سودانايل أول صحيفة سودانية رقمية تصدر من الخرطوم
بسم الله الرحمن الرحيم
في السلك
• خالتي لي اسي بتصلي في الظهر بالليل
• قدر ما قلنا ليها ياحاجه افهمينا حلفت ما تتناقش في الموضوع ده
• قلنا ليها ياحاجه ده زمن جديد دي كشافات
• قالت كل شئ عرفناه اتغير كمان النور بتغير ؟
• قلنا ياحاجه اي شئ اتغير 000 ده الزمن الجميل للصفوه وزمن المسمسه للآخرين
• قالت المسمسه دي شنو ؟
• قلنا ليها زمن ( المس ) كول وزمن المسيار وزمن ( المس اندر استاند )
• قالت المس كول سمعت بيه والله قالوا الناس شدت ما عينهم بقت قويه بقوا يمسكلوا في المواصلات
• خجله ساااي من الناس الجمبو مافي
• ولا احترام للناس
• البوبار في بيت الايجار
• والغريبه في ناس بضربوا عديل
• يتكلموا باعلي صوت
• المحايه الفي الباغه الفي التلاجه الخاتنها بعد باغات المويه بقولها
• الحافله كلها تعرف الناس ديل كاتبين راجل اختهم
• قامت خالتي عاينت للكشافات الجداد وقالت الظهر الليله ما اذن لي اسي مالوا ؟
• عدلت جلستها وقالت المس كول عرفناه المسيار شنو ؟
• قلنا ليها المسيار ده في الزواج
• قالت زواج جديد يعني
• قلنا ليها المسيار ده يعني الزول يتزوج زوجه يشترط عليها عدم الانفاق ولا يلتزم لها بمسكن ولا يساكنها ولا يبيت عندها 0
• قالت كيفن يعني ما يبيت عندها ؟ ويلدو متين ؟ يجيها زي سيد اللبن بالنهار ويفوت ؟ عيب العدو
• قلنا ليها ما بنفق عليها
• قالت والقوامه دي كيفن ؟ رجال بناطلين ساي ؟ والبنات كان رضن بالوضع ده الرجال برضوا ؟
• قلنا ليها الرجال راضيين
• قالت يا حليل الرجاله 000 الرجال ماتوا في كرري
• قلنا ليها ولايلتزم لها بمسكن
• قالت يعني يسكن مع اهلها ؟
• قلنا ليها يجوز
• قالت كان كدي البلد دي كلها مسيار 000 سايره ساكت من زمان 00 اتاري بقولوا السيره
• قلنا ليها كيف ؟
• قالت اي زول من اهلكم الكبار ديل بدا حياتو مع اهل المرا 000 مسيار 00 وفي واحدين لامن اولادهم اتزوجوا هم قاعدين مع نسابتهم زي 000
• قاطعناها 000 لا ياخاله 00 خلي الطابق مستور
• قالت الطابق بظهر وما بنستر 00 اسي طابقكم الجديد ده انستر ! ما ياهو داك يسر الناظرين
• والغريبه حوض السباحه
• قلنا ليها ومسيار زمنكم ده شغال لي اسي ؟
• قالت شغال 000 ناس الولايات الشغالين في الخرطوم ديل ومتزوجين الواحد خالي زوجته مع اهلها يمشي ليها الخميس الخميس زي الخطه 00 واسي لما فتحوا( بالتشيد علي التاء ) شويه وقعوا بنات البلد دي الفاتن القطر وسكنوا معاهن مسيار ساكت 000 ترانا سايرين يا وليداتي
• قلنا ليها وتاني ؟
• قالت في كورتكم دي الزول البعيد تسجيلوا مع الجماعه وعارفهم ما بدوهو حقو ده ما مسيار ؟
• ضحكنا 00 وقلنا ليها فضل المس اندر استاند
• قالت وده شنو كمان ؟
• قلنا ليبها دي يعني الفهم الغلط
• قالت ده ماياهو زي الزول البعيد تسجيلو وعارف ما بدوهو حاجه
• قلنا ليها لأ 000 ده سوء الفهم
• قالت بعرفو 000 سامعه اليومين دي الوليدات كلهم بقولوا للبنيات اوعي تكوني فهمتيني غلط لكن انا ما عارفه موضوعهم شنو00 ده ما ياهو المس اندر استاند ؟
• قلنا ده نوع من انواع المس اندر استاند
• قالت , زمن , البنيات اتجرأن , الخوف يجي يوم البنيات يقولن للوليدات خايفه تكون فهمتني غلط
• قلنا ليها يوم زي ده انشاء الله مانحضروا
• قالت غلط , ماتقولوا انشاء الله مانحضروا , قولوا ان شاء الله ما يجي
• اتلفتت علي وبرااااااااحه همست
• جمال قال يوم زي ده بجي ؟
• قلت ليها جمال قال يوم زي ده بالذات ما بجي
• اها
• قالوا يوسف محمد يمهل الهلال تلاته يوم
• استتابه ياربي ؟
• تلاته ليه يا يوسف ؟
• الفراش بقي يومين
• بعدين تمهل لي شنو ؟
• ماقالوا مسجل
• بي مسد كول
• البس سااي يايوسف والحق التمرين
• ولا قول الحقيقه
• قول مامسجل
• في صحيفة قون امس قريت عنوان جميل
• فييرا يملك كاريزما
• قلت ياربي ووووووين كوارزما ؟
• جمعية الاصلاح قربت
• سخن ياولد
• اتمسمسي
سلك كهربا
نسيان لأ نهي
والي لقاء
سلك
babikir maki [b_silik@hotmail.com]
