أصل الحكاية
إلي وقت قريب كان في أشياء مشتركة بين الأطفال ، منها أكل الجيران ، يعني لو عندك شافع ، والشافع ده إتأخر في الشارع ، وجاء وقت الأكل والدته فقدته ، وفتشوا لقوا عند الجيران ، وجابوا من الجيران ، وبعد شوية جابو الأكل قالوا لي يلا تعال عشان تاكل ، بقول ماداير ، مالك ماجعان ؟ ويجي الرد من الشافع أكلت عند الجيران ، ومايسكت ويواصل في شرح تفاصيل أكل الجيران ببراءة الأطفال ،( أكلهم حللللللللللللو مازي حقنا )، ودي طبيعة عند معظم الأطفال حتي لو الأكل بره البيت لو كسرة بي موية ، بكون عند الطفل أحلي وأطعم أكل في الدنيا .
طبعا الكلام ده زمان ، مازمان شديد ، لكن برضه ماقريب شديد ، لأنه حاليا مافي جيران ، ولو في جيران مافي أكل ، الأيام دي ناس المريخ عاملين زي شفع الزمن داك ، عندهم تمريرة هيثم زي أكل الجيران ، طعمها حللللللللللو ، ماعندهم حاجة غيرها ، تفتح أي جريدة ، تقعد مع أي واحد تلقي الكلام عن التمريرة وشفت التمريرة ، وعمل التمريرة ، ووصلت التمريرة ، وكأنه مشكلة المريخ تمريرة ، وطبعا ده وهم كبير وجزء لايتجزا من عقدة المريخ الدائمة بالدونية في مواجهة أي شيء متعلق بالهلال حتي لو تمريرة سيدا وهنا بتظهر نظرية أكل الجيران.
المريخ بالأرقام ماعنده مشكلة في الهجوم وبقول الكلام ده ليه ؟ عشان نعرف قيمة التمريرة ، في الخمسة مواسم الأخيرة المريخ أفضل هجوم في الدوري الممتاز ، وفي الخمسة مواسم الأخيرة هداف الدوري من المريخ ، كلتشي حقق الهداف أكثر من مرة في المريخ ، وهيثم طمبل حقق لقب الهداف أكثر من مرة في المريخ وكسر الرقم القياسي ب21 هدف ، وتساوي معه كلتشي بالوصول لذات الرقم (21 هدف) ، كل هذا التفوق الهجومي بدون تمريرة من سيدا .
وماشين بعيد ليه؟ هيثم مصطفي (سيدا) مالعب مع الهلال في الموسم الأخير أكتر من تلاتة أو اربعة مباريات ، يعني بالأرقام شارك بنسبة ضعيفة للغاية ، ومع ذلك إستطاع المهاجم السنغالي سانيه إحراز 13 هدف في دورة واحدة هي الدورة الثانية ومعلوم أنه لم يشارك في الدورة الأولي لأنه إنضم للهلال في فترة الإنتقالات التكميلية ، ومن جملة ال13 هدف التي أحرزها سانيه لعبت تمريرة سيدا دور في هدف واحد فقط ، وبالارقام هي أيضا نسبة لاتكاد تذكر ، بعض التحليلات أعطت مؤشر إلي أن سانيه هو الهداف الحقيقي للبطولة قياسا بالاهداف التي أحرزها في دورة واحدة .
الزمبابوي سادومبا مهاجم الهلال السابق ، فاز في الموسم الأخير بلقب هداف الكنفدرالية في البطولة الأفريقية ، بدون تمريرة واحدة من سيدا .
إذا سألنا ناس المريخ بحبوا أكل الجيران ليه ؟ أقصد بحبوا تمريرة سيدا ليه؟ وسيدا نفسه مالعب في الموسم الأخير مع الهلال ومع ذلك نجح الفريق في الفوز ببطولة الدوري الممتاز بدون هزيمة ، مش الممتاز بس ، الموسم المحلي كله بدون هزيمة لأنه الهلال خسر كأس السودان بضربات الجزاء ولم يخسر أي مباراة في هذه البطولة داخل الملعب .
المريخ وضح وبما لايدع مجالا للشك ، إنه نادي أو فريق الأحلام الصغيرة ، ووضح إنه قمة الطموح عندهم تمريرة من هيثم ، عشان يهتفوا ( سيدا .. سيدا .. سيدا) وأكل الجيران طلع حلللللللللللللللو حلا .
hassan faroog [hassanfaroog@hotmail.com]
