سودانايل أول صحيفة سودانية رقمية تصدر من الخرطوم
بسم الله الرحمن الرحيم
في السلك
• منقاش مفروض يبيع لمبه لمبه
• يشوف ليهو كم شافع كده يلفوا باللمبات في التقاطعات
• لانو بضاعة التقاطع مافي زمن عشان الزول يجربها
• لازم تفاوض وتعاين وتشتري قبل ما الاشاره تفتح
• ولو كنت محظوظ تقع في الاحمر في الاشارات البتقفل رقميه
• مع وقفت كده تولع احمر وتديك الرقم 193
• معناها حاتقيف لي رمضان الجاي
• رقم الاشاره يدخلها طب الخرطوم
• المهم
• تشتري
• الاشاره تولع اصفر
• وتتحرك
• اخضر
• البائع يهمس قشه ما تعتر ليك
• وتمشي البيت تلقي البضاعه مضروبه
• بضاعة حله سااااي
• يا حليل كابوندي
• طبعا في ناس حظهم كعب جدا
• ديل كان اشتروا لمبات التقاطعات
• بتقع ليهم لمبات البرج الشمالي الغربي
• البتطفي براها ديك
• اها
• بعد اللمبات تتباع كمواسير للمشترين
• منقاش يقوم يقطع الابراج
• كل متر براهو
• تشتري متر حديد عليهو متر مصدي
• حديد اقدم من كوبري امدرمان القديم
• من زمن الانجليز
• ناس كلارك
• كلارك الخواجه
• المستعمر
• الكان رئيسا لنادي الحركه الوطنيه
• من يوم الخميس سمعتوا عن الحركه الوطنيه كلام ؟
• ماقلت ليكم كلام بنقال ساااااااااااااي
• قال حركه قال
• المهم
• البشتري الحديد يا منقاش لو داير ماسورتين بيع ليهو
• استلم القروش
• واديهو ايصال استلام
• يمشي يستلم بضاعتو من معسكر القاهره
• المواسير بالكوم والردوم
• الزرق الطوال في
• وكتاااار كمان
• الزرق القصار في
• ماكتار لكن
• المازرق في
• لكن مواسير قديمه
• كان مليتها مويه بتدشر
• لديتر بس
• والمانافعه معاهو مواسير معسكر القاهره
• حوله يا منقاش لمخزن شندي
• مليان مواسير
• وبعد ده يا منقاش لو ماغطت الدين تعال للخلصاء
• ناس روشا
• بيع ياروشا
• وحل الدين
• ياناس
• خلوا وارقو يكمل الموسم ده
• بعد داك قرروا
• في ناس طالبوا مجلس المريخ بالاستقاله بعد الهزيمه من الهلال
• سبحان الله
• في فرنسا مافي زول طالب زول بالاستقاله بعد نتائج فرنسا في المونديال
• ولا في الماني قال الناس تستقيل عشان المانيا اتغلبت من من هم دونها
• قلت ليكم
• نحن شعب متفرد
• بنفكر بي طريقه بنعرفها برانا
• نشيل الزول في راسنا ده
• اول عدم توفيق نرميهوا من راسنا ده للواطه طوالي
• امس اتكلمنا عن اضراب الاطباء
• فيهم وحدين زعلوا
• قالوا لي افرز
• قلت ليهم ماكلكم
• فيكم اطباء تمام التمام
• شطاااااااااااااااااار
• انا عندي صاحبي ادبي
• ود ناس
• مشي رومانيا
• درس الطب
• ماشاء الله
• اسي مستر
• اخصائي قدر الضربه
• وعندي خالي اخصائي اطفال
• قدر الدنيا
• واستاذ طب في الجامعه
• ما بلعب في اطفالوا
• كان مرضوا بوديهم الدكتور طوالي
• موش قلت ليكم ما كلكم
• زمااااان خالتي قالت لي الدكتور من يكتب الروشته بالعربي يخربوا يا يمه
• الكلام ده طبعا بدري
• قبل التعريب
• قلت ليها ياخاله رايك شنو في روشته بالعربي
• وبالعربي وغلط
• قالت لي فكي مابكتب العربي غلط
• قلت ليكم ماكلكم
• لكن يا جماعه الطب مهنه انسانيه
• الزول لما يضرب عن ممارسة عمل انساني بكون شنو ؟
• اوقف ممارسة عمل انساني ؟
• ياربي بكون تجرد من الانسانيه ولا لسه منتمي للانسانيه ؟
• انا ماعارف اسباب الاضراب
• لكن رأسي ده لو بقي كلو اضنين ما بصدق ان تكون اسباب الاضراب ودوافعه غير الرغبه في ترقية وتنقية العمل الطبي لتحقيق خدمات طبيه راقيه ونطقيه للمواطن
• اي سبب غير ده ما بصدق
• طمبل وكلتشي في العلاج بره
• وحموده قبلهم
• والعجب قبلهم
• اي زول ماشي الاردن
• للعلاج
• لكن ماكلكم
سلك كهربا
حتي لو لقينا مهاجم صريييح ما بننساااااك
والي لقاء
سلك
babikir maki [b_silik@hotmail.com]
