سودانايل أول صحيفة سودانية رقمية تصدر من الخرطوم
بسم الله الرحمن الرحيم
في السلك
• الانتخابات انتهت وكل زولا عرف شجرتو
• لكن لسه صور المرشحين معلقه علي الجدران والاكشاك والبصات المركونه حتي في الشوارع الفرعيه
• منظر يجعل المواطن يخجل من قاده يشوهون جدران البلد
• ايها الناس
• الانتخابات انتهت وعادت الحياه عاديه
• حملات المرور , سلس الشماسه , بالمناسبه الناس ديل ايام الانتخابات مشو وين ماعارف , كأنو الامر لا يعنيهم , اتمني من المفوضيه في الانتخابات الجايه بعد خمسه سنين تعمل للشماسه ديل دوائر خاصه بيهم
• واحده للبرلمان عشان يكون عندهم زولهم
• وواحده في المجالس التشريعيه عشان يدلوا بدلوهم حول القوانين واللوائح التي تتحدث عنهم
• وواحده للمرأه الشماسيه لتناقش من خلالها الاعتراف للشماسيات بساعه الرضاعه المخصصه فقط للموظفات
• المهم انتهت الانتخابات
• الفاز والمافاز
• بنفس الهمه العلقتوا بيها صوركم في جدران المدن حقوا تهتموا وتزيلوها حفاظا علي جمال المدن
• يعني الفاز وخلي لينا صورتو معلقه ومشي ينعم بالمنصب , الدور الجاي الا يفوز بره البلد دي
• والمافاز وخلي لينا صورتو معلقه علي جدران المدارس والدكاكين والمحليات , المره الجايه لو نزل في ( الكوتشينه ) برضو بطير
• وتبقي بلدنا زين خاليه من صور المرشحين
• بعدين ليه انتوا فارضين علينا من الصباح كل يوم نقابل وجوهكم النيره دي ! بتفقدوا بريقكم بالصوره دي
• وبالمناسبه
• المحيرني تلقي مرشح عامل الدعايه الانتخابيه بتاعتو بلافتات سلك اكرين مضيئه
• وتلقي منافسو عامل دعايه في ورق تقول كان لافي فيهو باسطه
• مكرفس ومقطع واغبش
• واحد جاي من البحر عاين للحيطه جوار دار الرياضه لقي المرشحين والرموز
• قال ده مع منو ؟
• قالوا ليهو مع ديل
• وطيب ده مع منو ؟
• معاهم برضو
• يازول ! وده مع منو ؟
• قالوا ليهو معاهم برضو
• قال العزله دي ظلم والله
• وزي ما الانتخابات انتهت كورة الاسماعيلي برضو انتهت
• انتهت واحد صفر للاسماعيلي
• في عقر الدار
• واحنا اخوات
• ووحده وادي النيل
• يعني الهدف بهدف ما بهدفين
• السودان لايعتبر خارج الارض بالنسبه للمصريين
• وده مكسب للاهله
• واحد مصري ساكن الديم شغال سرامييك
• قابلني
• قال لي تعالي يا بكر
• ايه العهد الذهبي والكوره السودانيه والكلام الانا بقرا في الجرانين ده !
• قلت ليهو ايوه عهد ذهبي وكوره سودانيه
• قال لي طب لييييييه غلبناكم في ام دري مان ؟ يا عمي روح ببلاش هضربه فارغه
• قلت ليهو ناسنا خلوكم تغلبوهم عشان نحنا اخوات
• قال لي اخوات مين يا عم ؟ روح بلاش نيله معاك
• قلت ليهو ما اخوات ما اخوات , والله تاني الجزائر تلاقيكم هنا نشتري ليهم اربعمائة فرار وسكين ومطوه , والله جدي قاعد لي اسي , ايدو قدر ضهري ده , والله حالف يشيل النيل في الشماليه ويرش بيهو الخلا داك زي الخرطوش 0
• قال لي جدك يشيل النيل زي الخرطوش ؟ انت رحت البحر النهار ده يا بكر ولا ايه ؟
• قلت ليهو عشان ريقكم ينشف ونشوفكم بتشربوا من وين تاني ؟
• قال لي حانشرب كازوزا في الاسماعيليه
• سكته سااااي
• احرجتونا
• المهم
• واحد هلالابي قال لي انتوا ماشين معانا الكونفدراليه
• قلت ليهو لاقدر الله لو الترجي اتخطانا ما بنمشي الاسماعيليه اقصد الكونفدراليه طوالي
• قال لي كيف ؟
• قلت ليهو بنلعب مكرر ضد المهزوم من الامل عطبره والفريق الجزائري العينك شافتو في عطبره ده
• بعد نتخطاهوا حتي نمشي الكونفدراليه
• قال لي الوكت داك تلقونا هناك
• قلت ليهو هناك وين ! هي فوضي ؟ بعد الاسماعيلي يدخل المجموعات انتوا بتقابلوا المهزوم من الاتحاد الليبي والاهلي القاهري
• قال لي شنو ؟ منو ؟ كيف كيف ؟
• قلت ليهو زي ما سمعت
• قال لي اهلي مصري واتحاد ليبي ؟ الكونفدراليه زاتها السنه دي كعبه وما دايرنها
• نحنا ناس كبار بس يا بلاش
• السنه دي غايتو كاس السكان في تلتله
• البركه في كاس طهور اولاد الشيخ
• المهم
• واحد قيل في البحر
• رجع الضهر والحر سخنتوا علي العليهو
• الراس فاير والعيون حمر , يشوف ليك العربيه قدر البص , والبص يقول ده عنبر
• جا جوار الدكاكين الصغار الكتااار جوار الدايات
• واحد بتاع دكان مشغل الراديو
• كان في نشيد انا افريقي انا سوداني
• وجات في النشيد وصلة شمسك طلعت واشرق نوره بقت شمسييييييين
• صاحبنا قال صحي والله , انا زاتي قلت كده , لانو دي ما سخانة شمس واحده اصلو
• واحد قال حانرد الاعتبار في الاسماعيليه زي مازيمبي
• قلت ليهو بتردوهوا زي ما رديتوا اعتبار الفريق الجزائري المامشيتوا لكورة الرد لليله
• قال لي متين ؟
• قلت ليهو لما ادوكم اتنين وقلتوا مادايرين وماماشين لاعبيننا معوقين
• سكت
• قلت ليهو اسي عندكم نفس السبب ديمبا معوق وحموده معوق ( انتوا وين الاسم ده ) واسامه التعاون معوق والنعيم معوق واللديتر بدشر والسخانه شديده
• قال لي انتوا حا تتخطوا الترجي كيف ؟
• قلت ليهو بنلعبوا بعد الفطور طوالي
• المهم
• علمت صدفه ان الاخ ياسر الشريف قدم للمريخ في رحلة تونس عدد اثنين درع فاخر مصنوع في سك العمله من النحاس
• الدرع الاول قدمه المريخ للترجي والثاني للسفاره السودانيه
• كما قدم اعلام المبادله والاعلام الصغيره في لفته منه جعلت اهل الزعيم يتفاخرون بها
• لكن ياياسر انت بتعمل وما بتقول كيف يعرف الصفوه ذلك ؟
• عذرا اخي ياسر ان كنت قد افصحت عن شئ انت لاتريد ان تفصح عنه
• سنعود بالتفصيل لرجال يقدمون سرا للزعيم
• المهم
• اليوم نقابل المورده
• دوريا
• سنقابل المورده والتحكيم وبعض اندية الممتاز وبعض الحاجات التحت تحت
• ولكن لو اجتمعوا جميعا ليضرونا بشئ لن يضرونا الا باذن الله
• نحترم المورده كفريق منافس من حقه ان يحلم بنقاط المباراه
• عدا ذلك لن نحترم اي زول بيتدخل في هذا اللقاء
• اتوقع اداء جيد ومسؤل من جانب الزعيم
• تعالوا يا صفوه نجرب بروفة التشجيع للترجي
• بروفة تخطي الترجي
• يارب
سلك كهربا
لن ننساااااااااااااااااك لمن نجيب جويه باسمك
والي لقاء
سلك
babikir maki [b_silik@hotmail.com]
