بسم الله الرحمن الرحيم في السلك *اليوم نقابل ابناء الشريف *شريف نيجيريا *والشريف حقار شديد *لازم نبقي كاوبويات نوريهو حاجه *لازم يعرف الشطف القرد منو *كاوبويات اولاد قبلا *نبرطع بي حصيننا في الارض الواسعه *لا نمتثل لشريف ولا لاوامره *نكربت زي مادايرين *وندخل (الكافتيريا ) نضرب ليك الباب بي كراعنا *الباب يمشي ويجي *الضلفتين يرقصن *ونقول لبتاع الكافتيريا كب عصير *كركدي *نجغموا ليك في بقه واحده *ونخت الكبايه *نرجع الكسكته لي ورا *نقول ليهو كب تاني *الناس القاعدين في الكافتيريا كلهم يعاينوا لينا خايفين *يكب لينا *نشرب نصها ونكشح نصها *ونجدع كباية العصير الفاضيه لي فوق *ونديها ليك طلقه وهي في الهواء *تتكسر حته حته *ونتلفت علي الناس القاعدين في الكافتيريا *نحمر ليهم *ديجانقو يا عمك *ننفخ في المسدس ونرجعو لي غمدو *ونقول *هوي يا ناس الكافتيريا كلكم *العن ابوكم لابو الشريف بتاعكم زاتو *اذا واحد منهم روحو عاجباهو *وقاشر بالبطاقه الادها ليهو الشريف *وعامل فيها من اولاد الشريف *وقف حيلو وقال *افرز يا جانقو *نقول ليهو بكل قوة عين *ما بنفرز *العن ابوكم كلكهم وانت اول واحد فيهم *ونلحقو ليك طوبه لمن يعرف الله واحد *اليوم المعركه بين الشريف والكاوبويات *واولاد قلبا زي الهمباته *فرسان وما بنحب القيود واللوائح والقوانين *وما بخوفنا شريف *حتي ولو سكتنا ليهو كتير *المهم *الاصرار علي الانتصار بطلعنا بي نقطه علي الاقل *والداير يدخل كلية الطب *ماضروري يقرأ في مدرسة خاصه *ولا ضروري يدخل كورس *لو ذاكر تحت لمبة الشارع وخت الطب هدف بدخل *هو وينو الشارع الفيهو لمبه!!!! *المهم *برغم ظرونا البتقرينا تحت لمبة الشارع *نخت الطب هدف وبنوصل ليهو *كلها ساعه ونص من التضحيه والثبات *ونخطوا خطوه نحو نهائيات كلية الطب التي ننشدها *كل التمنيات والامنيات لصقور الجديان الشفوت بقلب الطاوله علي اولاد الشريف *ليعودوا وهم يغنوا بالطياره *اغنية الشريف زعلان مني *الشريف لازم يزعل *هجمه مرتده محكمه بتجيب التلاته نقاط *تقفيل جيد للدفاعات بدون انفعال وبدون هجمه مرتده *بجيب لينا نقطه *والنقطه ما بناباها طالما بتخلينا في المنافسه لسه *ايها الناس *ان تنصروا الله ينصركم *اها *نجي لي شمارات والي الخرتوم *والينا *شفت السخانه الفينا *ده نجاض العيش قالوا لينا *طيب وكت في عيش نجاضو قدر ده يا والينا *موش مفروض سعر العيش ينزل لينا ؟؟؟؟ *ولا برضو برغم السخانه الفينا *-سعر العيش يسخن علينا ؟؟؟ سلك كهربا ننساك كيف ونجاض العيش زي نجاض الناس …وااااااااااحد والي لقاء سلك b_silik@hotmail.com
