سودانايل أول صحيفة سودانية رقمية تصدر من الخرطوم
أصل الحكاية
في أفلام بتنتجها السينما الأمريكية مربوطة بالخيال زي الحالات الوبائية البتضرب مدن كاملة ، قبل يومين شاهدت فيلم من نصه وماتميته بطولة النجمة الاسترالية الشهيرة (نيكول كيدمان) والتي سبق أن حصلت علي جائزة الأوسكار عن فيلم (الساعات) ، وهي زوجة سابقة للنجم الامريكي الشهير (توم كروز) ، المهم الفيلم فكرته تدور حول حالة وبائية تضرب إحدي المدن وإنتقال العدوي للسكان عن طريق الفم بإفراز مادة لزجة للشخص السليم تضرب خلاياه وتحوله إلي شخص عدواني يبحث عن الأصحاء لنقل العدوي إليهم ، وفي لحظة تحول معظم سكان المدينة إلي نماذج تتحرك بطريقة آلية ونظرات ميتة ، لم أكمل الفيلم لأفهم السبب وراء هذه الحالة الوبائية ، مثل مالم أفهم السر في الحالة الوبائية التي عشناها مع المدرب الفرنسي الإيطالي الأصل غارزيتو في مباراة الهلال أمام الأهلي عطبرة .
مرض جماعي ضرب فريق الهلال ، بسبب التشكيلة الغريبة التي لعب بها المدرب الفرنسي الايطالي الأصل غارزيتو المباراة ، زي الزول الاكل فتة عليها كم علبة تونة ومش وبصل كميات مع جبنة وطماطم وتوم وشمار وقائمة طويلة من البهارات والإضافات لإنجاز فتة خمسة نجوم علي وزن فندق خمسة نجوم ، وبعد الفتة الكاربة ترقد عشان تنوم وبدل ماتنوم تشوف حاجات غريبة ، فداسي أساسي في خانة مهند ومهند إحتياطي ، ومرات تشوف بويا المساك الشمال قلب دفاع في خانة مساوي ومساوي مافي ، بعد شوية تعاين للمساك اليمين تقول ده كايا؟ تلقي سنكارا ، وكايا اليمين بقي شمال ، وتفتش علي كاريكا في اليمين المتقدم تلقي بشه ، وكاريكا المتأخر بقي متقدم وجاب قون وصنع قون ، وتعاين لتراوري تلقي سانيه ، والمعز بقي جمعة جينارو ، ومساوي من قلب دفاع بقي إرتكاز وكابتن كمان شفتو ( الفتة) وعمايلها ؟
كابوس من كوابيس الفتة الكاربة عشناه مع غارزيتو ، والهلال يقدم أسوأ مبارياته في السنوات الأخيرة ، المكسب الوحيد عودة كاريكا للتألق والصناعة والتسجيل بعد غياب طويل ، لا أحد يستطيع تفسير ماحدث يوم مباراة أهلي عطبرة ، ولو ماأخاف الكضب أقول غارزيتو ذاتو ماعارف الحصل شنو ؟ ، أول حاجة جات في ذهني غارزيتو وقع العقد النهائي ولا لسه؟ لو لسه تكون مصيبة ، ولو وقع تكون مصيبتين ، لو لسه ماوقع العقد قدام المجلس واحد من خيارين عاجلين إما يوقع معاه عشان يقدر يحاسبه أو يتركه يذهب ، وهنا ممكن أستغرب للسبب الخلا البرير وبعض أعضاء مجلس في إجتماع عاصف مع غارزيتو بعد المباراة ، لانه لو ماوقع العقد ح تقول شنو؟ أي سؤال من المجلس أو رئيسه حايقول أنا شغال لغاية الآن بدون إتفاق رسمي ومفروض تشكروني علي كده مش تسألوني .
أما لو وقع العقد فالمصيبة زي ماقلت مصيبتين ، لأن ماشاهدناه في مباراة أهلي عطبرة وقبلها الشوط الثاني قدام نيل الحصاحيصا فيه عدم إحترام للخصم ودي ألف باء تدريب ، وطريقة تبديلات كل مباراة والموسم لسه في بدايته معناه الرجل ماوصل إلي الآن لتشكيلته المثالية والدليل إنه بيتعامل مع المباريات التنافسية زي المباريات الإعدادية ، كل مباراة أربعة خمسة لاعبين جدد ، وتعديل في مراكز اللاعبين .
كابوس (غارزيتو) أدخل الخوف في قلوب أهل الهلال ، والفريق مقبل علي مواجهتين كل واحدة أصعب من التانية أمام المريخ والفريق الإيفواري بالبطولة الأفريقية ، وربنا يكضب الشينة .
hassan faroog [hassanfaroog@hotmail.com]
