تأمُلات
hosamkam@hotmail.com
• الدوكشمان ممتع شديد يا بوي.
• متعتو شنو يا وليدي؟
• عشان فيهو تسلية يا بوي .. أصلو نحنا كل يوم نقوم من الصباح نتسوك ونشرب الشاي ونمشي المدرسة ونجي نتغدا ونلعب كورة، لكن ما كل يوم بنتفرج على دوكشمان يا بوي.
• قصدك تقول الدوكشمان بيكسر ليكم الروتين اليومي يا وليدي؟
• أيوة يا أبوي ممتع بالجد.
• بس يا وليدي الدوكشمان الممتع ده على زمنا كنا بنشوفو في أفلام الكاوبوي وبنضحك على الناس الما عندهم هم غير ابراز العضلات وكلامهم كلو دل ددل تاخ تراخ، لكن دوكشمان الحياة الواقعية ده جديد علينا، بس نقول شنو في زمنكم زمن المحن ده يا وليدي.
• يعني يا بوي ما كنتو بتعملوا دوكشمان زمان؟
• النصيحة يا وليدي لمن كنا صغار كنا بنعمل دوكشمان برئ، إلا حسع شايفين الكبار بقوا يسووا دوكشمان وكمان في الأماكن العامة ويفرجوا الناس عليهم.
• طيب مالو يا بوي مش هم مختلفين في حاجة ولازم يحلوها؟
• يعني جايب خبر الجماعة يا شقي؟
• كيف يا بوي هو في زول ما سمع بي دوكشمان الجماعة ديل، بس يا بوي امكن يكونوا خلاص حلوا الخلاف البيناتم.
• لكن الحل بالعضل يا وليدي؟ الخلاف ممكن يحلوه براحة خاصة لمن يكونوا كبار ومشهورين كمان.
• أنا سمعت إلا ما كنت قايل الناس العملوا الدوكشمان في مكان عام ديل مشهورين.. ديل ناس منو هم يا بوي؟
• عليمهم الله يا وليدي، لكن غايتو البقينا نسمع بيهو في الأيام دي محنا عديل والله.
• أظنك يا بوي قاصد ناس إنت عارفهم لكن ما داير توريني ليهم.
• يا وليدي قلت ليك عليمهم ربهم، إلا السووها رقدت.. ديل قالولك اتعاركوا بالأيادي أكتر من مرة لامن دخل بيناتم الحجازين.
• الحجازين ديل شنو كمان يا بوي؟
• ديل يا وليدي الناس البجوا جارين عشان يمسكوا أي ناس بعملوا في دوكشمان ويهدوهم شوية.
• طيب ليه ما جابوا ليهم البوليس.. مش هم عملوا دوكشمان وفي مكان عام كمان.
• هو داب مكان عام يا وليدي! ده واجهة البلد عديــــــــــــل.
• طيب ليه ما ودوهم نقطة البوليس.
• قلت ليك يا وليدي الناس ديل مشهورين ونحن أصلنا كده الزول المعروف بنحاول نلملم ليهو حاجاتو الكعبة سريع سريع.
• لكن يا بوي كلامكم ده ما صاح.
• كيفن ما صاح يا وليد إنت كمان بتدور تنصحنا على آخر الزمن!
• أبوي ما تزعل من كلامي لكن بالجد كلامكم ما صاح لأنو الزول المعروف ده مفروض تحاسبوه أكثر من الزول الما معروف.
• بتدور بي حسابو شنو يا وليد؟
• عشان نحن الصغار ديل دايماً بنشوف الزول المعروف عشان نعمل زيو.
• يا حليلك يا وليدي ويا حليل زمنكم فعلا..ً زمان الحال كان كده، إلا حسع يا وليدي الدنيا اتغيرت والزول المعروف ده بقا يسوي الدايرو أكان صاح ولا غلط والدوكشمان ده أبسط حاجة يعملها زي الناس ديل.
• يعني يا بوي يسووا دوكشمان ما زي حق الأفلام.. دوكشمان بالجد وبرضو انتو قبلانين بيهم؟
• ما سمعت يا وليدي بالمقولة البتقول حكم القوي على الضعيف؟ أها ده ياهو حالنا زاتو.
• لكن يا بوي لحدي السنة الفاتت القريبة دي ما كنت بتقول كلام زي ده مالك اتغيرت كده؟
• الدنيا بتعلمك كل يوم شئ جديد يا وليدي ولازم نعرف نواكبها وإلا فاتتنا.
• هي لكن يا بوي ما لي الدرجة دي.. يعني العلمتنا ليه أمس تجي الليلة تغيروا كامل!
• الله يجازي الكان السبب يا وليدي وغايتو ما باليد حيلة بس نسأل الله التخفيف.