في السلك
·امس القريبه دي
·كتبت ليكم
·قلت ليكم براااااحه بنجيب اربعه اقوان
·دفاع شوارع اتجاه واحد
·بودي القون طوالي
·معقوله
·خمسه انفرادات ضايعات ؟؟
·دي كان انتهت تمنيه
·دفاع شوارع اتجاه واحد
·استوب مافيها
·الاستوب الوحيد بلنت
·اول ما لقينا حكم ما سوداني
·وافريقي
·لكن ما افريقي حماده
·وضحت الحكاية
·بعد كم وعشرين سنه
·اول ضربة جزاء لينا ضدهم
·المهم
·الزعيم اول زول يضحي في العالم الاسلامي
·خروفنا شدة ما هش ورخس
·ماضبحناهو بي سكين
·ضبحناهو بي ضفر
·هش خلاص
·بمناسبة الضحيه دي
·ناس روشا شابكننا شامين شامين
·وناس فطومه اختي شابكاتنا
·شامين شامين
·شامين شنو يا فطومه يا اختي ؟؟؟
·نحنا ضابحين
·والشامنو ده ريحة الشيه
·شية ضفر
·اقصد شية جمر
·نقسم ليكم
·ولا تجوا تفطروا معانا !!!!!
·الداير السبت يجينا يوم السبت
·ايها الناس
·منو من طيشة مجموعتنا التلاته صعد معانا ؟؟؟
·لانو قالوا الهلال عندو حداشر
·واهلي شندي عندو تلاته
·والانتر عندو خمسه
·يعني الزعيم نقاطو قدرنقاط الهلال زائد نقاط اهلي شندي
·يعني البرير زائد الارباب بساوي الوالي
·والانتر زائد الاهلي اقل من نقاط الزعيم
·التلاته طيشه
·لكن التلاته حلاته
·بلابل
·قال روشا عاد الصفا
·عاد الصفا ولا ساكن الصفا يا روشا ؟؟؟
·قالوا غارزيتو والبرنس واتلبرير اتصالحو
·ادينا كل واحد منهم هديه قون
·وديلك جن تلاته
·اعرفوا تومتي يا ته
·انا غايتو تومتي ضفاري
·زول يجيب قون هد ضفاري !!!!!
·بويا قعد يبكي
·اسلام غنت
·ووب عليا والبكي ما بجيبو ليا
·من حقها تغني
·ايها الناس
·تاني ايها الناس
·الكوره اللعبها سعيد لي نفسو
·الضرب بيها دفاع الهلال كلو
·وانفرد
·لولا تدخل ليما
·لكان اذكي هدف افريقي
·الجايات اكتر يا سعودي
·يا شفت
·بمناسبة شفت
·الشفوت محمد موسي وخالد
·مما مسكوا المريخ
·الهلال ما غلب المريخ
·عفارم عليكم يا شفوت
·بمناسبة شفوت
·الناس الماعارفه معني شفوت عرفوا ولا نشرح ليهم ؟؟؟
·غايتو بعد ده كلو لو ماعرفوا
·تبقي مشكله
·ايها الناس
·الكوره دي مفروض تنتهي سبعه
·زي كورتنا ضد الخرطوم
·ومع احترامنا للخرطوم
·الهلال ما افضل منها بي حاجه
·الكوره الجايه ياخدوا سبعه يا كليتشي
·فاهم
·ايها الناس
·الناس ديل مالهم ؟؟؟
·جنوا ؟؟؟
·خليها شوتت القاروره
·شوتت غارزيتو دي يسموها شنو ؟؟؟
·الزول ده غار من هيثم ولا شنو ؟؟؟
·هيثم لما شات القاروره رشت كل الجهاز الفني والاحتياطي
·غارزيتو داير يقلد
·جا يشوت القاروره
·شات الكوره
·وكتمت
·روشا
·وين ماسوريه ؟؟؟
·قال بي عين واحده
·ده بي عينين اتنين
·واضنين
·مرق الكوره من خط سته بتاعنا
·وداها السنتر
·عرفتوا الصدفه الفاتت ؟؟؟
·والصدفه لن تتكرر
·والله ضفر لو داير يطلعها زي سانيه بتاعكم ده
·ماكان طلعها بالدقه دي
·وماكانت مشت بعيد كده
·الزول ده لو شطبتوهوا
·ادونا ليهو ثيرباك
·مية قون انفراد تضيع ؟؟؟؟
·الباشا ورمضان وساكواها وكليتشي واديكو
·انا زاتي لو كنت في النجيله
·كان انفردت بي الاسبوع كلو
·خلي بي جمعه
·دفاع زي ماقالت فطومه اختي
·شوارع ومسفلته
·وازيدك من الشعر بيت يا فطومه
·استوب مافيها
·تمشي سااااااااااي
·واتجاه واحد كمان
·بويا …..
·تبكي !!!!
·تبكي بس
·ايها الناس
·قالوا ناس جوليبا المالي
·بعكسوا في الدقيقه تلاته عكسات
·اسي الجاب تلاته شنو ؟؟؟
·واحد طلع بعد الكوره
·وقف جمب الاستاد
·داير مواصلات
·هو حقيقة طلع قبل الكوره تنهي
·طقع ومرق
·وقفت قدامو حافله
·قال للكمساري وين ؟؟
·الكمساري قال ليهو اركب ابو حمامه
·اتشبك في الكمساري
·قال ليهو ابو حمامه انا ؟؟؟
·الكمساري قال ليهو ابو حمامه المحطه
·صاحبنا قال للكمساري انت قاصدني
·الكمساري قال ليهو علي الطلاق بالتلاته ماقاصدك
·صاحبنا قال للكمساري وكمان تلاته
·امشي ما داير اركب
·وقفت قدام هايس
·قال ليهو وين ؟؟؟
·بتاع الهايس قال ليهو خرطوم
·صاحبنا قال الخرطوم وين
·بتاع الهايس قال ليهو نادي الاسره
·قال ليهو نادي الاسره وين
·قال ليهو الخرطوم تلاته
·صاحبنا قال كلكم قاصديني
·برجع كداري
·ايها الناس
·الجماعه دخلوا طابق شاخور
·وقعدوا علي الحديده
·في زول قاعد علي الحديده عندو شئ ؟؟؟؟
·بلابل العيد
·اكانغا الكوره الفاتت مطرود
·غارزيتو امس مطرود
·سوق اكانغاك وفرتق
·الله معاك
·المهم
·شاعر كبير جدا
·كتب اغنيه رائعه جدا
·اداها لفنان
·فنان كبير
·الفنان لحنها
·وبدأ بروفاتها
·مطلعها بقول
·لو جداد الريده كاكا *****خلي باب البيت متاكا
·ما داير احرق ليهم اغنيتهم
·لكن
·استميح الشاعر والفنان
·استعير البيت الاول واضيف عليهو
·لو جداد الريده كاكا *******خلي باب البيت متاكا
·ضفر بجي بي ورااااااااااااااااااااااااااااااااااكا
·فرش ليهو معاااااااااااااااااااااااااااااكا
·لو جداد الريده كاكا
·ساكوها سميناهو ساكا
·ولو جداد الريده كاكا
·سوق معاك اكانغاكا
·ولو جداد الريده كاكا
·يمين بي بساطا **** تاخد تلالالالالاته
·اتمني من الشفوت نغني المطلع ده جماعيا في كورتنا الجايه
·لو جداد الريده كاكا ****خلي باب البيت متاكا
·لو جداد الريده كاكا *****خلي باب البيت متاكا
·ايها الناس
·امس قلت ليكم
·مسامير طابق شاخور بنمرقها
·البمرق مسامير الشبكه منو ؟؟؟؟
·ومسامير دي طبعا جمع
·مامكن تكون مفرد
·لانو المفرد مسمار
·وماممكن تكون مثني
·لانو المثني مسماران
·وتقول العرب
·ساكواها احرز مسماران
·ويجر بالياء والنون
·مثل رأيت مسمارين
·ولكن مسامير جمع
·والجمع ببدأ من تلاته
·ولو جداد الريده كاكا ****خلي باب البيت متاكي
·زي الماحصل شئ تاخد تلالالالالالالالالاته
·المهم
·روشا
·البلابل غنايات
·واجمل اغنيه عندهم
·رشه صغيره كفايه علينا
·اقصد عشه صغيره كفايه علينا
·عشان كده ضيعنا مية قون
·اها نجي لشمارات الوالي
·كان شفت يا والينا
·امس غنينا
·لو جداد الريده كاكا ***خلي باب البيت متاكا
·ضفر بجي بي وراكا *** وتاخد ليك تلالالالالاته
سلك كهربا
ننساك كيف وجداد الريده كاكا والباب متاكا وغالبين تلاته !!!!
والي لقاء
سلك
