انا هيثم .. انا ( سيد) الهلال (2)

أصل الحكاية

عندنا حبوبة في الحلة بتقول كلام حكم شيء بنفهمه وشيء ما بنفهمه ، من الكلام البترددو طوالي ( جني وجن وسخ الحيط وبيت الأدب البفتح بيت) وقدر ماحاولنا نعرف هي بتقصد شنو بالكلام ده ، ماعرفنا ، لغاية أمبارح وانا بقرأ في تعليق مهزوز عن ماكتبته في هذه المساحة أمس الأول لماورد في حديث قائد الهلال هيثم مصطفي ، هنا فقط عرفتها قاصدة شنو؟ ولأن التعليق المهزوز ما بستحق الواحد يتوقف عنده كتير حا اتجاوزه لكن حاأرجع بس متين مامعروف .
خلونا مع هيثم ( سيد) الهلال ونقرأ حبه من الحوار الضجة سألوه .. كيف تقيم غارزيتو فنيا؟ ضحك جد جد ضحك او اتكتب انه ضحك وقال ( كدي خلونا من فنيا دي بس لازم تعرفوا إنو نظره ضعيف ودايما مابفرق بين اللاعبين وعادي في التمرين يوجه بكري علي إنه كاريكا ويخلط بين مساوي وعلاء زول مابشوف من بعيد وقبل كده في مائدة الطعام خته يده علي رأس علاء وبدأ يشكر فيه علي إنه سيف مساوي وفي نفس الوقت يكورك (علاء بتأخر في الحضور للمائدة ليه) وإنفجر اللعيبة ) إنتهي حديث هيثم . خلونا من إنه كابتن الفريق وماعندو حق يقول كلام زي ده ، وخلونا من حكاية إنه القائد والكبير ، وخلونا من قصة الإحترام وأدب الهلال الوضح إنه هو ماعارف معناه شنو؟ خلونا نصدق إنه غارزيتو فعلا عميان أو نظره ضعيف بعد التخفيف ( تخفيف الكلمة) السؤال عرفك كيييييف إنت هيثم؟ معقولة يكون نظره موزون عليك انت بس ومابشوف غيرك ؟ سبحان الله ولله في خلقه شئون.
الغريبة ياهيثم انت قلت كان بستفزك في التدريبات ولما تلغط غلطات عادية في التمرين يرمي الدفتر من يده ويعمل حركات بيده ، حيرتنا عرفك كيف ده إنت؟ مش إحتمال يكون قاصد محمد أحمد أو محمد عبدالرحمن ، زول نظره ضعيف لدرجة إنه مابفرز الواقف جنبه وخاتي يده في راسه ( سيف ولاعلاء) شافك كيف وعرفك كيف وانت علي بعد أمتار منه ؟
أتاري غارزيتو غاشينا ولومناك ساكت لما قام غيرك في كورة أهلي شندي ، انت عارف علي حسب النظر بكون قاصد يغير مهند قام غيرك ماماشايف ومفروض تعذروا بدل تزعل وماتسلم عليهو ، والغريبة كان بصفق ليك وانت طالع ، قلت ليك بكون قاصد مهند وماعرفك إلا لمن ابيت تسلم ، شفت كيف الراجل بعرفك بالإحساس بس .
ونواصل حبة مع الحوار الضجة .. السؤال بعد الفات طوالي سألوا هيثم .. بس غارزيتو في الأول أداك فرص كتيرة مايدحض إتهام إنه يعاديك؟ أجاب هيثم ( فرص شنو ياناس الزول ده من شدة عايزني افضل اصر في المباريات إنو العب إرتكاز أو جناح شمال امام الأمل والخرطوم ثلاثة مع سحب عناصر مهمة بيننا تناغم واشرك لاعبين جدد وبخبرتي خلقت تناغم وفزت بالنجومية في الأولي ( ياولد دي من عندي) وقدمت أداء جيد في الثانية ولكن الخلل التنظيمي المقصود أثر في النتيجة وحينما شاركت في مباراة هلال كادوقلي كان الأداء جيدا والنتيجة جيدة ) إنتهي ، هيثم ده لذيذ اصلا مابغلط .. ماورانا الخلا الخلل التنظيمي ( مقصود) من غارزيتو طبعا ، في مباراة ومامقصود في مباراة هلال كادوقلي ليه؟ ماهو أصلا قاصد يبقي يخلي الخلل (مقصود) ليه يعدلو عشان إنت تفوز بنجومية مباراة ، مش كان ممكن يلعبك ارتكاز أو جناح ليه ماعمل كده ؟ .
سؤال تاني ياهيثم انت مش عارف إنه مابشوف ، لما كان بلعبك إرتكاز أو جناح ، ماتزوغ هو فارزك من كاريكا او عمر او اكانغا أو مهند ، إتفق مع أي لاعب وامشي ألعب في خانتك حا يعرف ده إنت كيف؟ زول ماعارف خاتي يده في راس سيف ولا علاء حايعرفك وإنت هنااااك وبالليل والإضاءة علي قدرنا ، معليش نسيت خالد بخيت قاعد وبكلموا ، والله ياهيثم الزول قاصدك عدييييل .
المحيرني قلت حولك للتدريب مع الشباب ، عرفك كيف ؟ قلت ليك بكون قاصد محمد أحمد أو محمد عبدالرحمن ، إنت ساكت شايل منه .
غارزيتو وهو مدرب بطل أفريقيا للأندية ، وتالت العالم للاندية ، وبطل كبري بطولات السودان (الممتاز) بدون هزيمة ووصل مع الهلال من أول موسم نصف نهائي الكنفدرالية وماعندو لاعب كبير أو نجم في الفريق ، بعد ده كلو مابشوف ، طيب لو بشوف كان عمل شنو؟ كنت كبير ياكابتن .. كنت .
أواصل

hassan faroog [hassanfaroog@hotmail.com]