كورتكم شينه يا والينا .. بقلم: بابكر سلك

بسم الله الرحمن الرحيم

في السلك

*اتعودنا نتكلم عن الكورة

*الليله برضو كلامنا في الكورة

*بس كورة من نوع تاني

*معروف ان الكورة ليها خطط وتكتيكات

*وايا كانت الخطه والتكتيك وطريقة اللعب

*المظهر الجمالي في الاداء بعجب الناس

*يعجب الجمهور الذي يواكب في مستوي تشجيعه مستوي الكورة الشايفها

*فالجمهور المنتشي يغني ويردد الاهازيج ويرتفع بسلوكه وعباراته الي مستوي الكوره

*والجمهور المفروس يسب ويلعن ويسئ ويشبه سلوكه سلوك الكورة التي يشاهد فيها

*الليله دايرين نتكلم عن كورة الحكومه

*وريتونا كورة يا والينا

*مستوانا التشجيعي بقي زي كورة الحكومه

*وكورة الحكومه اثرت علي الجماهير

*الناس كلها ماشه مصنقعه

*الحكومه كورتها فوق

*الاسعار فوق

*الرسوم فوق

*العلاج فوق

*التعليم فوق

*البنزين فوق

*وفوق فوق اسعارنا فوق

*فوق فوق حياتنا فوق

*هكذا اصبحت هتافاتنا

*ولسه كورة الحكومه لي فوق

*كلو يوم تعلي فيها لي فوق

*يا والينا

*ختوا الكورة في الواطه وحنوا علينا

*اتكسرت رقابنا واتيبست ركبينا

*صانع لعب يهدئ اللعب يختها واطه ياكافي البلا مافي ؟؟؟

*والعام الجديد

*فوق شديد

*سمعنا بي زياده في رسوم تحويل سجل الاراضي

*وسمعنا بي زياده في الرسوم عموم

*والينا

*المالعب كورة الشراب

*مابكون عندو كونترول كويس

*يقوم يطفش فيها لي فوق بالطريقه دي

*شوفوا ليكم ناس دقوها بالشراب يا والينا

*كورة فوق دي ما بتقدم زول فينا

*ويمكن تفنينا

*ودلائل الكورةالفوق كتيره يا والينا

*والادله كثيره ومثيره

*مثلا

*ترخيص العربات

*رسوم استماره

*رسوم فحص آلي

*رسوم تحت مسمي شهادة سلامه (مطافي )

*ضريبة ترخيص عربات

*معقوله دي

*الضرائب لي الدخل ممكن

*ضرائب علي الارباح ممكن

*ضرائب علي الترخيص !!!!!

*شينه دي

*لكن شتارة صانع اللعب

*لي فوق

*بالاضافه للتأمين

*في مجملها للعربيه العاديه تسعمائة وشويه

*يعني قريب مليون عشان ترخص عربيتك

*او

*الحوش يا عمك

*والينا

*ختوا الكورة واطه وحنوا علينا

*عسمتوا رقابنا وصلبتوا ركبينا

*اسي المطافي دي دخلها شنو في عربيتي ؟؟؟؟؟

*يعني ممكن نتوقع مع طفيشكم ده وكورتكم الفوق دي

*يوم في المستشفي يدفعونا رسوم شئون هندسيه

*او يدفعونا رسوم نفايات لما نجي نسجل اولادنا في المدارس

*او يدفعونا دمغة دعم شرطه عند بتاع التسالي

*او ندفع دمغة دعم الوطن ليتحلل زول تاني

*او نسدد رسوم رفاهية لما نجي ندفن زول قنع شال رفات قلبو الحرق وشتت

*والينا

*ختوا الكورة واطه وحنوا علينا

*المهم

*الانديه بدت الاعداد والاستعداد

*فيها السافر بره البلد

*وفيها الماسافر لسه

*وفيها الماقادر يسافر

*لكن

*لو كورة الانديه زي كورة الحكومه كلها فوق

*حقوا نجمد الموسم ده يا والينا

*لو شرطي المرور دخل عشرة عربات الحوش في اليوم

*يبقي دخل قريب عشره مليون للحكومه في اليوم

*بدخل كم شرطي المرور من يتعين و لما يطلع معاش ؟؟؟؟؟؟

*بالمناسبة

*الترخيص شغال بالليل

*ولما مشينا بالليل

*لقينا ايصال جديد بي خمسه وسبعين الف جنيه

*ليه ؟؟؟

*قالوا خدمات

*لا هزة كانون ولا موية ليمون

*خدمات في شنو ماعارف !!!!

*ختوا الكورة واطه يا والينا

*وحنوا مرة واحده علينا

*خدمات دي كلمة ساي ولا واقع ؟؟؟؟

*طفيشكم ده ما سمح

*طفيشكم شنه كورتكم وقلل جمهوركم

*بكرة تنزلوا الميدان

*تلقوا الجماهير قاطعتكم

*ختوا الكورة واطه يا والينا

*ومرة واحده حنوا علينا

*خدمات قال

*ايها الناس

*ان تنصروا الله ينصركم

*اقسم بالله العظيم وكتابه الكريم

*ان تنصروا الله ينصركم

سلك كهربا

ننساك كيف وزمان في الليق عندنا كوتش بقول  لينا طفيشكم ده بطفشكم

والي لقاء

سلك

b_silik@hotmail.com