من التعريفات البسيطة جدا (للدولة) فى العلوم السياسية انها الجهة البتحتكر ادوات العنف
ودى بيقصد بيها ادوات القوة العنيفة (السلاح) وبتعنى الجيش والشرطة والاجهزة الامنية
لانها عبر السيطرة على ادوات العنف بتقدر تسيطر على الوضع الامنى وتفرض الانتشار الشرطى والامنى وتحقيق الاستقرار العام و تحقيق العدالة من خلال القدرة على الانفاذ و عدم الافلات من العقوبة وعدم خلق الانفلات الامنى..
فالجهة البتمتلك الادوات دى هى (البتسيطر)
فلامن تخلق كيان بيملك السيطرة دى بيكون هو القادر على تحريك الاحداث فعليا… فما مهم اسمه شنو الكيان دا (مجلس سيادة) او (مجلس عسكرى) او حتى (شلة الكنبه) فى النهاية هو الجهة المحتكرة لادوات العنف ودى بتبقى دولة فوق الدولة فعلا
فقصة الاسم شنو وقاعدين وين دا ما الموضوع القصة هو ماسك شنو وممكن يعمل بيه شنو..
ادوات العنف دى الجهة الوحيدة المفترض تحتكرا هى الجهة (البتدير الدولة) تدير الجيش والامن والشرطة زى ما بتدير الصحة والتعليم والاقتصاد..
ما فى اى قطاع من قطاعات الدولة يكون خارج سلطة وهيمنة الادارة دى ولازم يخضع لادارة الدولة بالكامل..
الاستهبال العملوه بمجلس السيادة السابق لازم ما يتكرر والانقلاب نفسه العمله المجلس العسكرى فى مصر برضو بيبقى درس اخر..
ادارة الدولة هى المفترض تحدد وظيفة ومهام ومجال ومحاسبة كل جهة و تحدد من يقودها ومن يكون على رأسها..
القصة ما موقعك وين من الحوار والنقاش وانما موقعك وين من السيطرة على الدولة وتهديد الاجراءات والقدرة على التعطيل ..
احتكار العنف وادواته من اخص خصوصيات ادارة الدولة..
لا مجلس عسكرى لا مجلس سيادى لا استهبال السادة الضباط..
الجيش للثكنات ويتلقوا الاوامر والتعليمات من الجهاز التنفيذى لادارة الدولة..
البرهان والعصابة المعاه ينزلوا معاش و ينتظروا المحاكمات البريئ يمشى بيتم والمدان يتحاسب..
لكن قصة مشاركة وسيطرة دى تانى يلقوها عند الاغبياء والمستهبلين.
//////////////////////////
