الكتمة جاياك إنتظر .. كتب /أحمد الطائف
غشيتو بالدقن الضلال
ونهبتو في عز الضهر، التقوى ماعمه ودقن و الحشمة ماجرت هدم
الكتمة ماكتمت عليك
الكتمة جاياك إنتظر
والزنقة ماشذاذ أفق
الزنقة باكر يوم تجر
الشعب لو خلاك أمس
ماأظنو باكر ينتظر
تطلع جموعوا وتحتشد
تهدر تدوي وتنفجر
لا بوقفا الغاز السجم
لا أمن لاشرطة وكجر
بتجيك في بابك ضحى
وتلحسك كوعك عصر
ما الشعب مغبون مرتين
عيشتو في غربة وسفر
غشيتو بالدقن الضلال
ونهبتو في عز الضهر
التقوى ماعمه ودقن
والنعمة مابرج وجسر
الحشمة ماجرت هدم
والزنقة في الجوع والفقر
الثورة في كل الوطن
الوقفة في البلد الصبر
وإتجرع الأسى والدموع
وإتحمل الضيق وإنستر
هسي الصبر حدو أنتهى
أرفع حصونك وإنجحر
والشعب قرر يسقطك
ياساقطاً في قاع بحر
الثورة بتدك الحصون
والشعب قادر ينتصر
وسننتصر ..
ـــــــــــــــــــــ
منقول من أحمد الطائف
///////////////
