدر من الخرطوم
بسم الله الرحمن الرحيم
في السلك
• اها
• بعد انتهت الاسماعيليه رايح جاي الناس قعدوا يناقشوا اسباب الحاصل
• الكورة السودانيه
• مالها
• وماعليها
• نقاش مافيهو انتماء الا للوطن وبس
• نسينا الانتماءات الضيقه
• قلت ليهم مشكلة الكوره السودانيه في الجمبه دي
• قالوا لي كيف !
• قلت ليهم هدف الترجي الاول الجابو انرامو جاتو الكوره من الجمبه
• برااااااهو
• طقاها دخلها قون
• وهدف الجزائر التاني في شباك امل عطبره ( سواء تسلل ولا ما تسلل ) الكوره برضو بالجمبه طقاها الزول لي فوق
• كان ممكن شلبي يطلع يشيلها
• كان ممكن المدافع يشارك فيها بعد ما المهاجم طقاها لي فوق
• لكن لان كل دفاع الامل ماكان عامل حساب للمهاجم
• وقفوا يتفرجوا
• الراجل طار لي فوووووق
• وقلبها
• جمهور الجزائر قعد يهتف
• قلبها 00 قلبها 000 قلبها
• قون حمص
• حامد بدوي قاطعني
• قال لي قون حمص ياتو ؟ حمص اقوانو كتار
• وليد البشري قال لي افرز
• قلت ليهم قون حمص الفي الاسماعيليه
• معكوسه من الجمبه
• حمص حمصها ليك لمن آمنت
• براهوووووووووو
• تخيل زول زي حمص جاب قون في ايطاليا بالرأس
• وجاب قون في الهلال بالمقبره بالراس وحالتها الكوره ارضيه
• بعد ده نخليهو براهو والكوره جايه عاليه من الجمبه
• سكتوا وصنقعوا ودنقروا
• وليد البشري هلالابي كبير
• قال مشكلة الكاف في الكافات الخمسه
• قلنا ليهو شنو هي الكاف وشنو هن الكافات الخمسه
• قال ايواااااااااااااا , سالتوني
• الكاف هي كورة السودان
• قلنا ليهو والكافات الخمسه !
• قال هي مشكلة كورة السودان
• قلنا ليهو وماهي الكافات الخمسه !
• قال ايواااااااااااااااا , سألتوني
• الكاف الاولي كامبوس
• الكاف التانيه كاربوني
• والكاف التالته كاف الاتحاد الافريقي
• الكاف الرابعه كمال شداد
• والكاف الخامسه كمال دحيه
• قلت ليهو كمال شداد اسي الدخلو شنو ؟
• قال لي قبيل انت قلت المشكله الجمبه دي
• قلت ليهو صاح ولسه مصر علي كلامي
• قال وطيب , البغلبونا بالجمبه دي من صغااااار اهلهم بقولوا ليهم الجمبه دي اهم شئ
• تقول لي شداد دخلو شنو !
• نطه حامد بدوي
• وطبعا هو متعصب شويه
• قال يا اخوانا هوي خلونا من مشكلة كورة بلد
• كل زول يحل مشكلة كورتو
• اتلفت علي
• وقال لي الطاهر حماد ده شهر سته بتسجل ولا ما بتسجل ؟
• قلت ليهو ممكن يتسجل لكن مابلعب الممتاز ولا الكونفدراليه لانو شارك فيهما الاتنين
• قال لي وكت ما بلعب دايرين نسجلوا نسمعوا يعني !
• بس
• جوا ناس ماشين يتناقشوا في الكوره
• واحد قال كامبوس
• التاني قال ليهو اقول ليك حمص تقول لي كامبوس !
• الاول قال وكامبوس مالو ؟
• التاني قال ليهو اول مره اشوف لي مدرب بنسي الطرف الشمال
• الاول قال ايواااااااااااااااا , صحي والله , انتوا طرفنا الشمال كان منو ؟
• التاني قال ليهو غايتو هليفه كان نص طرف يمين يضربوا بالباص يقيف ويخلي الباقي علي مساوي
• الاول قال ليهو اتاريهو مساوي غرتو البيضاء كملت من الجري عكس الهواء
• ركبوا حافله ومشوا
• لكن والله يا اخوانا محيرني القون التالت لي اسي
• زول يلف ويؤشر ويكنتك ويرجع خلف ويستعدل ويدخلها !
• وبشه مباريهو قرب يقول ليهو ارجع 00 ارجع 000 باااااااااااااااااااس
• وناس المعز رقدوا واتونسوا في النجيله ديك
• اظنهم غنوا علي النجيله جلسنا
• سيرة مصر دي ذكرتني الصعايده ونكتهم
• قالوا واحد صعيدي اتزوج ومشي شهر العسل
• اتنفخ وبرم شنباتو وقفهن ليك دوغري زي الساعه تلاته الا ربع قال للعروس تعالي يا بت
• العروس جات
• قال ليها بته لما تبتك يا بت
• العروس سكتت
• قال ليها اهلك عارفينك بايته عندي ؟
• اها
• الجماعه جايين متين !
• وليد البشري ورانا الكافات كلهن بس ماورانا كمال دحيه دخلو شنو ؟
• بكره نعرف منو علاقة كمال دحيه بتراجع مستوي كرة السودان لو كان في العمر بقيه
سلك كهربا
لو سجلنا اونرامو ما بننساااااااااااااااااك
والي لقاء
سلك
babikir maki [b_silik@hotmail.com]
