أقرا السطور الماشه ديك
بين البرق وبروقو
وَعَوى الرعود الفي حلوقنا
والمتسلسلات الفوقو
وشوف كمان مطرتنا صابه بدون مزاج
حزنانه للبلد الكتيره حروقو
محروقة حشا
والشوق دا واقف ليو زمن
سهران يسائل في بحرنا الإنشوى
ونترانه فيهو عروقو
لمتين ح نحلم
بجية الزمن الفيو صغارنا يجرو
يكوركو
ويرسمو نجمة للآمال شهيه
يضحكو
وفي براءه يروقو
يا حليل الطيور الكان تصابحنا وتماسي
الأوحشا همس الندى الكان بنقط بالعسل من ذوقو
نظرتنا زي كيس الخضار سرحانه خاليه من الفرح
متورمه
في عيونا بادي الإنزعاج
ينقح
يزيد رِقْريقو
والقمري نايح زي يتيم
يجري
ويحاول يستعيد
فرحة زمانو الإنكوى
أو حتى ضحكات الضلام الشابه كان في بريقو
والنونه بت أستاذ أمين
يا حليلا دار بيها الزمن تغسل في هديماتا الزمان
معذوره
رَجْعَ الذكريات
شقاها نصين من عَدَمْ
خلاها بين كل القماري
غريبه
تايهه
ضاع مِنَّا الشروق بوشيهو قايد شوقو
وحتى ضفة النيل الحنينه
ودرانه البسمه بين إيديها
زي هَمَّ السفر
سرحانه في ليلا التقيل
جَرَّارِي في وجع الشجر
السامه فينا شقوقو
وأنا الغريب بين المنافي
أساسِك كل يوم في غرامي داك
في وطني داك
والروح بتغلي وتِنْصَدِمْ
وترجع تفتش من جديد
لحقوقو
أو خبرًا جميل
خبرًا يعيد لينا الأمل
لوطن حميد
سايل أمان
بالحب كمان رويان
بَطَلْ
وباين بين دروبو شَقِيقو
خلونا نطفي بين إيديهو تارات الخلاف
لغة الجحيم
وكسر الخاطر العريان دا تب
حرمان عليو
وتاني يا الله مايضوقو
وطن مليان تسابيح
في تراتيل في مقل
عذب الأغاني تروق في رِيقو
نزرع الحب بين ضفافو
ونرسم الفرح البيشبه روح ضفافنا
بسماهو نهتف
بالنجوم الراسمه فينا وَرِدْ عفافو
فَجُرْ سعيد
يغمر صباحاتنا الأميرة
يغني لينا
غنا السماح
البيهو يتوقف رعافو
ويمسح سحابات الرماد
يطفيها والزمن النفاهو
وشتت العقد القبيل حلمان وناير في سماهو
وفكَ حرب الشوم دي مننا
وطمَّن الشمس الحزينه
وهَدَّا في القمر ارتجافو
ويرجع الحب والسلام
ليك يا بلدنا
وبيك يا بلدنا
ويبقى بالمسك الختام
ويا شباب أمتنا
أمرقو أبنوها البلد
من بُكرا أبدًا
لا تخافو
عبدالماجد موسى/ لندن
seysaban@yahoo.co.uk
