ركز تكسب .. بقلم: حسن فاروق

أصل الحكاية

لاتحلموا بعالم سعيد ، فنحن موجودون لتحويل احلامكم إلي كوابيس ..
إنتو منو؟ الله .. نحن الساس ونحن الكأس ..نسيت الجوي ياأب رفاس .. بتتكلم عن التاريخ ؟ نحن التاريخ إنتو شنو وأنتو منو؟ نحن الدنيا تعرف الدنيا يا إنسان؟ الدنيا لامانا ونحن راسها إنتو وين في قاعها .. طرفها .. نصها ؟ بتحلم وإنت في اليقظة .. اصحي يازول وعاين تحت رجلك وفوق راسك عاين بعيد .. بعيد .. بعييييييد ، فوق في ناصية السماء القبلي ، شوف وقول ، ده إسمو الليل .. لكن الماعارفو إنت إنه الليل بزيحو نهار ، وإنت مابتقدر تعيش من غير ستار الليل ..
منو القال ليك ؟ منو القراك الكتاب من الآخر .. منو الخلاك تشوف الدنيا بالمقلوب وسواد الليل تحسبو هبوب .. كان لازم تسأل وتعرف إنه الليل خشم بيوت .. في ليل أسود تشوف فيهو طشاش .. وفي ليل سواده حالك مابتفرز معاهو أصبعك جنب عينك .. وفي ليل . ده ليلنا بقي .. سمعت بالليالي المقمرة ، وقمر 14 وجمال النيل والخرطوم بالليل .. أنا أساس القمر ده، أنا الهلال وأنت منو؟ أنا النجمة .. نجمة واحدة مابتظهر جنب الهلال .. ولو بقينا نجوم .. حدد ملامحك ، نجمة ولانجوم .. أنا المريخ .. عرفتك ، كوكب بعيد عشان تشوفو داير عالم متخصص في الفلك ومنظار كبير يوريك منه إنت وين .. وده الفرق أنا ظاهر وواضح ومامحتاج لإثبات نسب .. لكن إنت ممكن أشكك في شهادة ميلادك وتسنينك وشهادة التحليل .. أنا الهلال معروف بظهر متين وببقي قمر متين .. إنت وين ؟ مافي إلا في فنيلة الفريق .
وحتي دي فيها خيال الرسام لأنه النجمة البعيدة هناك مازي دي ، ده واحد فنان عمل شكل تقريبي ما أكتر ..

مهما تقول وتحاول تبخس الأشياء وتصغر الإنجاز أقول ليك (المابتحصلوا فلعوا) ونبقي برانا ملوك الجو .. إنت الجو إلا تشوفوا من البيت ، أو زيارة بي طيارة ماشة وجاية من مشوار.
بين الهلال والنجمة صراع تاريخي ، بين الارض والجو .. ويوم السبت (بكره) صراع جديد علي الكورة بين الهلال والمريخ .. يحاول من خلاله كل  طرف تأكيد افضليته وسيادته علي الكرة السودانية .. في واحد من اشهر ديربيات الكرة الافريقية ..
يبدو ميزان المباراة متساوي في الكفة ن ويعطي المؤشر 50% لكل فريق ، رغم إجتهادات بعض المحللين لإعضاء طرف التفوق النسبي علي الآخر، تختلف مباراة السبت عن بقية لقاءات الفريقين أنها ضمن منافسة الكنفدرالية الافريقية ، الشيء الذي يضع التفوق فيها ضمن أحلام الفوز ببطولة خارجية للفريقين ، تفوق الهلال يقربه كثيرا من الحلم الذي طال إنتظاره ، وتفوق المريخ يزيد من حلم الكاس الجوية الثانية ..
وإن كان في تقديري ان الأكثر تركيزا في لقاء الغد هو من سيكسب . فمن يركز؟ سؤال إجابته بعد المباراة.
hassan faroog [hassanfaroog@hotmail.com]