حقيقه دى كلمة من جواي
تعالو نعيش ونتسامح
ونشدو نسيجنا بي قوه
ونفشِّل هجمة البحفر
ليسرق مننا أولادنا
ومعاه يشيلا خيراتنا
تعالو مع بعض نهتم
بكل أمان وصدق كمان
ندفن كل خلافاتنا
عشان نعبر لقيف هادى
فيه سلام وكل أمان
ودا ما ببقي إلا نتصالح
ونقلع كل جزور للفتنة
نابته هناك في جوانا
نصدق في حوار هادف
عشان نعبر مع أولادنا
لوطن حدادي نحلم بي
نلاقح طيب علاقاتنا
لتننتج ود كبير بينا
تصلح بيه أحوالنا
يلا تعالو نشد حيلنا
ندعم ناس حكومتنا
لنعبر كلنا الوادي
وندفع كل متخازل
بقوتنا عشان يبعد
وتبحر آمنه مركبنا
لوطن حدادي يجمعنا
وطن فيه الفرح باسط
وما ترجع خلافاتنا
قبل بكره يفوت
يجري و مايرجع
قبل بكره يفوت
يجري وما يرجع
ونلقي نفسنا في سهله
فيها البوم يرفرف
فوق جيف ناسنا
أخير يا ناس نفوِّت
فرصة البهدم لأسوارنا
ونقتل بذرة خلاف بينا
ونأسس لى حكم عادل
ينصف كل قبايلنا
نحلحل بيه قضايانا
وما يبقي ظلم بينا
ونهدي لغيرنا ويهدينا
كل الحب و أمن كمان
وكل زولاََ يعيش طيب
و وين ماراد يلقي الضل
لقمه كريمه فيها أمان
لا بوليس يشيل حقو
ولا مُسلَّح يحرق أهلو
ودا ما ببقي إلا نتسامح
بعد نمسح دمع مظلوم
ونجيب حقو من ظالم
ونمد إيدينا لي غيرنا
بكل ترحاب و حب كمان
عشان تعبر مراكبنا
عشان تعبر مراكبنا
إسماعيل الشريف سليمان
26 أغسطس 2020
