بارانويال كير .. بقلم: عزيزة عبد الفتاح محمود

الحلقة من برنامج ( ساعة تعجـّب) والذي يبثّ علي قناة (فضاء الفضائية) القومية ، يتجمع حول جهاز التلفزيون ، كل من يهمه مشاهدة الحلقة ومن الذي لا يهمه متابعة قضية كالتي أُعلن عن مناقشتها قبل أسبوع مضي ، وخصوصاً أن وزير الصحة بالولاية (د. بارانويال) شخصياً سيكون حاضراً داخل الإستديو وسيجيب علي أسئلة المتصلين مباشرة . كان لي شرف حضور الحلقة ، حتي أنني حاولت كثيراً الأتصال بالأرقام المثبتّة علي الشاشة في محاولة مني لشكر د. بارانويال لإستقطاعه من وقته الثمين والغالي جداً والذي تنطبق عليه تماما ًالحكاية التي تدلل علي قيمة الزمن بالنسبة لشخصيات تقارب سيادته ، عودة الي حلقة د. بارانويال والتي حاولنا فيها رصد بعض ما جاء فيها محاولين قدر الإمكان توّخي الدقة فيما أدلي به سيادته :
مقدمة الحلقة : سيداتي سادتي ، نلتقي اليوم في حلقة إستثنائية مع السيد وزير الصحة بالولاية ، د. بارانويال وأنوّه السادة المشاهدين بتخفيض صوت التلفزيون وأن يستمعوا لنا من الهاتف و ..
د. بارانويال : آي بالله ، مش كل مرة خفّضوا صوت التلفزيون ، خفّضوا صوت التلفزيون ، يا جماعة الزمن… الزمن، إتفضلي يا أستاذة.
مقدمة البرنامج : سعادة الوزير بتجينا دايما ً أسئلة كتيرة عن واقع المستشفيات وخصوصا ً أقسام الطوارئ ودرجة تأهيلها، حتي أن بعض المرضي بينتظروا ساعات طويلة عشان يجي طبيب .
د. بارانويال : مالها درجة تأهيلها ؟ أنا هسة جاي من قسم الطوارئ الرئيسي في الولاية ، حتي إضطريت أركن عربيتي لمسافة كيلو من شدّة الزحمة ، وكلـّو شئ تمام ، وبعدين كيف مافي طبيب ؟ إذا مافي طبيب ، مافي طبيبة ؟ كدي عليك الله هسة إنتي مصدقة الكلام دا ؟
مقدمة البرنامج : هئ ..هئ  ، أعمل شنو سعادتك المنتجين قالو لي ألتزم بالإسكريبت . في إتصال ؟ .. ألو منو معاي؟
متصل رقم 1: عايز أسأل الدكتور
د. بارانويال : أيوة الدكتور معاك ، أها أسأل.
متصل رقم 1: يادكتور أنا لي خمسة شهور كلما أمشي المستشفي يقولو لي الأخصائي ما بجي الليلة ولّا الأخصائي مسافر .
مقدمة البرنامج : إنت ساكن وين ؟
متصل رقم 1: أنا ساكن في القرية 40 محلية (تجو عايدين) ، منزل رقم 600
مقدمة البرنامج : طيّب أقرب مستشفي ليك شنو ؟
د. بارانويال : أقرب مستشفي ليو مستشفي (كلوّ في ) ، لكن هسة حتؤول للولاية ، في ترتيبات إدارية كدا مع السيد الوالي إنو نحولها لمستشفي خاص، لكن شنو ؟ بأسعار زهيييييييييدة ، يعني تاني يا ناس تجو عايدين كلكم ممكن تجو تتعالجو فيها ، وعلي فكرة يا أستاذة ويا السادة المشاهدين أنا علاقتي قوية جدا ً بالسيد الوالي (فـرد بس) ، وقبل كدا وصلتو وشايات كتيرة عني ، لكن السيد الوالي زول حكيم ، قال ليهم : بارانويال دا إتنازل من مرتبو البتديهو ليو الحكومة وإتبرع بيهو كاملا ً.
مقدمة البرنامج : صحي ..؟ صحي..؟ سعادتك ما بتصرف مرتبك من الوزارة ؟
د. بارانويال : عليك النبي ، في راجل بقدر يعمل كدا ، وخصوصا ً إذا عايز يفتح بيت تاني ..آ..آ أقصد مستشفي تاني ؟
مقدمة البرنامج : يعني سيادتك عايزين تفتتحوا مستشفي جديد ؟
د. بارانويال : الحكومة بالظروف الحالية دي شفخانة ما بتقدر تبينها ، أنا ..أنا.. حأفتتح مستشفي جديد ، السيد الوالي عرض علي شراكة جديدة نعزّز فيها التلاقح المهني ورأس المال ويا جماعة دا تشجيع للرأسمالية الوطنية … ممكن نطلع فاصل يا سوزي ..؟
zizetfatah@yahoo.com