(فَبَعَثَ اللَّهُ غُرَابًا يَبْحَثُ فِي الْأَرْضِ لِيُرِيَهُ كَيْفَ يُوَارِي سَوْءَةَ أَخِيهِ ۚ قَالَ يَا وَيْلَتَا أَعَجَزْتُ أَنْ أَكُونَ مِثْلَ هَٰذَا الْغُرَابِ فَأُوَارِيَ سَوْءَةَ أَخِي ۖ فَأَصْبَحَ مِنَ النَّادِمِينَ )
ما ح اشرح الآية دي لكن بعتقد ذي ما ربنا بعث الغراب بعث الحرب بين فاغنر و الجيش الروسي عشان يعلم الوهم ديل كيف يتم حل الخلافات العسكرية بين أبناء الوطن الواحد حتي لوكان بين جيش و مليشيا .
__ فاغنر قالت ما ح تدخل موسكو حفاظا علي الدم الروسي و المؤسسات الوطنية
__ الدعم السريع محتل ٣٩ مستشفي ويطمع للمزيد و نهب اي بنك و اي شقة واي سيارة دفع رباعي . .
__ الحكومة الروسية قالت قبلنا بالتفاوض مع فاغنر من أجل الوطن والمواطن ..
ما قالت طيارات السخوي قاعدة مع انها هي البتصنع السوخوي ..
__ ما قالت نحن تالت جيش في العالم بعد امريكا والصين
وما قالت نحن اصحاب اكبر ترسانة نووية ….
__ ما طلع الخبير الاستراتيجي فتح الرحمن محي الدينوف وقال 24 ساعة و فاغنر ح نمسحها من الوجود .
ولا طلع الفريق بكراوينوف يبشر بالنصر خلال 72 ساعة .
__ اقعدوا قعد نصكم جيش علي دعم سريع و ختوا مصلحة المواطن أولوية وانسوا النفخة الكضابة أصله الفرق بيناتكم زي احمد و حاج احمد ….
الدعامة شغالين نهب في بيوت المواطنين والجيش شغال قصف من الجو وتكسير برضوا في بيوت المواطنين .
__ناس بل بل بس اسكتوا سكت حسكم دي مباراة والله ما بتنتهي لانه حكمها خارج السودان ولو صفر ليهم الحكم الاتنين ح يضعوا السلاح فورا و ما خسران الا المواطن …
__ وقتها حميدتي ح يعتذر ليكم ويقول ليكم الحصل ليكم ده من الفلول و الجيش ح يقول ليكم الحصل ليكم من الجنجويد .
__ زمان الجيش و الجنجويد لما كانوا سمن علي عسل كان بقولوا الجرائم دي من طرف تالت هسا اقسم بالله بعد يتفقوا ح يرجع مسلسل الطرف التالت .
__ المشكلة دي كلها مصالح شخصية وليس من أجل الوطن لانه الوطن ياهو الناس البتموت سمبلة ساي دي وهو البنية التحتية البردموا فيها الطرفين ويكبروا الله اكبر وهو المواطن البنزح أو يلجأ من بيته عشان يمشي حتة تانية طلبا للأمن و لقمة عيش .
الوطن ده ما قيادة عامة ومعسكرات دعامة ولا عتاد حربي ودبابات …
الوطن هو المواطن…
يا ريت الطرفين يتعلموا من فاغنر و الجيش الروسي .
د متم سالمين
د احمد الطيب إبراهيم
استشاري جراحة الكلي والمسالك
25/6/2023
