بسم الله الرحمن الرحيم
في السلك
• البدري صرح بتصريح اعتبره مسؤل جدا
• ومن ضمن كلامو قال في لاعبين مافي قامة المريخ
• ومن ضمن كلامو قال هناك نقص في الفريق
• انا شخصيا اري ان هذا التصريح مفيد وصادق
• اولا مفيد لان اي لاعب اصبح مهددا بالابعاد من المريخ لضعف المستوي
• يبقي اي لاعب حايحاول ان يجتهد بقدر الامكان حتي لايكون من المستغني عنهم
• ثانيا اتذكروا الموسم الماضي
• كل الجمهور كان مقتنع بان هناك لاعبين لايشبهون المريخ
• وطالبوا بشطبهم
• فقط اختلف الجمهور حول العدد
• ناس قالوا تلطاشر
• وناس قالوا خمسطاشر
• وناس قالوا سبعطاشر
• يبقي البدري ماجاب كلام من راسو
• ياناس
• تاني سكات مافي
• مجاملات مافي
• طول بال علي زول متقاعس مافي
• الدايرنا عيشة عز
• والمابينا ماحبابو
• مادايرين نحتاج للافتات العبوا لعب الابطال
• دايرين نشجع وبس
• نشجع شديد
• وزول ما شديد ما بتشجع
• ولا شنو ؟
• ولنترك المدرب يشتغل
• وبعد داك نحاسب
• غايتو انا شخصيا مابجامل لاعب ولا اداري ولا جهاز فني
• اقل مجامله هي خصما علي المريخ
• والخصم علي المريخ ماحبابو
• المهم
• امس اتفرجنا في مباراه من مباريات شان
• شان شنو
• كانت ملعبوبه في العرضه شمال
• ماشاء الله
• مباراه فريده من نوعها
• اتلعبت ( ام غمتي )
• جنس ضلمه
• ولكن كان يتخللها (اسبوت لايت ) spot light
• تحلف تقول لاعبين في مسرح
• المسرح الشكسبيري القديم
• الممثل من خلال الظلمه يقف في بقعه دائريه مضيئه
• ويردح
• يسمع ليك شخوص المسرحيه جنس صفقه
• من ولدوهم ما سمعوا بيها
• يكون فاض بيهو خلاص
• ويشبكهم ليك
• هيييييي وهييييي وتاني هييييييي
• تختوا اللبن للكديسه
• ولما تجيكم تقولوا ليها بس !
• علي كيفكم !
• المهم
• كانت الاضاءه تشبه في شناتها شان
• شان شنو
• تشبه الشنا زاتها
• استاد بورتسودان مالو ؟
• عيبوهوا لي
• قبل كده اتفرجنا فيهو علي قون مقدم
• واااااااااااااااااضح
• زي عين الشمس
• كشافات زي سنون السكري
• واحده في وتلاته مافي
• قال حركه وطنيه قال
• عليك الله ياخالد عزالدين الحركه العملها استادكم امس دي حركة وطنيه ؟
• حركات شفع ساي
• استادنا زعل
• الموضوع فيهو اجانب
• عاين لي استادكم من محلو
• الكشافات بتاعتنا ماطوااااااال
• اتلفتن من محلهن
• وقالن لي استادكم
• عمليتك ماظريفه وحركتك ما وطنيه
• ناس اللجنه المنظمه
• بتاعين شان
• وكت الحكايه كلها شنه في شنه
• حولوا النهائي من استادنا
• ماعندنا مكان لاي شنه او بشتنه
• انشاء الله تودوهوا ميدان عقرب
• ايها الناس
• الجمهور الكريم
• الوجه المشرق الوحيد في شان شنو
• كملوا المشوار
• زينوا المدرجات
• تعالوا كل المباريات
• ولو كانت تلعب في الضلمه ام غمتي
• واصلوا مساندتكم لشعار الوطن
• انتم من يستحق الكاس
• ياناس
• صدقوني البدري يستطيع ان يصنع لنا من الاشبال ابطال
• فقط نسانده
• ونرفع درجات الطموح عندنا لمريخ اليوم وبكره وبعد بكره
• مهما كبر اللاعب
• فانه يصغر اذا لم يتفاني للشعار
• لن نتعامل بردود الافعال
• ولن نتعامل بالعواطف
• المهم
• نظام مبارك طرد قناة الجزيره
• في ألاخر الجزيره في القاهره ومبارك ونظامو وين , ربك وحده يعلم
• قناة الجزير بقت خير رقيب علي الانظمه العربيه الحاكمه
• الفه بس
• بتكتب المهرجلين
• تكتشف الفساد
• تسلط الضوء عليه
• وتسلط بذلك خلق الله علي حكام خلق الله
• لديهم شعار جميل
• هل مازال العرب لايفتحون افواههم الا عند طبيب الاسنان ؟
• ولكن هل تعلم الجزيره ان كل آلام الاسنان لاتحتاج لطبيب
• فقط قرنفله وتعضي علي كده
• للصباح
• وكان اتلايق
• صعوط
• سفه مدنكله في السن الرافع قرنو
• وتتخدر
• وهو المطلوب
• والحكاية تنتهي
• لاتفتح خشمك
• ولا طبيب
• وجع الضرس يروح في صمة خشمو
• امال حبوباتنا ديل اتعلمن الصعوط في حفله ؟
• ما وجع ضرس سااااااي
• المهم كنا مستنين كلام البدري من بدري
سلك كهربا
ننساك كيف وضرس العقل قايم غلط
والي لقاء
سلك
