أصل الحكاية
مضحك لدرجة (القرقرة) رئيس مجلس إدارة نادي المريخ المنتهية ولايته (الكم ماعارف) وهو يعلن أنه سيخوض الإنتخابات (مستقل) أتحدي أي شخص يقول فاهم حاجة.. يعني شنو مستقل ؟ ماعندو حزب مامسنود من الحكومة .. الحكومة ماعندها علاقة بإنتخابات المريخ ؟ يعني شنو مستقل ؟ ماعندو قائمة ؟ ماعندو علاقة بالمرشحين في المقاعد الأخري؟ ماشاوروهو في نائب الرئيس والأمين العام وأمين المال ؟ ماقعد في إجتماعات في غرف مغلقة ومفتوحة للوصول للمجموعة المرشحة لتشكيل المجلس القادم ؟
يعني شنو مستقل؟ يعني ماعندو راي في ترشح عبدالله حسن عيسي لمنصب نائب الرئيس وترشح عصام الحاج وطارق عثمان الطاهر وطارق سيد المعتصم للأمان العامة وترشح خالد شرف الدين لأمانة المال وبقية أعضاء المجلس؟ عندنا في الحياة العادية لما تشعر أنه في واحد عايز يتذاكي عليك بتقول ليهو شايف القنبور ده .. وإنت ياجمال الوالي شايف القنبور ده؟ مستقل وإنت إخترت كل أعضاء المجلس القادم .. مستقل وإنت حددت عايز منو وماعايز منو؟ عايز تقنعنا إنك بره اللعبة وإنك لاحول ولاقوة لك في كل مايجري من حولك ؟ لا بالله صدقنا زي مابقولوا وتلقاها عند الغافل في أقوال أخري ..
خلي الصحافة وبقية وسائل الإعلام إحترم ناس المريخ .. خلي ناس المريخ إحترم ناسك معقولة رئيس نادي (بحرد) ويطلع من الأستاد لو جابو قون في الفريق ممكن يكون مستقل؟ خلي دي رئيس نادي كل المجالس العملت معاهو ضعيفة وهو الوحيد القوي ممكن يكون مستقل؟ خلي دي رئيس نادي تمانية سنة مافي مجلس عارف إلا العايزو يتعرف ممكن يكون مستقل؟ خلي دي رئيس نادي كل سنة بفوز بالتزكية ممكن يكون مستقل؟ خلي دي رئيس نادي من جاء لغاية الإنتخابات الجاية مافي زول قادر يقول ليهو (لا) تخيل المريخ الكيان العريض ده ولازول.. ممكن يكون مستقل؟ ماممكن طبعا ..
لانه هو البختار المجالس وهو البعلن كل إنتخابات فشلها وضعفها وعدم إنسجامها كلام مكرر من زمن حسن عبدالسلام وناس ابوجريشة ومجموعة ماكان يسمي بالنهضة قبل المصالحة وحتي من إنشقوا من مجموعة أمدرمان ..
الظاهر جمال الوالي شعر بالملل من كلمة (مستقيل) وقرر تغييرها بكلمة (مستقل) ورغم إنه صاحب الرقم القياسي في الإستقالات لكن ما إستقال وهو برضو ما (مستقل) والفرق كبير بين النزول الإنتخابات من غير منافس في مواجهته وبين مرشح (مستقل) ..
الوالي الهاوي زول الحكومة وفتي الحزب الحاكم المدلل معجب بالمصطلحات السياسية عشان كده بصدرها للرياضة فهو مثلا عارف إنه مانازل الإنتخابات (مستقل) لكن عاجباهو الصحف الموالية للنظام الحاكم ومكتوب في ترويستها صحيفة يومية سياسية مستقلة .. وهو عارف وانت عارف وأنا عارف إنها مامستقلة وبرضو بكتبوها .. ومافيش حد أحسن من حد عند الوالي الصحف (مستقلة) وهو(مستقل) وكلو عند العرب صابون .. وشايف القنبور ده؟
خروج المنتخب الوطني
يافرحة ماتمت خرج منتخبنا الوطني من نصف نهائي بطولة شرق ووسط أفريقيا بعد الأداء المتواضع في البطولة الأكثر تواضعا وهو في تقديري خروج متوقع مع قناعتي الكاملة أنه حتي لو فاز بلقب البطولة لن يكون مقياسا لأفضلية تجعل لنا حظوظ كبيرة في التأهل لمراحل متقدمة في نهائيات أمم أفريقيا القادمة .. فكما ذكرت أكثر من مرة في هذه المساحة أن عملية التجريب الواسعة التي تتم لعناصر المنتخب المشارك حالف التوفيق فيها الجهاز الفني لان التوقيت الحالي يفترض أن تكون فيه ملامح الفريق الكاملة قد وضحت قبل إنطلاق البطولة بكثير .. ولكن قدرنا أن نظل في دائرة التجريب وأن يتوقف حدود الطموح عند التأهل فقط .
hassan faroog [hassanfaroog@hotmail.com]
