سودانايل أول صحيفة سودانية رقمية تصدر من الخرطوم
بسم الله الرحمن الرحيم
في السلك
• المهم السودان غلب الجابون
• بتوفيق من ربنا سيدنا ده
• لكن في كلام لا زم يتقال
• من اجل عيون الوطن
• البحب الوطن يجب ان لاينافق في مواضيع تضر بالوطن
• ماداير اقيم حفل الافتتاح
• بس سمعت انه كلف سته مليارات
• التقييم لك ايها القارئ الحصيف المحترم
• شخصيا طموحاتي كانت اكبر بكتير من الشفتو
• وبصراحه الحال ماعجبني
• ونحن شعب ما بعجبنا الحال المائل
• كل شئ كان ماجميل
• وحتي لانظلم احد
• الجمال كان في اشياء محدده
• مقصورة الاستاد كانت جميله
• الجمهور كان جميلا
• مصعب كان جميلا
• بهاء الدين كان اكثر جمالا
• اما غير ذلك
• اسمحوا لي
• ما بستثني زول
• مساطب الشعب بالاستاد كانت عباره عن نقعه
• دلجه سااااااااااي
• زي صلعتي دي
• بدون مدرجات
• وكت تتعمل فيهو المدرجات مافي
• لو شفتوها
• تتخطط وتتقسم بيوت في اقرب خطه اسكانيه
• استاد بدون مدرجات
• زي خشم بدون سنون
• زلبطه ساي
• تانيا
• الشرطه عاملت الناس خارج الاستاد معامله لا تليق بهذا الجمهور
• جمهور اتي ليساند ويشجع
• دافع من جيبوا
• من دم قلبوا
• ولكنه وجد معامله قاسيه جدا من الساده في الشرطه
• ارجع بهناك
• ماتجي بي جاي
• ممنوع
• يا زول
• الكلام ده ماواضح
• والحصان
• كربتك كربتك في نص الجمهور
• ده جمهور حنين يا شرطه
• ولا داعي للاجراءات الامنيه الوقائيه المتشدده
• مافي زول بجي الكوره وفي نفسه شئ غير الكوره
• اخوتنا في الشرطه
• عبارة تعليمات غير مقنعه للسائل
• يمكنكم ان توصلوا هذه الاحتجاجات لمن يصدر تلك التعليمات
• لان الجمهور لا يعرف منو البديكم تعليمات عدم التفاهم والمفاهمه معه
• ولتعلم الشرطه ان مرتكز نجاح هذه البطوله الاساسي هو الجمهور
• واذا عزف الجمهور عن دخول مباريات هذه البطوله بسبب ما يلاقيه من معاملة افراد الشرطه المبرره بالتعليمات
• فان البطوله ستفشل جماهيريا
• واذا فشلت جماهيريا
• يبقي بطوله فاشله
• قليلا من الاحترام للجمهور وحسن المعامله تجدوا حسن التعاون
• المهم
• تعالوا نشوف فريقنا
• مستوي فني في الواطه دي
• اللياقه البدنيه لا علاقه لها بمعسكرات خارجيه دائمه
• معسكر في ارتريا
• يجوز
• تشكيل المجاملات فيه كانت اساس الاختيار
• وحتي التبديل
• مكتوب علينا ان نلعب الشوط التاني دائما ناقصين لاعب
• لان السيد مازدا يحرم تبديل من يفقد اللياقه منذ الشوط الاول
• الا اذا طلب هو شخصيا التبديل
• وهنا يجني مازدا علينا
• ويجني علي اللاعب الذي يجامله
• يامازدا
• هذا اللاعب صاحب تاريخ طويل ومكانه
• وبفرضه علي التشكيل عندما يخلص البنزين فيه ضياع لذلك التاريخ الفني الناصع له
• موازنات
• اذا استبدل مازدا لاعب من الهلال
• لابد وان يكون البديل هلاليا
• واذا استبدل لاعب من المريخ
• يكون البديل مريخيا
• الا اذا حكمت الضروره
• هذه طريقه عقيمه يا مازدا
• مازدا
• عذبتنا
• المصريون لما مبارك عذبهم مشوا ميدان التحرير
• ياناس
• تعالوا نمشي ميدان التحرير
• نشيل مازدا
• ميدان التحرير ببحري
• عند تقاطع شارع المزاد
• ونهتف
• فلسع ياجدع
• ونقطع قناة الجزيره
• ايها الناس
• الفات مات
• لن نتخلي عن فريقنا
• نجي كلنا
• البلد بلدنا
• ماحقت زول
• المهم
• كنا حضورا في الاستاد
• انا واستاذي اسماعيل حسن
• في المدرجات الشعبيه
• طفناها كلها
• وجدنا انا سوداني
• والرابطه القوميه
• ناس ليمونه وابو شاكوش
• والرابطه الوطنيه ناس السر كارلوس
• الجميع كان وطنيا فقط
• مداعبات بريئه بين الوان الطيف
• استمتعنا بمداعبات اخوتنا الاهله
• وبترحاب الساده المريخاب
• انه الوطن
• وانه القالب الذي تذوب فيه الالوان وتمتزج
• ويطلع من جوفها ترانيم
• بلد الخير
• اقول للدنيا كل الدنيا انا افريقي انا سوداني
• بالمناسبه
• الجمهور كان يسأل عن بقية الكتاب
• الكوره الجايه كلنا
• مدرجات شعبيه
سلك كهربا
ننسي منو ؟
والي لقاء
سلك
babikir maki [b_silik@hotmail.com]
