المطار احتار

بسم الله الرحمن الرحيم

في السلك

•          المطار احتار حيره شديده خلاص

•          المطار متعود الناس لما تجيهوا مجتمعه بتجي فرحانه ومبسوطه لانجاز واعجاز

•          والمطار شاف الناس بتجيهوا بكراتين الحلاوه والهتافات

•          جرب الكلام ده في سيكافا الاولي

•          وفي مانديلا

•          وفي سيكافا التانيه

•          وفي الشارقه

•          وفي دبي

•          وقبل ديل كلهم في جوبا

•          وجرب الحكايه دي لما عاد البشير من اول سفريه بعد قرار اوكامبو الماسوره

•          يعني شاف افراح

•          لكن المره دي المطار احتار

•          دموع

•          نحيب

•          ناس بكت لما راسها لفه

•          وناس تتقالد وتبكي

•          وناس تجعر ومناديل ورق ماشايلنها

•          يقشوا ساااي

•          صالة زين الجديده لحقوها الزينين

•          انفلونزا خنازير يا كافي البلا

•          عباره قالها زول شاف زول بجعر وفييييط ختاها في الحيطه

•          حيرتوا المطار وفريقكم طار

•          الحتانه اتملت مافي طريقه الا تشوفوا ناس ودالبخيت

•          لو اتملت دردقوا طوالي علي كرري العجيجه

•          زول يمشي المطار يبكي !

•          الزول لما يجيبوا ليهو جثمان من بره بستقبلوهو نفرين وبكس

•          يجيبوهو جمب البيت

•          السكلي يقع ويلحقوهو عابدين

•          عابدين لي اسي مادفن القون الخامس

•          قالوا مستني شهادة وفاة القون الخامس

•          لانو القون الخامس ميت من بعييييد ما من هنا

•          فارشين في المطار ؟

•          فارشين تذاكر سفر ولا عقودات عمل ؟

•          جارتنا مريضه شويه

•          رقدوها الانعاش

•          لما جيت البيت اسلام كلمتني

•          وقالت لي مشينا كلنا وناس ماما وناس الحله شفناها مركبين ليها حاجات كتيره واجهزه

•          قلت ليها يابت في الانعاش الزياره ممنوعه شفتيها كيف مركبه الاجهزه ؟

•          قالت لي لقينا غفير في الانعاش زي كابوندي الناس كلها ماشه بعندو واصلوا ما وقف زول , جينا ماشين بيهو بسرعه زي موبوتو ماشافنا

•          قلت ليها يابتي الله يكتر الكابونديات في المستشفيات عشان نزور مرضانا

•          زول يبكي في المطار ؟ غرفة حقن ياكافي البلا

•          الناس ديل مع المطار اصلوا ماعندهم حظ

•          يا يمشوا يبكوا

•          يا يمشوا يستنوا قودوين

•          ياربي قودوين جا ؟

•          جمال قال بجي ؟

•          موبوتو قال جمال قال اجي

•          قلنا ليكم البقعد مع الوالي مابقوم

•          لغم مابقوم

•          تبكوا بس

سلك كهربا

                   البكي ما بجيبوا ليا 0000 اغنيه جميله لوغنتها ندي القلعه

والي لقاء

سلك