فى أيدك جمره
وفى التانية سلاح
وفى رأسك
ولا فكره
بالواضح ورينا نهايتك
ان بعت الأرض لغيرك
او بعت ولاد الناس
فالثورة مقاسا مفصل
جبه
ومركوب
ما قدر البوت
ولا كاكى مظبط لى عسكر
او بوريه
بالواضح حيينا وامرق
وكتر خيرك
او سلّم تسلم
فى أيدك جمرة ثورة بتحرق
وفى التانيه سلاح ومنشّن
وعسكر جاهز
لى غزو الناس المعتصمين
قدام الديش
وهديك الفشقة
مغتصبة وتشكي
وحلايب راجياك
امرق من قصر الناس
الحارسة صقيعة العسكر
بطل تسويف
مش لو زرتوا قصور
المجرم بن سلمان
او تممتوا امام السيسي
العبو غيرا
فالمشهد مكشوف
والعالم بسمع وبشوف
سلمية الثورة
وقمع الديش
وملكى ولابس كاكى
وكمان جنرال…
فى أيدك جمرة ثورة بتحرق
فى التانيه سلاح
وذخيرة فشنك
لانو صدورنا الرحبة
بتحمى الثورة
وكل سراق اتآمر
قبض السعر التافه
وباعنا رخيص
لى أولاد زايد
احسن يتخارج من بدرى
فالثورة أساس الحكم الجاي
الثورة مقاسا مفصل
جبة
ومركوب
ما بوت
او كاكى مظبط فى ملكى
وكمان جنرال…
احمد ابنعوف
بغداد
يونيو ٢٠١٩
ahmedosman001@gmail.com
